ಕರ್ನಾಟಕ ತಲಾ ಆದಾಯದಲ್ಲಿ ಭರ್ಜರಿ ಏರಿಕೆ : ದೇಶದಲ್ಲೆ ಗರಿಷ್ಠ ! ಎಷ್ಟಿದೆ ಆದಾಯ ?

ಹೊಸದಿಲ್ಲಿ : ಮಾಹಿತಿ ಮತ್ತು ತಂತ್ರಜ್ಞಾನದ ಮೂಲಕ ವಿಶ್ವದ ಗಮನ ಸೆಳೆದಿರುವ ಕರ್ನಾಟಕ ಇಡೀ ದೇಶದಲ್ಲಿಯೇ ಅತಿ ಹೆಚ್ಚು ತಲಾ ಅದಾಯ ಹೊಂದಿರುವ ರಾಜ್ಯವಾಗಿ ಹೊರಹೊಮ್ಮಿದೆ.

ಹಣಕಾಸು ಸಚಿವಾಲಯ ಲೋಕಸಭೆಯಲ್ಲಿ ಮಂಡಿಸಿದ ಅಂಕಿ-ಅಂಶಗಳ ಪ್ರಕಾರ, 2024–25ನೇ ಸಾಲಿನಲ್ಲಿ ಕರ್ನಾಟಕ ದೇಶದಲ್ಲೇ ಅತಿ ಹೆಚ್ಚು ತಲಾ ಆದಾಯ ಹೊಂದಿರುವ ರಾಜ್ಯವಾಗಿ ಹೊರಹೊಮ್ಮಿದೆ.

ರಾಜ್ಯದಲ್ಲಿ ತಲಾದಾಯ ಪ್ರಮಾಣ 2 ಲಕ್ಷ ರೂ.ಗಳನ್ನು ದಾಟಿದೆ. ಕಳೆದ ದಶಕದಲ್ಲಿ ಕರ್ನಾಟಕದ ಆದಾಯ ಬಹುತೇಕ ದ್ವಿಗುಣಗೊಂಡಿದೆ, ಇದು ಹೆಚ್ಚಿನ ಪ್ರಮುಖ ರಾಜ್ಯಗಳಿಗಿಂತ ಗಮನಾರ್ಹ ಸಾಧನೆಯಾಗಿದೆ.

ಆರ್ಥಿಕ ಅಭಿವೃದ್ಧಿ, ವಲಯ ಚಲನಶೀಲತೆ, ರಚನಾತ್ಮಕ ಅಂತರಗಳು ಮತ್ತು ಆಡಳಿತದ ಗುಣಮಟ್ಟದಲ್ಲಿನ ವ್ಯತ್ಯಾಸಗಳು ಅಸಮಾನ ಬೆಳವಣಿಗೆಗೆ ಕಾರಣವೆಂದು ಸಚಿವಾಲಯ ಹೇಳಿದೆ.

ಸಬ್ಕಾ ಸಾಥ್, ಸಬ್ಕಾ ವಿಕಾಸ್” ನಂತಹ ಉಪಕ್ರಮಗಳು ಮತ್ತು ಬಡತನ ನಿವಾರಣೆ, ಆದಾಯ ಉತ್ಪಾದನೆ ಮತ್ತು ಸಾಮಾಜಿಕ ಸಮಾನತೆಯನ್ನು ಗುರಿಯಾಗಿರಿಸಿಕೊಂಡ ಯೋಜನೆಗಳ ಮೂಲಕ ಸಮಗ್ರ ಬೆಳವಣಿಗೆಗೆ ಸರ್ಕಾರ ತನ್ನ ಬದ್ಧತೆಯನ್ನು ಪುನರುಚ್ಚರಿಸಿದ.

2014–15ರಲ್ಲಿ ಕರ್ನಾಟಕದ ತಲಾ ಆದಾಯ 1,05,697 ರೂ. ಇತ್ತು. ಇದೀಗ 10 ವರ್ಷಗಳಲ್ಲಿ ಇದು ಶೇ. 93.6ರಷ್ಟು ಏರಿಕೆ ಕಂಡಿದ್ದು, 2,04,605 ಕ್ಕೆ ತಲುಪಿದೆ. ಹೋಲಿಕೆಗೆ, ದೇಶದ ಸರಾಸರಿ ತಲಾ ಆದಾಯ 1,14,710 ರೂ. ಇದೆ. ದಶಕದ ಹಿಂದೆ ಇದು 72,805 ರೂ. ಇತ್ತು.

ಈ ಮೂಲಕ ಶೇ. 57.6ರಷ್ಟು ಬೆಳವಣಿಗೆ ದಾಖಲಾಗಿದೆ. ಒಟ್ಟಾರೆ ದೇಶದಲ್ಲಿ ತಲಾ ಆದಾಯದಲ್ಲಿ ಉತ್ತಮ ಏರಿಕೆ ದಾಖಲಾಗಿದ್ದರೂ, ಇದು ರಾಜ್ಯಗಳಿಂದ ರಾಜ್ಯಗಳಿಗೆ ಭಿನ್ನವಾಗಿದೆ. ಎಲ್ಲಾ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಿಗೆ ಹೋಲಿಸಿದರೆ ಕರ್ನಾಟಕ ಮೊದಲ ಸ್ಥಾನದಲ್ಲಿದ್ದು, ಎರಡನೇ ಸ್ಥಾನದಲ್ಲಿ ತಮಿಳುನಾಡು ಇದೆ.

ರಾಷ್ಟ್ರೀಯವಾಗಿ, ಭಾರತದ ತಲಾ ನಿವ್ವಳ ರಾಷ್ಟ್ರೀಯ ಆದಾಯ (ಎನ್‌ಎನ್‌ಐ) ರೂ. 1,14,710 ರಷ್ಟಿದ್ದು, ದಶಕದ ಹಿಂದೆ ರೂ. 72,805 ರಿಂದ ಶೇ. 57.6 ರಷ್ಟು ಹೆಚ್ಚಾಗಿದೆ. ಇದು ಆದಾಯದಲ್ಲಿ ವ್ಯಾಪಕವಾದ ಏರಿಕೆಯ ಪ್ರವೃತ್ತಿಯನ್ನು ತೋರಿಸುತ್ತಿದ್ದರೂ, ಹೆಚ್ಚಳವು ರಾಜ್ಯಗಳಲ್ಲಿ ಗಮನಾರ್ಹವಾಗಿ ಬದಲಾಗಿದೆ ಎಂದು ಹೇಳಲಾಗಿದೆ.

2024–25ರ ಅವಧಿಯಲ್ಲಿ ಕರ್ನಾಟಕದ ತಲಾ ಆದಾಯ ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಅತ್ಯಧಿಕವಾಗಿದೆ, 1,96,309 ರೂಪಾಯಿಗಳೊಂದಿಗೆ ತಮಿಳುನಾಡು ನಂತರದ ಸ್ಥಾನದಲ್ಲಿದೆ.

2023–24ರಲ್ಲಿ ರೂ. 1,91,970 ರಿಂದ 2024–25ರಲ್ಲಿ ರೂ. 2,04,605 ಕ್ಕೆ ತಲುಪಿರುವ ರಾಜ್ಯದ ತಲಾ ಆದಾಯ ಪ್ರಮಾಣ ಇತ್ತೀಚಿನ ವರ್ಷದಿಂದ ವರ್ಷಕ್ಕೆ ಬೆಳವಣಿಗೆ ಶೇ. 6.6 ರಷ್ಟಿರುವುದನ್ನು ರಾಜ್ಯದ ನಿರಂತರ ಆರ್ಥಿಕ ಆವೇಗವನ್ನು ಒತ್ತಿಹೇಳುತ್ತಿದೆ.

ದಶಕದ ಅವಧಿಯ ಬೆಳವಣಿಗೆಯ ವಿಷಯದಲ್ಲಿ, ಕರ್ನಾಟಕ ಶೇ. 93.6 ರಷ್ಟು ಏರಿಕೆಯೊಂದಿಗೆ ದೇಶದಲ್ಲಿ ಎರಡನೇ ಸ್ಥಾನದಲ್ಲಿದೆ, ಬೆಳವಣಿಗೆಯಲ್ಲಿ ಒಡಿಶಾ ನಂ.1!

ಒಟ್ಟಾರೆ ತಲಾ ಆದಾಯದಲ್ಲಿ ಕರ್ನಾಟಕ ದೇಶದಲ್ಲೇ ಮೊದಲ ಸ್ಥಾನದಲ್ಲಿ ಇದ್ದರೂ, ಶೇ. 93.6ರಷ್ಟು ಬೆಳವಣಿಗೆಯೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಒಡಿಶಾ ಅತಿ ಹೆಚ್ಚಿನ ಬೆಳವಣಿಗೆ ಸಾಧಿಸಿದೆ. ಕಳೆದೊಂದು ದಶಕದಲ್ಲಿ ಈ ರಾಜ್ಯದ ತಲಾ ಆದಾಯ ಶೇ. 96.7ರಷ್ಟು ಏರಿಕೆಯಾಗಿದೆ.

ಇನ್ನು 2023–24ರವರೆಗಿನ ಲೆಕ್ಕವನ್ನು ತೆಗೆದುಕೊಂಡರೆ, ಮಿಜೋರಾಂ ಗರಿಷ್ಠ ಶೇ. 125.4ರಷ್ಟು ಬೆಳವಣಿಗೆ ದಾಖಲಿಸಿದ್ದರೆ, ಗುಜರಾತ್ ಶೇ. 97, ಗೋವಾ ಶೇ. 89.9, ಕರ್ನಾಟಕ ಶೇ. 88.5, ತೆಲಂಗಾಣ ಶೇ. 84.3, ಮತ್ತು ಒಡಿಶಾ ಶೇ. 83.4 ನಂತರದ ಸ್ಥಾನಗಳಲ್ಲಿವೆ.

2024–25ರ ಅಂಕಿ -ಅಂಶಗಳನ್ನು ಅರುಣಾಚಲ ಪ್ರದೇಶ, ಗೋವಾ, ಗುಜರಾತ್, ಜಾರ್ಖಂಡ್, ಕೇರಳ, ಮಿಜೋರಾಂ, ನಾಗಾಲ್ಯಾಂಡ್, ಸಿಕ್ಕಿಂ, ತ್ರಿಪುರ, ಉತ್ತರ ಪ್ರದೇಶ, ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು, ಚಂಡೀಗಢ, ದಿಲ್ಲಿ, ಲಡಾಖ್ ಸೇರಿದಂತೆ ಹಲವಾರು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಸಲ್ಲಿಕೆ ಮಾಡಿಲ್ಲ. ಹೀಗಾಗಿ ಇವುಗಳ ಇತ್ತೀಚಿನ ದತ್ತಾಂಶಗಳು ಲಭ್ಯವಿಲ್ಲ ಎಂದು ಸರಕಾರ ಹೇಳಿದೆ.

ಕರ್ನಾಟಕ ಮತ್ತು ಕೆಲವು ರಾಜ್ಯಗಳ ತಲಾ ಆದಾಯದಲ್ಲಿ ಭಾರೀ ಏರಿಕೆಯಾಗಿದ್ದರೆ, ಕೆಲವು ರಾಜ್ಯಗಳು ಕಳಪೆ ಸಾಧನೆ ತೋರಿವೆ. ಪಂಜಾಬ್ ಜನರ ತಲಾ ಆದಾಯ ದಶಕದಲ್ಲಿ ಶೇ. 41.3ರಷ್ಟು ಮಾತ್ರ ಹೆಚ್ಚಳವಾಗಿದ್ದರೆ, ಉತ್ತರಾಖಂಡ್‌ನ ತಲಾ ಆದಾಯ ಶೇ. 33.5 ಮತ್ತು ಪುದುಚೇರಿ ತಲಾ ಆದಾಯ ಶೇ. 32.8ರಷ್ಟು ಏರಿಕೆಯಾಗಿದೆ.