ಮೈಸೂರಿನ ದಸರಾ ಚಲನಚಿತ್ರೋತ್ಸವವನ್ನು ಕಳೆದ ಸುಮಾರು ೫೦ ವರ್ಷಗಳಿಂದಲೂ ನಡೆಸಿಕೊಂಡು ಬರಲಾಗುತ್ತಿದೆ. ಪ್ರೇಕ್ಷಕರ ಭಾಗವಹಿಸುವಿಕೆ ಕಡಿಮೆಯಾಗಿದೆ ಎಂಬ ಕಾರಣಕ್ಕೆ ಈ ಬಾರಿ ಚಲನಚಿತ್ರೋತ್ಸವವನ್ನು ಕೈಬಿಡಲಾಗಿದೆ ಎಂದು ಕೇಳಿಬಂದಿದೆ. ಆದರೆ, ಇದು ಸೂಕ್ತ ನಿರ್ಧಾರವಲ್ಲ ಎಂಬುದು ನನ್ನ ಅನಿಸಿಕೆ.
ನಾನು ಸುಮಾರು ೧೨ ದಸರಾ ಚಲನ ಚಿತ್ರೋತ್ಸವಗಳಲ್ಲಿ ವಿವಿಧ ರೀತಿಯಲ್ಲಿ ಭಾಗಿಯಾಗಿದ್ದೇನೆ. ಹಿಂದೆ ಚಿತ್ರಮಂದಿರಗಳಲ್ಲಿ ಕೇವಲ ಬೆಳಗಿನ ಪ್ರದರ್ಶನಗಳಿಗೆ ಸೀಮಿತವಾ ಗಿದ್ದ ಈ ಚಿತ್ರೋತ್ಸವ, ಕ್ರಮೇಣ ಒಂದು ಪೂರ್ಣ ಪ್ರಮಾಣದ ಚಲನ ಚಿತ್ರೋತ್ಸವವಾಗಿ ರೂಪುಗೊಂಡಿದೆ.
ಇದು ಒಂದೇ ದಿನದಲ್ಲಿ ಸಂಭವಿಸಿದ ಬದಲಾವಣೆಯಲ್ಲ. ಇದರ ಹಿಂದೆ ಹಲವು ವರ್ಷಗಳ ನಿರಂತರ ಪ್ರಯತ್ನ, ಯೋಜನೆ, ಅನುಭವ ಮತ್ತು ಅನೇಕ ಅಧಿಕಾರಿಗಳು ಹಾಗೂ ಸಿಬ್ಬಂದಿಯ ಪರಿಶ್ರಮವಿದೆ. ಒಂದು ಚಲನಚಿತ್ರೋತ್ಸವವನ್ನು ಆರಂಭಿಸುವುದು ಸುಲಭ. ಆದರೆ ಅದನ್ನು ವರ್ಷದಿಂದ ವರ್ಷಕ್ಕೆ ಬೆಳೆಸಿ, ಒಂದು ಪೂರ್ಣ ಪ್ರಮಾಣದ ಉತ್ಸವವಾಗಿ ರೂಪಿಸುವುದು ಸುಲಭದ ಕೆಲಸವಲ್ಲ.
ಈ ಬೆಳವಣಿಗೆಯ ಹಿಂದೆ ದುಡಿದ ಅನೇಕ ಅಧಿಕಾರಿಗಳ ಪರಿಶ್ರಮ ಮತ್ತು ಸಮಯವನ್ನು ನಾವು ಮರೆಯಬಾರದು. ಪ್ರೇಕ್ಷಕರ ಭಾಗವಹಿ ಸುವಿಕೆ ಕಡಿಮೆಯಾಗಿದೆ ಎಂಬ ಕಾರಣಕ್ಕೆ ಇಡೀ ಪ್ರಯತ್ನವನ್ನೇ ಒಂದು ಕ್ಷಣದಲ್ಲಿ ರದ್ದುಪಡಿಸುವುದು ಬೇಸರ ತರಿಸುತ್ತದೆ.
ಪ್ರೇಕ್ಷಕರ ಭಾಗವಹಿಸುವಿಕೆ ಕಡಿಮೆಯಾದರೆ, ಚಿತ್ರೋತ್ಸವವನ್ನೇ ರದ್ದುಪಡಿಸುವ ಬದಲು ಅದರ ಸ್ವರೂಪವನ್ನು ಹೇಗೆ ಬದಲಾಯಿಸಬೇಕು, ಜನರನ್ನು ಹೇಗೆ ಹೆಚ್ಚು ಸೆಳೆಯಬೇಕು, ಹೊಸ ಪ್ರೇಕ್ಷಕರನ್ನು ಹೇಗೆ ರೂಪಿಸಬೇಕು ಎಂಬುದರ ಬಗ್ಗೆ ಯೋಚಿಸುವುದು ಹೆಚ್ಚು ಸೂಕ್ತವೆನಿಸುತ್ತದೆ. ೫೦ ವರ್ಷಗಳ ಪರಂಪರೆಯನ್ನು ಹೊಂದಿರುವ ದಸರಾ ಚಲನ ಚಿತ್ರೋತ್ಸವ ಕೇವಲ ಸಿನಿಮಾ ಪ್ರದರ್ಶನವಲ್ಲ; ಅದು ಮೈಸೂರಿನ ಸಾಂಸ್ಕೃತಿಕ ಬದುಕಿನ ಒಂದು ಭಾಗವಾಗಿದೆ. ಅದನ್ನು ಉಳಿಸುವುದರ ಜೊತೆಗೆ, ಕಾಲಕ್ಕೆ ತಕ್ಕಂತೆ ಮತ್ತಷ್ಟು ಪರಿಣಾಮಕಾರಿಯಾಗಿ ರೂಪಿಸುವ ಪ್ರಯತ್ನ ನಡೆಯಬೇಕಿದೆ.
-ಮನು, ಮೈಸೂರು
