ದಸರಾ ಸಂಭ್ರಮಕ್ಕೆ ಸುಗಮ ಸಂಚಾರದ ಸಾಥ್

ಟಿ. ಕೆ.ಹರೀಶ್, ಹಿರಿಯ ಸಹಾಯಕ ನಿರ್ದೇಶಕರು, ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ

ಸಂಭ್ರಮದ ಜೊತೆಗೆ ಸ್ವಚ್ಛತೆ, ಸುರಕ್ಷತೆ ಮತ್ತು ಪರಿಸರ ಕಾಳಜಿಯೂ ಇರಲಿ

ಮೈಸೂರು ದಸರಾ ಎಂದರೆ ಕೇವಲ ಒಂದು ಹಬ್ಬವಲ್ಲ; ಅದು ಮೈಸೂರಿನ ಪರಂಪರೆ, ಸಂಸ್ಕೃತಿ, ಕಲೆ ಮತ್ತು ಜನಜೀವನವನ್ನು ಇಡೀ ಜಗತ್ತಿಗೆ ಪರಿಚಯಿಸುವವೈಭವದ ಆಚರಣೆ. ದಸರಾ ಸಂದರ್ಭದಲ್ಲಿ ಮೈಸೂರು ಹೊಸ ರೂಪ ಪಡೆಯುತ್ತದೆ. ಅರಮನೆ ವಿದ್ಯುತ್ ದೀಪಗಳಿಂದ ಕಂಗೊಳಿಸುತ್ತದೆ. ಬೀದಿಗಳಲ್ಲಿ ಜನಸಂದಣಿ ಹೆಚ್ಚುತ್ತದೆ. ಸಾಂಸ್ಕೃತಿಕ ಕಾರ್ಯಕ್ರಮಗಳು, ಮೆರವಣಿಗೆಗಳು ಮತ್ತು ವಿವಿಧ ಆಕರ್ಷಣೆಗಳನ್ನು ಕಣ್ತುಂಬಿಕೊಳ್ಳಲು ರಾಜ್ಯದ ವಿವಿಧ ಭಾಗಗಳಿಂದ ಮಾತ್ರವಲ್ಲದೆ ದೇಶ-ವಿದೇಶಗಳಿಂದಲೂ ಪ್ರವಾಸಿಗರು ಆಗಮಿಸುತ್ತಾರೆ.

ಜನರ ಈ ಸಂಭ್ರಮವೇ ಮೈಸೂರಿನ ದಸರಾಕ್ಕೆ ಜೀವ ತುಂಬುತ್ತದೆ. ಆದರೆ ಇಷ್ಟು ದೊಡ್ಡ ಪ್ರಮಾಣದ ಜನರು ಒಂದೇ ಸಮಯದಲ್ಲಿ ನಗರಕ್ಕೆ ಆಗಮಿಸುವಾಗ ಸಂಚಾರ ವ್ಯವಸ್ಥೆಯ ಮೇಲೂ ಸಹಜವಾಗಿಯೇ ಹೆಚ್ಚಿನ ಒತ್ತಡ ಉಂಟಾಗುತ್ತದೆ. ಆದ್ದರಿಂದ ದಸರಾ ಸಂಭ್ರಮದ ಜೊತೆಗೆ ಸುಗಮ ಸಂಚಾರ ಮತ್ತು ಪರಿಸರ ಸಂರಕ್ಷಣೆಯ ಬಗ್ಗೆಯೂ ಗಮನ ಹರಿಸುವುದು ಕಾಲದ ಅಗತ್ಯವಾಗಿದೆ.

ಸಂಚಾರವೂ ದಸರಾ ಅನುಭವದ ಭಾಗ: ದಸರಾ ವೀಕ್ಷಣೆಗೆ ಬರುವ ಪ್ರವಾಸಿಗರಿಗೆ ಕಾರ್ಯಕ್ರಮಗಳಷ್ಟೇ ಮುಖ್ಯವಾದುದು ನಗರದೊಳಗಿನ ಅವರ ಪ್ರಯಾಣದ ಅನುಭವವೂ ಹೌದು. ಪ್ರವಾಸಿ ತಾಣಗಳಿಗೆ ಸುಲಭವಾಗಿ ತಲುಪುವುದು, ವಾಹನ ನಿಲುಗಡೆಗೆ ಸೂಕ್ತ ಸ್ಥಳ ದೊರೆಯುವುದು, ಸಾರ್ವಜನಿಕ ಸಾರಿಗೆ ಸುಲಭವಾಗಿ ಲಭ್ಯವಾಗುವುದು ಹಾಗೂ ಪ್ರಮುಖ ಸ್ಥಳಗಳಲ್ಲಿ ಸಂಚಾರ ಮಾರ್ಗದರ್ಶನ ಸಿಗುವುದು ಪ್ರವಾಸಿಗರ ಅನುಭವವನ್ನು ಮತ್ತಷ್ಟು ಉತ್ತಮಗೊಳಿಸುತ್ತದೆ. ನಗರದ ಪ್ರಮುಖ ಸ್ಥಳಗಳಿಗೆ ಸಾರ್ವಜನಿಕ ಸಾರಿಗೆ ಅಥವಾ ಶಟಲ್ ಸೇವೆಗಳನ್ನು ಪರಿಣಾಮಕಾರಿಯಾಗಿ ಬಳಸುವುದರಿಂದ ಖಾಸಗಿ ವಾಹನಗಳ ಮೇಲಿನ ಅವಲಂಬನೆ ಕಡಿಮೆಯಾಗಬಹುದು. ಇದರಿಂದ ರಸ್ತೆ ಮೇಲಿನ ವಾಹನ ದಟ್ಟಣೆಯನ್ನೂ ನಿಯಂತ್ರಿಸಲು ಸಾಧ್ಯವಾಗುತ್ತದೆ.

ಕಡಿಮೆ ವಾಹನ, ಹೆಚ್ಚು ಸಂಭ್ರಮ: 

ದಸರಾ ಸಂದರ್ಭದಲ್ಲಿ ಕುಟುಂಬ ಸಮೇತರಾಗಿ ನಗರಕ್ಕೆ ಬರುವವರು ಸಾಧ್ಯವಾದಷ್ಟು ಸಾರ್ವಜನಿಕ ಸಾರಿಗೆಯನ್ನು ಬಳಸುವ ಮನೋಭಾವನೆಯನ್ನು ಬೆಳೆಸಿಕೊಳ್ಳುವುದು ಉತ್ತಮ. ಒಂದೇ ಕುಟುಂಬದ ಹಲವು ವಾಹನಗಳ ಬದಲು ಒಂದು ವಾಹನದಲ್ಲಿ ಪ್ರಯಾಣಿಸುವುದು, ಸೂಕ್ತ ಪಾರ್ಕಿಂಗ್ ಸ್ಥಳ ಬಳಸುವುದು ಹಾಗೂ ಅಗತ್ಯವಿಲ್ಲದ ಸ್ಥಳಗಳಲ್ಲಿ ವಾಹನ ನಿಲ್ಲಿಸದಿರುವುದು ಸಣ್ಣ ಕ್ರಮಗಳಂತೆ ಕಂಡರೂ ದೊಡ್ಡ ಪರಿಣಾಮವನ್ನು ಉಂಟುಮಾಡಬಹುದು. ದಸರಾ ಮೆರವಣಿಗೆ ಅಥವಾ ಪ್ರಮುಖ ಕಾರ್ಯಕ್ರಮಗಳಿಗೆ ತೆರಳುವಾಗ ವಾಹನಕ್ಕಿಂತ ಸಾರ್ವಜನಿಕ ಸಾರಿಗೆಯನ್ನು ಆಯ್ಕೆ ಮಾಡುವುದು ನಗರದ ಸಂಚಾರದ ಮೇಲಿನ ಒತ್ತಡವನ್ನು ಕಡಿಮೆ ಮಾಡುವುದರ ಜೊತೆಗೆ ಪರಿಸರಕ್ಕೂ ಸಹಕಾರಿಯಾಗುತ್ತದೆ.

ದಸರಾ ಸಂಭ್ರಮ, ಸ್ವಚ್ಛ ಗಾಳಿ: ದಸರಾ ಸಂದರ್ಭದಲ್ಲಿ ನಗರಕ್ಕೆ ಬರುವ ಜನರ ಸಂಖ್ಯೆ ಹೆಚ್ಚಾಗುವುದ ರೊಂದಿಗೆ ವಾಹನಗಳ ಸಂಖ್ಯೆಯೂ ಹೆಚ್ಚುತ್ತದೆ. ವಾಹನಗಳು ದೀರ್ಘಕಾಲ ಟ್ರಾಫಿಕ್‌ನಲ್ಲಿ ನಿಂತಾಗ ಇಂಧನ ಬಳಕೆ ಹೆಚ್ಚುವುದರ ಜೊತೆಗೆ ವಾಯು ಮಾಲಿನ್ಯವೂ ಹೆಚ್ಚಾಗಬಹುದು. ಆದ್ದರಿಂದ ಈ ಬಾರಿಯ ದಸರಾವನ್ನು ಸಂಭ್ರಮದ ಜೊತೆಗೆ ಪರಿಸರ ಕಾಳಜಿಯ ದಸರಾಯಾಗಿಸುವ ಸಂಕಲ್ಪವೂ ಅಗತ್ಯ. ಸಾರ್ವಜನಿಕ ಸಾರಿಗೆ ಬಳಕೆ, ವಾಹನಗಳ ಸಮರ್ಪಕ ನಿರ್ವಹಣೆ, ಅನಗತ್ಯ ಹಾರ್ನ್ ಬಳಕೆ ತಪ್ಪಿಸುವುದು ಹಾಗೂ ನಗರದಲ್ಲಿ ಸ್ವಚ್ಛತೆ ಕಾಪಾಡುವುದು ಪ್ರತಿಯೊಬ್ಬರ ಜವಾಬ್ದಾರಿಯಾಗಿದೆ.

ಹಸಿರು ಮೈಸೂರಿನ ಸೊಬಗು ಉಳಿಸೋಣ:  ಮೈಸೂರಿನ ದಸರಾ ವೈಭವಕ್ಕೆ ನಗರದ ಹಸಿರು ಪರಿಸರವೂ ಒಂದು ಪ್ರಮುಖ ಅಂಶ. ದಸರಾ ನೋಡಲು ಬರುವ ಪ್ರವಾಸಿಗರಿಗೆ ಕಂಗೊಳಿಸುವ ಅರಮನೆಯ ಜೊತೆಗೆ ಹಸಿರು, ಸ್ವಚ್ಛ ಮತ್ತು ಸುಂದರ ನಗರವೂ ನೆನಪಿನಲ್ಲಿ ಉಳಿಯಬೇಕು. ನಗರದ ಮರಗಳು, ಉದ್ಯಾನಗಳು ಮತ್ತು ಹಸಿರು ಪ್ರದೇಶಗಳನ್ನು ಕಾಪಾಡುವುದು ಕೇವಲ ಪರಿಸರದ ಜವಾಬ್ದಾರಿಯಲ್ಲ; ಅದು ಮೈಸೂರಿನ ಸೌಂದರ್ಯ ಮತ್ತು ಪರಂಪರೆಯನ್ನು ಮುಂದಿನ ಪೀಳಿಗೆಗೆ ಉಳಿಸುವ ಜವಾಬ್ದಾರಿಯೂ ಹೌದು.

ಪ್ರವಾಸಿಗರಿಗೂ ಒಂದು ಸಣ್ಣ ಮನವಿ:

ದಸರಾ ನೋಡಲು ಮೈಸೂರಿಗೆ ಬರುವ ಪ್ರತಿಯೊಬ್ಬರೂ ಈ ನಗರದ ಅತಿಥಿಗಳು. ಅತಿಥಿಗಳಾಗಿ ನಗರದ ಸೌಂದರ್ಯವನ್ನು ಆನಂದಿಸುವುದರ ಜೊತೆಗೆ ಅದರ ಸ್ವಚ್ಛತೆಯನ್ನು ಕಾಪಾಡುವ ಜವಾಬ್ದಾರಿಯನ್ನೂ ಹೊತ್ತುಕೊಳ್ಳಬೇಕು. ಕಸವನ್ನು ಎಲ್ಲೆಂದರಲ್ಲಿ ಎಸೆಯದಿರುವುದು, ಸಂಚಾರ ನಿಯಮಗಳನ್ನು ಪಾಲಿಸುವುದು, ವಾಹನಗಳನ್ನು ನಿಗದಿತ ಸ್ಥಳದಲ್ಲೇ ನಿಲುಗಡೆ ಮಾಡುವುದು ಮತ್ತು ಸಾರ್ವಜನಿಕ ಸಾರಿಗೆಯನ್ನು ಬಳಸುವುದು? ಇವು ದಸರಾ ಸಂಭ್ರಮಕ್ಕೆ  ನಾವು ನೀಡಬಹುದಾದ ಸಣ್ಣ ಕೊಡುಗೆಗಳು.

ಸಂಭ್ರಮವೂ ಇರಲಿ, ಜವಾಬ್ದಾರಿಯೂ ಇರಲಿ:   ಮೈಸೂರು ದಸರಾ ಜಗತ್ತಿಗೆ ಮೈಸೂರಿನ ವೈಭವವನ್ನು ಪರಿಚಯಿಸುವ ಹಬ್ಬ. ಹೀಗಾಗಿ ದಸರಾ ಸಂದರ್ಭದಲ್ಲಿ ನಗರದ ಸಂಚಾರ ಮತ್ತು ಪರಿಸರದ ಬಗ್ಗೆ ತೋರಿಸುವ ಕಾಳಜಿಯೂ ಮೈಸೂರಿನ ಸಂಸ್ಕ ತಿಯ ಒಂದು ಭಾಗವಾಗಬೇಕು.

ದಸರಾ ಎಂದರೆ ಬೆಳಕಿನ ಹಬ್ಬ, ಸಂಸ್ಕೃತಿಯ ಹಬ್ಬ, ಜನರ ಹಬ್ಬ. ಆ ಸಂಭ್ರಮದ ನಡುವೆ ಸ್ವಚ್ಛ ಗಾಳಿ, ಸುಗಮ ಸಂಚಾರ ಮತ್ತು ಹಸಿರು ಪರಿಸರವೂ ನಮ್ಮ ದಸರಾ ಸಂಭ್ರಮದ ಭಾಗವಾಗಲಿ. ಮೈಸೂರಿನ ರಸ್ತೆಗಳು ದಸರಾ ದಿನಗಳಲ್ಲಿ ವಾಹನಗಳಿಂದ ಮಾತ್ರ ತುಂಬದೆ, ಸಂತಸದಿಂದ ಸಾಗುವ ಜನರಿಂದ ತುಂಬಿರಲಿ. ದೂರದಿಂದ ಬರುವ ಪ್ರವಾಸಿಗರು ದಸರಾ ವೈಭವವನ್ನು ಕಣ್ತುಂಬಿಕೊಂಡು, ‘ ಮೈಸೂರು ಸುಂದರವಾಗಿದೆ, ಇಲ್ಲಿನ ವ್ಯವಸ್ಥೆಯೂ ಅಷ್ಟೇ ಸುಂದರವಾಗಿದೆ’ ಎಂಬ ನೆನಪಿನೊಂದಿಗೆ ಮರಳುವಂತಾಗಲಿ. ಸಂಭ್ರಮದ ದಸರಾ…ಸುಗಮ ಸಂಚಾರದ ದಸರಾ… ಸ್ವಚ್ಛ ಮತ್ತು ಹಸಿರು ಮೈಸೂರಿನ ದಸರಾ… ಇದೇ ನಮ್ಮೆಲ್ಲರ ಸಂಕಲ್ಪವಾಗಲಿ

” ಜನರ ಈ ಸಂಭ್ರಮವೇ ಮೈಸೂರಿನ ದಸರಾಕ್ಕೆ ಜೀವ ತುಂಬುತ್ತದೆ. ಆದರೆ ಇಷ್ಟು ದೊಡ್ಡ ಪ್ರಮಾಣದ ಜನರು ಒಂದೇ ಸಮಯದಲ್ಲಿ ನಗರಕ್ಕೆ ಆಗಮಿಸುವಾಗ ಸಂಚಾರ ವ್ಯವಸ್ಥೆಯ ಮೇಲೂ ಸಹಜವಾಗಿಯೇ ಹೆಚ್ಚಿನ ಒತ್ತಡ ಉಂಟಾಗುತ್ತದೆ. ಆದ್ದರಿಂದ ದಸರಾ ಸಂಭ್ರಮದ ಜೊತೆಗೆ ಸುಗಮ ಸಂಚಾರ ಮತ್ತು ಪರಿಸರ ಸಂರಕ್ಷಣೆಯ ಬಗ್ಗೆಯೂ ಗಮನ ಹರಿಸುವುದು ಕಾಲದ ಅಗತ್ಯವಾಗಿದೆ”