ಓದುಗರ ಪತ್ರ: ಬಾಪುವನ್ನು ಹುಡುಕುತ್ತಾ…

ಮಸೂರ ಬದಲಿಸಿ ಬಾಪುವ ಹುಡುಕಿದೆ

ಅಂದಗೆಟ್ಟ ವುಡ್ಲ್ಯಾಂಡ್ ಶೂ,

ಹರಿದ ಜೀನ್ಸ್, ಮಾಸಿದ ಟಿ-ಶರ್ಟಿನಲಿ

ಕಸ ಆಯುತಿದ್ದನವನು ತಿರುವಿನಲಿ.

ರಚ್ಚೆ ಹಿಡಿದು ಅಳುತ್ತಿದ್ದ ಮನೆಯಂಗಳದಲಿ

ಹಕ್ಕಿಗಾಗಿ ಬೊಜ್ಜು ಬಾಯಿಯ ಕಂದನಾಗಿ!

ಕಡಲೆ ಮಾರುವ ಸ್ವಾವಲಂಬಿ ವೃದ್ಧೆಯಲ್ಲಿ,

ಸ್ವಾಭಿಮಾನವ ಬೆನ್ನಟ್ಟಿದ ಬಡ ರೈತನಲಿ,

ಕರ್ಮ ನೆಚ್ಚಿ ಗೂಡು ನೇಯುವ ಹಕ್ಕಿಗಳಲ್ಲಿ,

ಸಿಡಿದೆದ್ದ ಜೆನ್‌ಝೀಜೇನುಗಳ ಝೇಂಕಾರದಲ್ಲಿ

ಗಾಂಧಿಯನ್ನು ಕಂಡ ಸಡಗರವೆನ್ನದಾಯಿತು.

ಜನುಮದಿನದ ಶುಭಾಶಯಗಳು, ಬಾಪು!

ನಿನ್ನ ಹೆಸರು ಹೇಳುತ್ತಾ ಗೆದ್ದವರವರು,

ನಿನ್ನ ದಾರಿಯನ್ನಗಲಿ ಸೋತವರು ನಾವು.

ಸತ್ಯಕ್ಕೆ ನಿನ್ನ ಹೆಸರನೇ ಇಟ್ಟರೂ,

ಸುಳ್ಳಿಗೇ ಪಟ್ಟಾಭಿಷೇಕ ಮಾಡಿದರು.

ಅಳುತ್ತಿರಬಹುದೇನೋ ನಿನ್ನಾತ್ಮವಿಂದು,

‘ನಾ ಕಂಡ ಕನಸು ಇದುವೇ?’ ಎಂದು.

ಪತ್ರಿಕೆ, ದಿನದರ್ಶಿಕೆಗಳಲ್ಲಿ,

ನೋಟು, ಪಠ್ಯ, ಬರಹ, ಚಿತ್ರಗಳಲ್ಲಿ,

ಮೈಕಾಸುರರ ಭಾಷಣಗಳಲ್ಲಿ,

ವೃತ್ತ, ಬೀದಿ, ಪ್ರತಿಮೆಗಳ ನಾಮಗಳಲ್ಲಿ –

ನೀನಿದ್ದೂ ಇಲ್ಲದಂತಿರುವೆ ಅಲ್ಲೂ,

ನಿನ್ನೆದೆಗೆ ಗುಂಡಿಟ್ಟ ಗೋಡ್ಸೆಗಳೇ ಎಲ್ಲೂ!

ಬಾಪು, ನಿನ್ನ ಚರಕವು ನೂತಿದ್ದು ನೂಲನ್ನಲ್ಲ

ಜನತಾತ್ಮಾಭಿಮಾನ, ಸ್ವಾವಲಂಬನೆಯನ್ನ.

ಅದರಾತ್ಮವಿಂದು ನೇಯ್ಗೆ ತಪ್ಪಿ ಹರಿದು ಹೋಗಿದೆ,

ಮರು ಜೋಡಿಸಲು ನಿನ್ನಂತ ನೇಕಾರನಿಲ್ಲದೆ,

ನೀ ಬಯಸದ ಹಾರ ತುರಾಯಿಗಳ ಮಜ ಮಾತ್ರ

ಜಮಾ ಆಗುತ್ತಿದೆ ನಿನ್ನ ಖಾತೆಗೆ ನಿನ್ನ ಈ ಮಣ್ಣಿನಲ್ಲಿ.

ನಿನ್ನೊಡನೆ ನಡೆದ ಚಪ್ಪಲಿ ಮತ್ತು ಆ ಊರುಗೋಲು

ಅಗೋ ಇಂದಿಗೂ ಇವೆ ಗಾಜಿನ ಕೋಣೆಯಲಿ

ನಡೆದ ಹಾದಿ ಮಾತ್ರ ಕಳೆ ತುಂಬಿ ಕಾಣೆಯಾಗಿದೆ

ನೆಚ್ಚಿದ್ದ ಖಾದಿಯೂ ಟೋಪಿಯೂ ಪರವಶವಾಗಿದೆ

ನೀ ರೂಪಿಸಿದ ದೀವಟಿಗೆಯ ಬೆಳದಿಂಗಳಲ್ಲಿ

ವಿಶ್ವವೇ ಪ್ರಕಾಶಿಸುತ್ತಿದೆ ನಮ್ಮ ಬಿಟ್ಟು!

ಮಗುವೊಂದು ನಿರ್ಭಯವಾಗಿ ನುಡಿಯುವ ಬೆಳಗು,

ನೀರೆ ನಡೆದಲ್ಲಿ ನಲುಗಿಸದ ನಡು ಇರುಳು

ಬಯಸಿದ್ದೆ ನೀನು ಈ ತೆರದಿ ಬಂಧಮುಕ್ತಿ

ನನ್ನ ಹುಡುಕಾಟವಿದೆ ಮೋಹನದಾಸನಿಗಾಗಿ.

ಕೀರ್ತಿ ಸಾರುವ ಕಲ್ಲುಗಳ ಸ್ಥಾವರಗಳಲ್ಲಲ್ಲ,

ಜಂಗುಳಿಯಲಿ ಹರಿಯುವ ಜಂಗಮತೆಯಲ್ಲಿ

– ಒಡನಾಡಿ ಸ್ಟ್ಯಾನ್ಲಿ