ಬೋಗಾದಿ ರಸ್ತೆಯಲ್ಲಿ ವೈಟ್ ಟೈಪಿಂಗ್ ಕಾರ್ಯ ಮುಗಿದಿದೆ. ಅದನ್ನು ಪ್ರಾರಂಭಿಸಿದ ಸಂದರ್ಭದಲ್ಲಿ, ರಸ್ತೆಯ ಎರಡೂ ಬದಿಯಲ್ಲಿ ಮರ ಬೆಳೆಸಲು ಅವಕಾಶ ಮಾಡಿಕೊಡಬೇಕೆಂಬ ಸಲಹೆಯನ್ನು ಒಬ್ಬ ಪರಿಸರ ಪ್ರೇಮಿಯಾಗಿ ಪತ್ರಿಕೆಗಳ ಮೂಲಕ ನೀಡಿದ್ದೆ. ಅಲ್ಲದೆ ನನಗೆ ಗೊತ್ತಿದ್ದ ಕೆಲವು ವ್ಯಕ್ತಿಗಳ ಮೂಲಕವೂ ನನ್ನ ಸಲಹೆಯನ್ನು ತಿಳಿಸಿದ್ದೆ. ಆದರೆ ಸಂಬಂಧಪಟ್ಟವರು ಈ ಬಗ್ಗೆ ಯಾರೂ ಮನಸ್ಸು ಮಾಡಲೇ ಇಲ್ಲ.
ಚಿಕ್ಕ ಚಿಕ್ಕ ಹೂವಿನ ಗಿಡಗಳನ್ನು ಎರಡೂ ಬದಿಯಲ್ಲಿ ಹಾಕಿದ್ದರೆ ಈ ರಸ್ತೆ ಸುಂದರವಾಗಿ ಕಾಣುತ್ತಿತ್ತು. ನಗರದ ಪರಿಸರವಾದಿಗಳು ಈ ಬಗ್ಗೆ ಯೋಚಿಸಲಿಲ್ಲ ಹಾಗೂ ಅರಣ್ಯ ಇಲಾಖೆಯೂ ಮನಸ್ಸು ಮಾಡಲಿಲ್ಲ. ಪ್ರತಿ ಸಲ ಈ ರಸ್ತೆಯಲ್ಲಿ ಹಾದು ಹೋಗುವಾಗ, ಹಸಿರನ್ನು ನೋಡದೆ ದುಃಖವಾಗುತ್ತದೆ. ಹಾಗೆಯೇ ಮೈಸೂರು ಮಹಾರಾಜರ ದೂರ ದೃಷ್ಟಿಯು ನನ್ನ ಕಣ್ಣ ಮುಂದೆ ಹಾದು ಹೋಗುತ್ತದೆ. ನನ್ನ ಮನೆಯ ಮುಂದೆ ಸಾಧ್ಯವಾದಷ್ಟು ಗಿಡ -ಮರಗಳನ್ನು ನಾನು ಬೆಳೆಸಿದ್ದೇನೆ ಅನ್ನುವುದೇ ನನಗಿರುವ ಸಮಾಧಾನ.
-ಹೆಚ್.ಎನ್.ತ್ಯಾಗರಾಜು, ಮೈಸೂರು
