ಮೈಸೂರು | ರಾತ್ರೋ ರಾತ್ರಿ ನವ ವಿವಾಹಿತೆ ನಾಪತ್ತೆ ; ದೂರು ದಾಖಲು

ಮೈಸೂರು : ಗಂಡನ ಮನೆಯಿಂದ ನವ ವಿವಾಹಿತೆ ರಾತ್ರೋ ರಾತ್ರಿ ನಾಪತ್ತೆಯಾಗಿರುವುದಾಗಿ ಮೈಸೂರಿನ ನರಸಿಂಹರಾಜ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಬೆಲವತ್ತ ಆರ್.ಎಸ್. ನಾಯ್ಡು ನಗರ ನಿವಾಸಿ ಸುಹಾಸ್ ಅವರ ಪತ್ನಿ ಸರಸ್ವತಿ(21) ನಾಪತ್ತೆಯಾದವರು. ಪಾಂಡವಪುರ ತಾಲ್ಲೂಕಿನ ಶಿವಯ್ಯ ಎಂಬುವರ ಪುತ್ರಿ ಸರಸ್ವತಿಯನ್ನು ಕಳೆದ ಮಾ.1ರಂದು ವಿವಾಹವಾಗಿದ್ದು, ದಂಪತಿ ಅನ್ಯೋನ್ಯವಾಗಿದ್ದೆವು. ಎಂದಿನಂತೆ ಮೇ 5ರಂದು ರಾತ್ರಿ ಊಟ ಮಾಡಿ ಮಲಗಿದ್ದು, ಮಧ್ಯರಾತ್ರಿ 12 ಗಂಟೆಗೆ ಎಚ್ಚರಗೊಂಡಾಗ ಪತ್ನಿ ಇರಲಿಲ್ಲ. ಶೌಚಾಲಯಕ್ಕೆ ಹೋಗಿರಬಹುದು ಎಂದು ತಿಳಿದು ಮಲಗಿದೆ. ಮುಂಜಾನೆ 5.30ಕ್ಕೆ ಎಚ್ಚರವಾಗಿ ನೋಡಿದಾಗಲೂ ಆಕೆ ಕಾಣಿಸಲಿಲ್ಲ. ಆಕೆಯ ತವರು ಮನೆಗೆ ಕರೆ ಮಾಡಿ ವಿಚಾರಿಸಿದ್ದು, ಆಕೆ ಅಲ್ಲಿಗೂ ಹೋಗಿಲ್ಲ ಎಂದು ಸುಹಾಸ್ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.