ಸಂಸತ್ತು ಜನತೆಗೆ ಸೇರಿದ್ದು; ಸಂಸದರ ಖಾಸಗಿ ಸ್ವತ್ತಲ್ಲ….

 

   ಜನತಂತ್ರದ ವ್ಯವಸ್ಥೆ ದಾಳಿಗೆ ಗುರಿಯಾಗಿದೆ ಎಂಬ ರಾಹುಲ್ ಗಾಂಧಿ ಹೇಳಿಕೆಯನ್ನು ದೇಶದ್ರೋಹದ ಟೀಕೆ ಎಂದು ಗದ್ದಲ ಎಬ್ಬಿಸಿದೆ ಬಿಜೆಪಿ.

ತಮ್ಮ ವಿದೇಶ ಪ್ರವಾಸದಲ್ಲಿ ರಾಹುಲ್ ಮಾಡಿರುವ ಈ ಆಪಾದನೆ ದೇಶದ ವರ್ಚಸ್ಸಿಗೆ ಧಕ್ಕೆ ತಂದಿದೆ ಎಂದು ಕ್ಷಮೆ ಕೇಳುವಂತೆ ಪಟ್ಟು ಹಿಡಿದಿದೆ. ಕಳೆದ ಐದು ದಿನಗಳಿಂದ ಸಂಸತ್ತಿನ ಕಾರ್ಯಕಲಾಪ ನಡೆಯಲು ಬಿಡುತ್ತಿಲ್ಲ.

ಇಷ್ಟಕ್ಕೂ ರಾಹುಲ್ ಗಾಂಧಿ ಆಡಬಾರದ್ದೇನನ್ನೂ ಆಡಿಲ್ಲ. ಭಾರತದಲ್ಲಿ ಜನತಂತ್ರವನ್ನು ದುರ್ಬಲಗೊಳಿಸಲಾಗುತ್ತಿದೆ ಎಂದಿದ್ದಾರೆ. ಒಕ್ಕೂಟ ಸರ್ಕಾರದ ಕಳೆದ ಏಳೆಂಟು ವರ್ಷಗಳ ಕಾರ್ಯವೈಖರಿ ಜನತಂತ್ರವನ್ನು ದುರ್ಬಲಗೊಳಿಸಿದೆಯೇ ವಿನಾ ಮಜಬೂತು ಮಾಡಿಲ್ಲ. ಈ ಮಾತಿಗೆ ಹತ್ತು ಹಲವು ಪುರಾವೆಗಳಿವೆ. ಅಂತಾರಾಷ್ಟ್ರೀಯ ಚುನಾವಣಾ ಜನತಂತ್ರ ಸೂಚ್ಯಂಕದಲ್ಲಿ ಭಾರತ ಸತತವಾಗಿ ಕೆಳಕ್ಕೆ ಜಾರುತ್ತಿದೆ. ತಾಂಜಾನಿಯಾ, ಬೊಲಿವಿಯಾ, ಸಿಂಗಪುರ, ನೈಜೀರಿಯಾಕ್ಕಿಂತ ಅಧ್ವಾನ!

2015ರಲ್ಲಿ ನರೇಂದ್ರ ಮೋದಿ ಚೀನಾಕ್ಕೆ ಹೋಗಿದ್ದರು. ಅಲ್ಲಿ ಅವರು ಆಡಿ ಬಂದಿರುವ ಮಾತುಗಳನ್ನು ರಾಹುಲ್ ಮಾತುಗಳೊಂದಿಗೆ ಹೋಲಿಸಿ ನೋಡಬೇಕಿದೆ.

‘ಛೋಡೋ ಯಾರ್, ದುಖ್ ಗಯೇ, ಕುಚ್ ಹೋಗಾ ನಹೀ, ಅರೇ ಭಗವಾನ್ ಬಚಾಯೇ, ಪತಾ ನಹೀ ಪಿಛಲೇ ಜನಮ್ ಮೇಂ ಕ್ಯಾ ಪಾಪ್ ಕಿಯಾ, ಹಮ್ ಹಿಂದುಸ್ತಾನ್ ಮೇಂ ಪೈದಾ ಹುಯೇ’ (ಬಿಟ್ ಬಿಡು ಮಾರಾಯಾ, ಏನೂ ಸಾಧನೆ ಆಗಲ್ಲ ಇಲ್ಲಿ, ದೇವರೇ ಕಾಪಾಡಬೇಕು ಹಿಂದಿನ ಜನ್ಮದಲ್ಲಿ ಅದ್ಯಾವ ಪಾಪ ಮಾಡಿದ್ದೆವೋ ಗೊತ್ತಿಲ್ಲ, ನಾವು ಹಿಂದುಸ್ತಾನದಲ್ಲಿ ಹುಟ್ಟಿಬಿಟ್ಟೆವು). ಹಿಂದಿನ ಜನ್ಮದಲ್ಲಿ ಪಾಪ ಮಾಡಿದ್ದಕ್ಕೇ ಹಿಂದುಸ್ತಾನದಲ್ಲಿ ಹುಟ್ಟಿದೆವು ಎಂಬ ಮಾತು ಒಂದು ವೇಳೆ ರಾಹುಲ್ ಬಾಯಿಂದ ಉದುರಿದ್ದರೆ ಬಿಜೆಪಿ ಅದೆಂತಹ ಪ್ರಳಯ ಸೃಷ್ಟಿಸುತ್ತಿತ್ತೋ ಊಹಿಸಲೂ ಅಸಾಧ್ಯ.

ಸಾಧಾರಣವಾಗಿ ಪ್ರತಿಪಕ್ಷಗಳು ಸದನವನ್ನು ಸ್ಥಗಿತಗೊಳಿಸುತ್ತವೆ ಮತ್ತು ಆಡಳಿತ ಪಕ್ಷ ಸಂಧಾನ ನಡೆಸಿ ಕಲಾಪಗಳು ಪುನಃ ನಡೆಯುವಂತೆ ಮಾಡುತ್ತದೆ. ಆದರೆ ಈ ಬಾರಿ ಸಂಸತ್ತಿನ ಕಾರ್ಯಕಲಾಪಗಳಿಗೆ ಆಡಳಿತ ಪಕ್ಷವೇ ಅಡ್ಡಿ ಉಂಟು ಮಾಡಿದೆ. ಸಂಸದೀಯ ವ್ಯವಸ್ಥೆಯ ವಿಡಂಬನೆಯಿದು. ಅದಾನಿ ಮತ್ತು ಮೋದಿಯವರ ಮೇಲಿನ ದಾಳಿಯನ್ನು ತಡೆಯಲು ಪೂರ್ವಯೋಜಿತ ಪ್ರತಿದಾಳಿ. ದೇಶದ್ರೋಹದ ಆಪಾದನೆಯನ್ನು ಶುಕ್ರವಾರ ಮತ್ತೊಂದು ಹೆಜ್ಜೆ ಮುಂದೆ ಒಯ್ದಿದೆ. ಭಾರತದ ಸಾರ್ವಭೌಮತೆಯ ಮೇಲೆ ನಡೆಸಿದ ದಾಳಿ ಎಂದು ಬಣ್ಣಿಸಿರುವುದೇ ಈ ಮಾತಿಗೆ ಸಾಕ್ಷಿ.

ಅದಾನಿ ಹಗರಣವನ್ನು ಸಂಸತ್ತಿನ ಜಂಟಿ ಸದನ ಸಮಿತಿಯ ತನಿಖೆಗೆ ಒಪ್ಪಿಸಬೇಕೆಂಬುದು ಪ್ರತಿಪಕ್ಷಗಳ ಆಗ್ರಹ. ಪಟ್ಟು ಸಡಿಲಿಸುವ ಪ್ರಶ್ನೆಯೇ ಇಲ್ಲವೆಂದು ಸಾರಿವೆ. ಈ ದಾಳಿಯನ್ನು ಹಿಮ್ಮೆಟ್ಟಿಸಲು ಬಿಜೆಪಿ ಹೂಡಿರುವ ಪ್ರತಿತಂತ್ರವೇ ರಾಹುಲ್ ಕ್ಷಮಾಯಾಚನೆ.

ರಾಹುಲ್ ಗಾಂಧಿ ಆಡುವ ಪ್ರತಿ ಮಾತನ್ನೂ ಪ್ರತಿಭಟಿಸಿ ಹುಸಿ ಅಲ್ಲೋಲ ಕಲ್ಲೋಲ ಎಬ್ಬಿಸುವುದು ಬಿಜೆಪಿಯ ರಣನೀತಿ. ಕಾಂಗ್ರೆಸ್ ಪಕ್ಷದ ಈ ನಾಯಕನನ್ನು ‘ಪಪ್ಪೂ’ ಎಂದು ಕರೆದು ಬೆಪ್ಪು ತಕ್ಕಡಿಯಂತೆ ಬಿಂಬಿಸುವ ಯೋಜನಾಬದ್ಧ ಸಮರವನ್ನೇ ಸಾರಲಾಗಿತ್ತು. ಈ ಸಮರದಲ್ಲಿ ಸಾಕಷ್ಟು ಯಶಸ್ಸೂ ಸಿಕ್ಕಿತ್ತು ಬಿಜೆಪಿಗೆ. ಆದರೆ ರಾಹುಲ್ ಬೆಪ್ಪು ತಕ್ಕಡಿ ಅಲ್ಲವೆಂದು ಜನಸಾಮಾನ್ಯರಿಗೆ ಮನವರಿಕೆ ಮಾಡಿಸಿತು ಭಾರತ್ ಜೋಡೊ ಯಾತ್ರಾ.

ಅದಾನಿ ಹಗರಣ ಕುರಿತು ರಾಹುಲ್ ಇತ್ತೀಚೆಗೆ ಲೋಕಸಭೆಯಲ್ಲಿ ಹತ್ತಾರು ಪ್ರಶ್ನೆಗಳನ್ನು ಎತ್ತಿದ್ದರು. ಮೋದಿಯವರು ೭೮ ನಿಮಿಷಗಳ ಕಾಲ ಸುದೀರ್ಘ ಉತ್ತರ ನೀಡಿದರು. ಅದಾನಿ ಕುರಿತ ಒಂದೇ ಪದವೂ ಅವರಿಂದ ಹೊರಬೀಳಲಿಲ್ಲ. ಕೇವಲ ತಮ್ಮ ಸರ್ಕಾರದ ಸಾಧನೆಗಳ ಪಟ್ಟಿ ಮಾಡಿದರು ಮತ್ತು ಪ್ರತಿಪಕ್ಷಗಳಿಗೆ ಬುದ್ಧಿವಾದ ಹೇಳಿದರು.

ಸಂಸತ್ತು ಮತ್ತು ಶಾಸನಸಭೆಗಳ ಕೆಲಸಕಾರ್ಯಗಳನ್ನು ಸ್ಥಗಿತಗೊಳಿಸುವುದು ಜನತಂತ್ರವನ್ನು ಬುಡಮೇಲುಗೊಳಿಸುವ ಮತ್ತು ಜನದ್ರೋಹದ ಕೃತ್ಯ ಎಂಬ ಮಾತನ್ನು ಮೂರೂವರೆ ವರ್ಷಗಳ ಹಿಂದೆ ಆಡಿದ್ದವರು ಎಂ.ವೆಂಕಯ್ಯನಾಯ್ಡು. ಬಿಜೆಪಿಯ ಅಧ್ಯಕ್ಷರೂ, ಉಪರಾಷ್ಟ್ರಪತಿ–ರಾಜ್ಯಸಭೆಯ ಸಭಾಪತಿಯೂ ಆಗಿದ್ದವರು.

ಜನತೆಯನ್ನು ಬಾಧಿಸುವ ವಿಷಯಗಳ ಕುರಿತ ಚರ್ಚೆಗಳು ಸಲೀಸಾಗಿ ಸಾಗಲು ಸದನವನ್ನು ಸುಗಮವಾಗಿ ನಡೆಸುವ ಜವಾಬ್ದಾರಿ ಆಡಳಿತ ಪಕ್ಷದ್ದು.

ಸಂಸತ್ತು ಜನತೆಗೆ ಸೇರಿದ್ದೇ ವಿನಾ ಸಂಸದರ ಆಸ್ತಿಯಲ್ಲ. ಸಂಸದರು ಜನತೆ ಮತ್ತು ಸದನಕ್ಕೆ ಜವಾಬ್ದಾರರಾಗಿರಬೇಕು. ಜನತೆ ಮತ್ತು ಸರ್ಕಾರದ ನಡುವಣ ಸಂಪರ್ಕ ಸೇತುವೆಯಾಗಿ ಕೆಲಸ ಮಾಡಬೇಕು ಸಂಸತ್ತು. ಹತ್ತು ವರ್ಷಗಳ ಹಿಂದೆ 2012ರಲ್ಲಿ ಹಾಕಿದ್ದ ಲೆಕ್ಕಾಚಾರವೊಂದರ ಪ್ರಕಾರ ಸಂಸತ್ತಿನ ಪ್ರತಿ ನಿಮಿಷದ ಕಲಾಪದ ವೆಚ್ಚ ಎರಡೂವರೆ ಲಕ್ಷ ರೂಪಾಯಿ. ಸಂಸತ್ತು ವರ್ಷದಲ್ಲಿ ಎಂಬತ್ತು ದಿನಗಳ ಕಾಲ ನಡೆಯುತ್ತದೆ. ಈ ದಿನಗಳಲ್ಲಿ ನಿತ್ಯ ಕನಿಷ್ಠ ಆರು ತಾಸುಗಳ ಕಾಲ ಉಭಯ ಸದನಗಳು ಕಲಾಪ ಜರುಗಿಸುತ್ತವೆ. ಪಾರ್ಲಿಮೆಂಟಿನ ಮೇಲೆ ವರ್ಷವೊಂದಕ್ಕೆ ಮಾಡುವ ವೆಚ್ಚವನ್ನು ಲೆಕ್ಕ ಹಾಕಿದರೆ ಸದನದ ಪ್ರತಿನಿಮಿಷದ ಕಲಾಪಕ್ಕೆ ಎರಡೂವರೆ ಲಕ್ಷ ರೂಪಾಯಿ ವೆಚ್ಚವಾಗುತ್ತಿದೆ ಎಂದು ಅಂದಿನ ಸಂಸದೀಯ ವ್ಯವಹಾರಗಳ ಮಂತ್ರಿ ಹೇಳಿದ್ದುಂಟು.

ಅನೇಕ ಸಲ ಪ್ರತಿಪಕ್ಷಗಳ ಸದಸ್ಯರು ಮಾತನ್ನು ತಡೆಯಲು ಧ್ವನಿವರ್ಧಕವನ್ನು ಬಂದ್ ಮಾಡಲಾಗುತ್ತದೆ ಎಂಬ ಅಪಾದನೆಯನ್ನೂ ರಾಹುಲ್ ಗಾಂಧಿ ವಿದೇಶ ಪ್ರವಾಸದಲ್ಲಿ ಮಾಡಿದ್ದರು. ಶುಕ್ರವಾರ ಬೆಳಿಗ್ಗೆ ಲೋಕಸಭೆಯ ನೇರ ಪ್ರಸಾರದಲ್ಲಿ ಕಂಡದ್ದು– ರಾಹುಲ್ ಅವರಿಗೆ ಮಾತಾಡಲು ಅವಕಾಶ ಕೊಡಿ, ಮಾತಾಡಲು ಅವಕಾಶ ಕೊಡಿ ಎಂಬ ಘೋಷಣೆಗಳನ್ನು ಕಾಂಗ್ರೆಸ್ ಕಡೆಯಿಂದ ಕೂಗಲಾಗುತ್ತಿತ್ತು. ಸಭಾಧ್ಯಕ್ಷ ಓಂ ಬಿರ್ಲಾ ಅವರು ನಸುನಗುತ್ತಿದ್ದರು. ತಕ್ಷಣವೇ ಇಡೀ ಸದನದ ಧ್ವನಿಯನ್ನೇ ಅದುಮಲಾಯಿತು. ಸಭಾಧ್ಯಕ್ಷರು ಪ್ರತಿಪಕ್ಷಗಳತ್ತ ತಿರುಗಿ ಏನನ್ನೋ ಹೇಳುತ್ತಿದ್ದರು. ಮೂಕಿ ಸಿನೆಮಾ ನೆನಪಾಯಿತು.

ಲೋಕತಂತ್ರದ ಮಂದಿರ ಎಂದು ಪ್ರಧಾನಿಯವರು ಸಂಸತ್ತನ್ನು ಕರೆದಿದ್ದರು. ಮೊದಲ ಸಲ ಪ್ರವೇಶಿಸುವಾಗ ಮೆಟ್ಟಿಲುಗಳಿಗೆ ಹಣೆಯೊತ್ತಿ ನಮಸ್ಕರಿಸಿದ್ದರು. ಇದೀಗ ಈ ಮಂದಿರದ ಕೊರಳನ್ನೇಕೆ ಅದುಮಲು ತೊಡಗಿದ್ದಾರೆ. ಅಂತಹ ಯಾವ ಅನಿವಾರ್ಯ ಅಸಹಾಯಕತೆ ಸಂಕಟ ಸಂದಿಗ್ಧತೆ ಅವರಿಗೆ ಎದುರಾಗಿದೆ?

ಸದನದ ಕಾರ್ಯಕಲಾಪವನ್ನು ತಾನೇ ಸ್ಥಗಿತಗೊಳಿಸುವ ಮೂಲಕ ಭಾರತೀಯ ಜನತಾ ಪಕ್ಷ ರಾಹುಲ್ ಗಾಂಧಿ ಅವರ ಆಪಾದನೆಯನ್ನು ನಿಜವಾಗಿಸಿ ಜೀವಂತ ಪುರಾವೆ ಒದಗಿಸಿದಂತೆ ಆಗುವುದಿಲ್ಲವೇ? ಸಂಸತ್ತಿನಲ್ಲಿ ಮಾತಾಡುವುದು ಸಂಸದರ ಹಕ್ಕು. ಭಾರತ ಸರ್ಕಾರದ ಅನೇಕ ಮಂತ್ರಿಗಳು ರಾಹುಲ್ ಗಾಂಧಿ ಮೇಲೆ ದೇಶದ್ರೋಹದ ಆಪಾದನೆ ಹೊರಿಸಿದ್ದಾರೆ. ಸದನದ ವೇದಿಕೆಯಲ್ಲಿ ಅದಕ್ಕೆ ಉತ್ತರ ನೀಡಲು ಆತ ಅವಕಾಶ ಕೇಳುವುದರಲ್ಲಿ ತಪ್ಪೇನಿದೆ?