ಧನಂಜಯ್ ನಿರ್ಮಾಣದ ‘ವಿದ್ಯಾಪತಿ’ ಚಿತ್ರದ ಚಿತ್ರೀಕರಣ ಮುಗಿದಿದ್ದು, ಸದ್ಯದಲ್ಲೇ ಬಿಡುಗಡೆಯಾಗಲಿದೆ. ಇದೀಗ ಚಿತ್ರದ ಮೊದಲ ಹಾಡು ಬಿಡುಗಡೆಯಾಗಿದ್ದು, ಈ ಹಾಡನ್ನು ಹಿರಿಯ ನಟ ಮತ್ತು ಸಂಸದ ಜಗ್ಗೇಶ್‍ ಹಾಡಿರುವುದು ವಿಶೇಷ.
‘ವಿದ್ಯಾಪತಿ’ ಚಿತ್ರದ ‘ಅಯ್ಯೋ ವಿಧಿಯೇ, ಇದೇನು ದುರ್ವಿಧಿಯೇ, ಈ ಸಂಕಟ ಮುಗಿಯಲಾರದೆ, ನಿನ್ನ ಹಣೆಬರಹ ಬದಲಾಗದೆ …’ ಎಂಬ ತಮಾಷೆಯ ಹಾಡೊಂದು ಬಿಡುಗಡೆಯಾಗಿದೆ. ನಾಯಕ ಕಷ್ಟಪಟ್ಟು ಕರಾಟೆ ಕಲಿಯುವ ಮತ್ತು ಕಲಿಯುವ ಹಂತದಲ್ಲಿ ಹಲವು ಅವಾಂತರಗಳನ್ನು ಮಾಡಿಕೊಡುವ ಹಾಡಿಗೆ ಜಗ್ಗೇಶ್‍ ಧ್ವನಿಯಾಗಿದ್ದಾರೆ. ಇನ್ನು, ರಂಗಾಯಣ ರಘು, ಕಾರ್ತಿಕ್‍ ರಾವ್ ಮುಂತಾದವರು ನಟಿಸಿದ್ದಾರೆ. ರಂಗಾಯಣ ರಘು ಈ ಹಾಡಿಗೆ ಹೆಜ್ಜೆ ಹಾಕಿರುವುದು ಹೈಲೈಟ್‍. ಈ ಹಾಡಿಗೆ ಸುಜಿತ್ ವೆಂಕಟರಾಮಯ್ಯ ಸಾಹಿತ್ಯ, ಡಾಸ್ಮೋಡ್ ಸಂಗೀತವಿದೆ. ಈ ಹಾಡಿಗೆ ಮುರಳಿ ಮಾಸ್ಟರ್‍ ನೃತ್ಯ ಸಂಯೋಜಿಸಿದ್ದಾರೆ.
‘ಟಗರು ಪಲ್ಯ’ ನಂತರ ನಾಗಭೂಷಣ್ ನಾಯಕನಾಗಿ ನಟಿಸಿರುವ ಈ ಚಿತ್ರದಲ್ಲಿ ‘ಉಪಾಧ್ಯಕ್ಷ’ನ ಬೆಡಗಿ ಮಲೈಕಾ ವಸೂಪಾಲ್ ನಾಯಕಿಯಾಗಿ ನಟಿಸಿದ್ದಾರೆ. ಈ ಹಿಂದೆ ‘ಇಕ್ಕಟ್’ ಚಿತ್ರದ ಮೂಲಕ ಭರವಸೆ ಹುಟ್ಟಿಸಿದ್ದ ಇಶಾಂ ಮತ್ತು ಹಸೀಂ ಖಾನ್, ‘’ವಿದ್ಯಾಪತಿ’ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ನಿರ್ದೇಶನದ ಜೊತೆಗೆ ಕಥೆ-ಚಿತ್ರಕಥೆ ಬರೆದು, ಸಂಕಲನದ ಜವಾಬ್ದಾರಿಯನ್ನೂ ತಾವೇ ಹೊತ್ತುಕೊಂಡಿದ್ದಾರೆ.
‘ವಿದ್ಯಾಪತಿ’ ಚಿತ್ರಕ್ಕೆ ಲವಿತ್ ಛಾಯಾಗ್ರಹಣ, ಡಾಸ್ಮೋಡ್ ಸಂಗೀತವಿದೆ.
