ನವದೆಹಲಿ : ದೇಶದ ರಾಜಕೀಯದ ಭಾಷೆ ಬದಲಾಗುತ್ತಿದೆ. ಒಮ್ಮೆ ಟ್ವಿಟರ್, ಈಗಿನ ಎಕ್ಸ್ನಲ್ಲಿ ನಡೆಯುತ್ತಿದ್ದ ವಾಗ್ವಾದ, ಟ್ರೆಂಡ್ಗಳು ಈಗ ಇನ್ಸ್ಟಾಗ್ರಾಂ ರೀಲ್ಸ್ ಮತ್ತು ಸ್ಟೋರಿಗಳತ್ತ ಸ್ಥಳಾಂತರಗೊಂಡಿವೆ. ಈ ಬದಲಾವಣೆ ನೇರವಾಗಿ ಯುವ ಮತದಾರರನ್ನು, ಅಂದರೆ ಜೆನ್-ಝೀ ಜನರನ್ನು ಗುರಿಯಾಗಿಸಿಕೊಂಡಿದೆ.
ಕಳೆದ ಕೆಲ ತಿಂಗಳಿನಿಂದ ನೀಟ್ ವಿವಾದ, ಉದ್ಯೋಗ ಸೇರಿದಂತೆ ಹಲವು ವಿಷಯಗಳಲ್ಲಿ ಪ್ರತಿಭಟನೆಗಳು ಇನ್ಸ್ಟಾಗ್ರಾಂನಿಂದಲೇ ಸಂಘಟನೆಯಾಗುತ್ತಿವೆ. ಕಾಕ್ರೋಚ್ ಜನತಾ ಪಾರ್ಟಿ ಅಂತಹ ಯುವ ಸಂಘಟನೆಗಳು ರೀಲ್ಸ್, ಮೀಮ್ಸ್ ಮೂಲಕ ಸರ್ಕಾರದ ವಿರುದ್ಧ ಅಭಿಯಾನ ನಡೆಸುತ್ತಿವೆ. 15 ಸೆಕೆಂಡಿನ ವಿಡಿಯೋವೊಂದೇ ಲಕ್ಷಾಂತರ ವೀಕ್ಷಣೆ ಪಡೆದು ಬೀದಿಗಿಳಿಯುವಂತೆ ಮಾಡುತ್ತಿದೆ.
ಇದರಿಂದ ಕೇಂದ್ರ ಸರ್ಕಾರಕ್ಕೆ ಹೊಸ ಸವಾಲು ಎದುರಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಎಕ್ಸ್ನಲ್ಲಿ 10 ಕೋಟಿಗೂ ಅಧಿಕ ಫಾಲೋವರ್ಸ್ ಹೊಂದಿದ್ದರೂ, ಇನ್ಸ್ಟಾಗ್ರಾಂನಲ್ಲಿ ಜೆನ್-ಝೀ ಜೊತೆ ನೇರ ಸಂಪರ್ಕ ಸಾಧಿಸುವುದು ಕಷ್ಟವಾಗಿದೆ. “ಯುವಕರ ಭಾವನೆ, ಆಕಾಂಕ್ಷೆಗಳಿಗೆ ಗೌರವ ನೀಡುತ್ತೇವೆ” ಎಂದು ಮೋದಿ ಹೇಳಿದ್ದರೂ, ರೀಲ್ಸ್ ಯುಗದ ರಾಜಕೀಯಕ್ಕೆ ಹೊಂದಿಕೊಳ್ಳುವ ಒತ್ತಡ ಹೆಚ್ಚಿದೆ. ಇಷ್ಟು ದಿನ ರಾಜಕೀಯ ಚರ್ಚೆಗಳು ಮತ್ತು ಪ್ರಚಾರಗಳು ಹೆಚ್ಚಾಗಿ ಎಕ್ಸ್ ಅಥವಾ ಫೇಸ್ಬುಕ್ನಲ್ಲಿ ನಡೆಯುತ್ತಿದ್ದವು. ಆದರೆ, ಇಂದಿನ ಜೆನ್-ಝೀ ಇನ್ಸ್ಟಾಗ್ರಾಮ್ ಅನ್ನೇ ತಮ್ಮ ಅಸ್ತ್ರವನ್ನಾಗಿಸಿಕೊಂಡಿದ್ದಾರೆ.
ರಾಜಕೀಯ ವಿಶ್ಲೇಷಕರ ಪ್ರಕಾರ, 2024 ರ ಲೋಕಸಭಾ ಚುನಾವಣೆಯಲ್ಲಿ ಯುವ ಮತದಾರರು ನಿರ್ಣಾಯಕರಾಗಿದ್ದರು. ಈಗ ಇನ್ಸ್ಟಾಗ್ರಾಂ ಮೂಲಕ ಸಂಘಟಿತವಾಗುತ್ತಿರುವ ಜೆನ್-ಝೀ ಅಸಮಾಧಾನ ಮುಂದಿನ ಚುನಾವಣೆಯಲ್ಲಿ ದೊಡ್ಡ ಪರಿಣಾಮ ಬೀರಬಹುದು. ಸರ್ಕಾರ ಈಗ ಡಿಜಿಟಲ್ ಸಂವಹನ ತಂತ್ರವನ್ನು ಮರುರೂಪಿಸುವ ಅನಿವಾರ್ಯತೆಯಲ್ಲಿದೆ.
