ವೈಡ್ ಆಂಗಲ್ : ಮಾರ್ಚ್‌ನಲ್ಲಿ ಬೆಂಗಳೂರು ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ

ಕೊನೆಗೂ ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವದ 14ನೇ ಆವೃತ್ತಿಯ ದಿನಾಂಕ ನಿಗದಿಯಾಗಿದೆ. ಮಾರ್ಚ್ 23ರಿಂದ 30ರ ವರೆಗೆ ಈ ಉತ್ಸವ ನಡೆಯಲಿದ್ದು, ಸಂಘಟನಾ ಸಮಿತಿಯ ಅಧ್ಯಕ್ಷರಾಗಿ, ವಾರ್ತಾ ಸಚಿವರೂ ಆಗಿರುವ ಮುಖ್ಯಮಂತ್ರಿಗಳ ಬದಲು, ಕಂದಾಯ ಸಚಿವರಾದ ಆರ್.ಅಶೋಕ್ ಅವರಿಗೆ ಜವಾಬ್ದಾರಿ ನೀಡಲಾಗಿದೆ. ಮೊನ್ನೆ, ಬಹುತೇಕ ಅವರ ಕ್ಷೇತ್ರದ ಮೂಲಕ ಹಾದುಹೋಗುವ ಬೆಂಗಳೂರಿನ ವರ್ತುಲ ರಸ್ತೆಯ, ನಾಯಂಡ ಹಳ್ಳಿಯಿಂದ ಬನ್ನೇರುಘಟ್ಟ ರಸ್ತೆಯವರೆಗೆ ಸುಮಾರು ಹನ್ನೆರಡು ಕಿ.ಮೀ. ಉದ್ದದ ರಸ್ತೆಗೆ ‘ಕರ್ನಾಟಕ ರತ್ನ ಡಾ.ಪುನೀತ್ ರಾಜಕುಮಾರ್ ರಸ್ತೆ’ ಎಂದು ಅಧಿಕೃತವಾಗಿ ಹೆಸರಿಡುವ ಕಾರ್ಯಕ್ರಮ ಅವರ ಕ್ಷೇತ್ರದಲ್ಲಿ ಇತ್ತು. ಅಂದು ಕನ್ನಡ ಚಿತ್ರರಂಗದ ಸಂಗೀತ ಸಂಯೋಜಕರು, ಗಾಯಕ–ಗಾಯಕಿಯರು ಪಾಲ್ಗೊಂಡು ಸಂಗೀತ ರಸಸಂಜೆ ಕಾರ್ಯಕ್ರಮವನ್ನೂ ನಡೆಸಿಕೊಟ್ಟರು.

14ನೇ ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವದ ಲಾಂಛನವನ್ನು ಇದೇ ಸಂದರ್ಭದಲ್ಲಿ ಬಿಡುಗಡೆ ಮಾಡಲಾಯಿತು. ಕಳೆದ ವರ್ಷ ಮಾರ್ಚ್ 3ರಂದು ಚಿತ್ರೋತ್ಸವದ 13ನೇ ಆವೃತ್ತಿ ಉದ್ಘಾಟನೆಯಾಗಿತ್ತು. ಮಾರ್ಚ್ 3, ಕಾಕತಾಳೀಯವಾಗಿ ಕನ್ನಡದ ಮೊದಲ ವಾಕ್ಚಿತ್ರ ಬಿಡುಗಡೆಯ ದಿನವೂ ಆಗಿದ್ದರಿಂದ, ಮುಂದೆ ಪ್ರತಿವರ್ಷ ಚಿತ್ರೋತ್ಸವವನ್ನು ಅದೇ ದಿನ ಆರಂಭಿಸುವುದಾಗಿ ಮುಖ್ಯಮಂತ್ರಿಗಳು ತಮ್ಮ ಉದ್ಘಾಟನಾ ಭಾಷಣದಲ್ಲಿ ಹೇಳಿದ್ದರು. ಮಾತ್ರವಲ್ಲ, ಅದನ್ನು ʼವಿಶ್ವ ಕನ್ನಡ ಸಿನಿಮಾ ದಿನ’ ಎಂದು ಈ ಮೂಲಕ ಆಚರಿಸುವುದಾಗಿ ಹೇಳಿದರು.

ಆದರೆ ಅದು ಸಾಧ್ಯವಾಗಲಿಲ್ಲವೆನ್ನಿ. ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವಕ್ಕೆ ಅಂತಾರಾಷ್ಟ್ರೀಯ ಮಾನ್ಯತೆ ದೊರೆತಿದೆ. ವಿಶ್ವಾದ್ಯಂತ ನಡೆಯುವ ಅತ್ಯಂತ ಪ್ರತಿಷ್ಠಿತ ಚಿತ್ರೋತ್ಸವಗಳ ಸಾಲಿಗೆ ಆ ಮೂಲಕ ಇದು ಸೇರಿದೆ. ಸಾಮಾನ್ಯವಾಗಿ ಮಾನ್ಯತೆ ಪಡೆದ ಚಿತ್ರೋತ್ಸವಗಳು ಪ್ರತಿ ವರ್ಷ ನಿಗದಿತ ದಿನಾಂಕಗಳಲ್ಲೇ ನಡೆಯಬೇಕು. ಕೊರೊನಾ ದಿನಗಳಲ್ಲಿ ಸ್ವಲ್ಪ ಏರುಪೇರಾದದ್ದು, ವರ್ಚುವಲ್ ಆಗಿ ನಡೆದದ್ದು ಹೊರತುಪಡಿಸಿದರೆ, ಈ ಉತ್ಸವಗಳ ದಿನಾಂಕಗಳು ಬದಲಾಗಲಿಲ್ಲ. ಭಾರತದ ಅಂತಾರಾಷ್ಟ್ರೀಯ ಚಿತ್ರೋತ್ಸವ ಪ್ರತಿವರ್ಷ ನವೆಂಬರ್ ೨೦ರಿಂದ ೨೮ರವರೆಗೆ ಗೋವಾದ ಪಣಜಿಯಲ್ಲಿ ನಡೆಯುತ್ತದೆ.

ಲಾಂಛನ ಬಿಡುಗಡೆಯ ಮಾರನೇ ದಿನವೇ ಸಂಘಟನಾ ಸಮಿತಿಯ ಸಭೆಯ ನಂತರ ಮಾಧ್ಯಮಗೋಷ್ಠಿ ಸಂಘಟನಾ ಸಮಿತಿಯ ಅಧ್ಯಕ್ಷರ ಮಾಧ್ಯಮ ಗೋಷ್ಠಿ ಇತ್ತು. ಚಿತ್ರೋತ್ಸವದ ಉದ್ಘಾಟನಾ ಸಮಾರಂಭ ವಿಧಾನಸೌಧದ ಮೆಟ್ಟಲುಗಳ ಮೇಲೆ ನಡೆಯಲಿದ್ದು, ದೇಶವಿದೇಶಗಳ ಚಿತ್ರರಂಗದ ಗಣ್ಯರನ್ನು ಅತಿಥಿಗಳಾಗಿ ಆಹ್ವಾನಿಸಲು ನಿರ್ಧರಿಸಲಾಗಿದೆ ಎಂದರು.

ಹಿಂದೆ ಚಿತ್ರೋತ್ಸವ ನಡೆಯುತ್ತಿದ್ದ ಓರಿಯಾನ್ ಮಾಲ್‌ನಲ್ಲಿರುವ 11 ಪರದೆಗಳಲ್ಲಿ ಚಿತ್ರೋತ್ಸವದ ಚಿತ್ರಗಳ ಪ್ರದರ್ಶನ ನಡೆಯಲಿದೆ. ಏಷ್ಯನ್ ಚಿತ್ರಗಳು, ಭಾರತೀಯ ಚಿತ್ರಗಳು ಮತ್ತು ಕನ್ನಡ ಚಿತ್ರಗಳ ಸ್ಪರ್ಧೆ ಇದ್ದು, ಈ ಬಾರಿ ಗೆದ್ದ ಚಿತ್ರಗಳಿಗೆ ನೀಡುವ ನಗದು ಮೊತ್ತವನ್ನು ಹೆಚ್ಚಿಸುವ ನಿರ್ಧಾರ ಮಾಡಲಾಗಿದೆ. ಸ್ಪರ್ಧಾ ವಿಭಾಗದ ಚಿತ್ರಗಳಿಗಾಗಿ ಪ್ರಕಟಣೆ, ಅಂತಿಮ ದಿನದ ನಂತರ ಅವುಗಳಲ್ಲಿ ಸ್ಪರ್ಧೆಗೆ ಚಿತ್ರಗಳ ಆಯ್ಕೆ ಇವು ಸಾಕಷ್ಟು ಕಾಲಾವಕಾಶ ಬೇಡುವ ವಿಷಯ. ಬಹಳ ಕಡಿಮೆ ದಿನಗಳಲ್ಲಿ ಅವುಗಳ ಆಯ್ಕೆ ಮಾಡುವ ಸವಾಲಿದೆ.

ಕಳೆದ ವರ್ಷ ಸ್ಪರ್ಧೆಗಾಗಿ ಆಯ್ಕೆ ಮಾಡಿದ ಚಿತ್ರಗಳು, ಆಯ್ಕೆ ಮಾಡಿದವರ ಶಿಫಾರಸು, ಆಯ್ಕೆಗಾರರ ಆಯ್ಕೆ ಕುರಿತಂತೆ ಸಾಕಷ್ಟು ಮಾತು ಕೇಳಿ ಬಂದಿತ್ತು. ಪತ್ರಿಕಾ ಗೋಷ್ಠಿಯಲ್ಲಿ ಸಚಿವರು, ‘ವಿವಾದಕ್ಕೆ ಆಸ್ಪದವಿಲ್ಲದಂತೆ, ಅರ್ಹರು, ಸಮರ್ಥರನ್ನು ಒಳಗೊಂಡ ಆಯ್ಕೆ ಸಮಿತಿಯನ್ನು ಉತ್ತಮ ರೀತಿಯಲ್ಲಿ ರಚಿಸುವಂತೆ ಸಲಹೆ ನೀಡಲಾಗಿದೆ’ ಎನ್ನುವ ಮೂಲಕ ಇದು ತಮ್ಮ ಗಮನಕ್ಕೂ ಬಂದಿದೆ ಎನ್ನುವುದನ್ನು ಹೇಳಿದರು.

ಸ್ಪರ್ಧಾ ವಿಭಾಗದ ಹೊರತಾಗಿ, ಸಮಕಾಲೀನ ವಿಶ್ವ ಸಿನಿಮಾ, ದೇಶ ಕೇಂದ್ರಿತ ಚಿತ್ರಗಳು, ಪುನರವಲೋಕನ ವಿಭಾಗದಲ್ಲಿ ವಿಶ್ವ ಸಿನಿಮಾ, ಭಾರತೀಯ ಸಿನಿಮಾ, ಕನ್ನಡ ಸಿನಿಮಾಗಳ ಉತ್ಕೃಷ್ಟ ಚಿತ್ರಗಳೇ ಮೊದಲಾದವು ಇರಲಿವೆ. ಚಿತ್ರೋತ್ಸವದ ಥೀಮ್ ಇನ್ನೂ ಅಂತಿಮವಾಗಿಲ್ಲ. ಇತ್ತೀಚೆಗೆ ನಮ್ಮನ್ನಗಲಿದ ಚೇತನಗಳ ನೆನಪು, ತಜ್ಞರಿಂದ ಉಪನ್ಯಾಸ, ಕಾರ್ಯಾಗಾರಗಳು, ವಿಚಾರ ಸಂಕಿರಣವೇ ಮೊದಲಾದ ಕಾರ್ಯಕ್ರಮಗಳು ಎಂದಿನಂತೆ ಇರಲಿವೆ.

ಅಂತಾರಾಷ್ಟ್ರೀಯ ಮಟ್ಟದಲ್ಲಿ, ಚಿತ್ರೋತ್ಸವಗಳ ಮೂಲಕ ಕನ್ನಡ ಚಿತ್ರರಂಗ ತನ್ನದೇ ಆದ ಛಾಪನ್ನು ಮೂಡಿಸಿಕೊಂಡಿದೆ. ಈಗಲೂ ಪ್ರತಿಷ್ಠಿತ ಚಿತ್ರೋತ್ಸವಗಳಲ್ಲಿ ಕನ್ನಡ ಚಿತ್ರಗಳು ವಿಜೃಂಭಿಸುತ್ತಿವೆ. ಪೆದ್ರೋ, ಪಿಂಕಿ ಎಲ್ಲಿ, ಶಿವಮ್ಮ, ಕೋಳಿ ಎಸ್ರು, ಹದಿನೇಳೆಂಟು… ಹೀಗೆ ಹಲವು ಚಿತ್ರಗಳು ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳಲ್ಲಿ ವಿಮರ್ಶಕರ ಮೆಚ್ಚುಗೆ ಗಳಿಸಿವೆ, ಪ್ರಶಸ್ತಿಗಳಿಗೆ ಭಾಜನವಾಗಿವೆ.

ಜನಪ್ರಿಯ ಸಿನಿಮಾಗಳ ಮೂಲಕ ಕನ್ನಡ ಚಿತ್ರರಂಗ ಇದೀಗ ವಿಶ್ವದಾದ್ಯಂತ ತನ್ನದೇ ಆದ ಛಾಪನ್ನು ಮೂಡಿಸತೊಡಗಿದೆ. ಭಾರತೀಯ ಚಿತ್ರಗಳೆಂದರೆ, ಬಾಲಿವುಡ್ ಎಂದು ಕರೆಸಿಕೊಳ್ಳುವ ಹಿಂದಿ ಚಿತ್ರರಂಗದ ಭ್ರಮೆಯನ್ನು ಕಳೆದ ವರ್ಷ ದಕ್ಷಿಣ ಭಾರತದ ಹಲವು ಚಿತ್ರಗಳು ಕಳಚಿವೆ. ಕನ್ನಡದ ‘ಕೆಜಿಎಫ್ ಚಾಪ್ಟರ್ 2’, ‘ಕಾಂತಾರ’ ಚಿತ್ರಗಳು ಹಲವು ಹೊಸ ದಾಖಲೆಗಳನ್ನು ಬರೆದವು.

ಕಡಿಮೆ ವೆಚ್ಚದಲ್ಲಿ ತಯಾರಾಗಿ, ಬಹುಪಟ್ಟು ಲಾಭ ಮಾಡಿದ ‘ಕಾಂತಾರ’ ಚಿತ್ರ ವರ್ಷಗಳ ನಂತರ ಶತದಿನ ಸಂಭ್ರಮ ಕಂಡಿತು. ನಿರ್ಮಾಣ ಸಂಸ್ಥೆ ಹೊಂಬಾಳೆ, ಶತದಿನೋತ್ಸವವನ್ನು ಕಳೆದ ವಾರ ಆಚರಿಸಿಕೊಂಡಿತು. ತಮ್ಮ ಚಿತ್ರ ಶತದಿನ, 75 ದಿನ, 50 ದಿನಗಳ ಪ್ರದರ್ಶನ ಕಂಡ ಚಿತ್ರಮಂದಿರಗಳ ಮಾಲೀಕರಿಗೆ, ತಂತ್ರಜ್ಞರಿಗೆ, ಕಲಾವಿದರಿಗೆ ಸ್ಮರಣಿಕೆ ನೀಡಿ ಗೌರವಿಸಿದರು ನಿರ್ಮಾಪಕ ವಿಜಯ್ ಕಿರಗಂದೂರು.

ಕನ್ನಡದ ಮುಖ್ಯವಾಹಿನಿ ಚಿತ್ರಗಳು ವಿಶ್ವದಾದ್ಯಂತ ಹೆಸರಾಗುತ್ತಿರುವ ಈ ದಿನಗಳಲ್ಲಿ ನಡೆಯುತ್ತಿರುವ ಚಿತ್ರೋತ್ಸವದಲ್ಲಿ ಆಧುನಿಕ ತಂತ್ರಜ್ಞಾನ, ಗ್ರಾಫಿಕ್ಸ್ ಮತ್ತಿತರ ವಿಭಾಗಗಳ ಕುರಿತ ಚರ್ಚೆ, ಮಾಹಿತಿ ವಿನಿಮಯಗಳಿಗಾಗಿ ಆಯಾಕ್ಷೇತ್ರಗಳಲ್ಲಿ ವಿಶ್ವಖ್ಯಾತರಾದ ತಜ್ಞರನ್ನು ಆಹ್ವಾನಿಸುವ ಯೋಜನೆ ಇದ್ದು, ಇದರ ಉಪಯೋಗವನ್ನು ಕನ್ನಡ ಚಿತ್ರೋದ್ಯಮ ಪಡೆದುಕೊಳ್ಳಬೇಕು ಎನ್ನುವ ಆಶಯ ಸಚಿವರದ್ದು. ಸಾಮಾನ್ಯವಾಗಿ ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳ ಉದ್ದೇಶವೂ ಅದೇ ಆಗಿರುತ್ತದೆ. ಇದನ್ನು ಸಿನಿಮಾ ತಂತ್ರಜ್ಞರ ಕಮ್ಮಟ ಎಂದೂ ಹೇಳಲಾಗುತ್ತದೆ. ವಿಶ್ವದ ಶ್ರೇಷ್ಠ ಚಿತ್ರಗಳ ಪ್ರದರ್ಶನ, ಸ್ಪರ್ಧೆ, ಸಮಕಾಲೀನ ಚಿತ್ರಗಳು, ಕ್ಲಾಸಿಕ್‌ಗಳ ಪ್ರದರ್ಶನ ಒಂದೆಡೆಯಾದರೆ, ಸಿನಿಮಾ ಮಾಧ್ಯಮದ ಜ್ಞಾನದ ಕೊಡುಕೊಳ್ಳು ಇಲ್ಲಿ ನಡೆಯುತ್ತದೆ.

ಭಾರತದ ಅಂತಾರಾಷ್ಟ್ರೀಯ ಚಿತ್ರೋತ್ಸವ, ಕೇರಳ, ಕೊಲ್ಕೊತ್ತಾ, ಮುಂಬೈ ಮತ್ತು ಬೆಂಗಳೂರು ಚಿತ್ರೋತ್ಸವಗಳು ಮಾನ್ಯತೆ ಪಡೆದ ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳು. ಇವುಗಳಲ್ಲದೆ, ಪೂನಾ ಮತ್ತು ಚೆನ್ನೈ, ಚಿತ್ರೋತ್ಸವಗಳು ನಿಗದಿತ ವೇಳಾಪಟ್ಟಿಯಂತೆ ನಡೆಯುತ್ತಿವೆ. ಇವುಗಳಿಗೆ ಅಲ್ಲಿನ ಸರ್ಕಾರಗಳೂ ನೆರವಾಗುತ್ತಿವೆ. ಇವಲ್ಲದೆ, ಇನ್ನೂ ಕೆಲವು ಚಿತ್ರೋತ್ಸವಗಳು ಭಾರತದಲ್ಲಿ ವೈಯಕ್ತಿಕ ನೆಲೆಯಲ್ಲಿ ನಡೆಯುತ್ತಿವೆ. ವಿದೇಶಗಳಲ್ಲೂ. ಅವುಗಳಲ್ಲಿ ಕೆಲವು ಆನ್‌ಲೈನ್ ಚಿತ್ರೋತ್ಸವಗಳಾದರೆ, ಇನ್ನು ಕೆಲವು ಒಂದು ದಿನದವು. ಮತ್ತೆ ಕೆಲವಕ್ಕೆ ಶುಲ್ಕ ತೆತ್ತು ಪ್ರವೇಶ ಪಡೆದರೆ ಸಾಕು, ಅವು ಚಿತ್ರೋತ್ಸವದಲ್ಲಿ ಪಾಲ್ಗೊಂಡ ಪ್ರಮಾಣಪತ್ರವನ್ನು ಪಡೆದುಕೊಳ್ಳುವ ಅರ್ಹತೆ ಪಡೆದುಕೊಳ್ಳುತ್ತವೆ. ವಿಶ್ವಾದ್ಯಂತ ನಡೆಯುವ ಹತ್ತುಸಾವಿರಕ್ಕೂ ಹೆಚ್ಚು ಚಿತ್ರೋತ್ಸವಗಳಲ್ಲಿ, ಮಾನ್ಯತೆ ಪಡೆದ ಚಿತ್ರೋತ್ಸವಗಳನ್ನು ಹೊರತುಪಡಿಸಿದರೆ, ಸುಮಾರು ನೂರರವರೆಗೆ ಪ್ರತಿಷ್ಠಿತ ಚಿತ್ರೋತ್ಸವಗಳಿವೆ.

ಭಾರತದ ಮತ್ತು ಕೇರಳದ ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳಿಗೆ ವರ್ಷಪೂರ್ತಿ ಕೆಲಸ ಮಾಡುವ ನಿರ್ದೇಶನಾಲಯಗಳಿವೆ. ಕೇಂದ್ರ ಸರ್ಕಾರ ಈಗ ಚಿತ್ರೋತ್ಸವ ನಿರ್ದೇಶನಾಲಯವನ್ನು ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮದ ಕೈಕೆಳಗೆ ತಂದಿದೆ. ಕೇರಳದಲ್ಲಿ ಅದು ಚಲನಚಿತ್ರ ಅಕಾಡೆಮಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದು, ಪೂರ್ಣ ಪ್ರಮಾಣದ ಕಾರ್ಯಾಲಯ ಇದೆ. ಅಂತಾರಾಷ್ಟ್ರೀಯ ನಿರ್ಮಾಪಕರ ಸಂಘಟನೆಗಳ ಮಹಾ ಒಕ್ಕೂಟದ ಮಾನ್ಯತೆ ಪಡೆಯುವ ವೇಳೆ ಅದು ಹೇಳುವ ನಿಬಂಧನೆಗಳಲ್ಲಿ, ವರ್ಷಪೂರ್ತಿ ಕೆಲಸ ಮಾಡುವ ಚಿತ್ರೋತ್ಸವ ನಿರ್ದೇಶನಾಲಯ ಸ್ಥಾಪನೆಯೂ ಸೇರಿದೆ. ಆ ನಿಟ್ಟಿನಲ್ಲಿ ಸರ್ಕಾರ ಯಾವಾಗ ಹೆಜ್ಜೆ ಇಡುತ್ತದೆ ನೋಡಬೇಕು.