ಜಾಗತಿಕ ಇಂಧನ ಬಿಕ್ಕಟು ಸೃಷ್ಟಿ : ಯುದ್ಧ ಕೊನೆಗೊಳಿಸಲು ಅಮೆರಿಕಾ ಮೇಲೆ ಒತ್ತಡ

ಟೆಹ್ರಾನ್‌ : ಅಮೆರಿಕ-ಇಸ್ರೇಲ್-ಇರಾನ್ ನಡುವಿನ ಘರ್ಷಣೆ 11ನೇ ದಿನಕ್ಕೆ ಕಾಲಿಟ್ಟಿದೆ. ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಪಡೆಗಳು ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ಸೇನಾ ನೆಲೆಗಳ ಮೇಲೆ ಬ್ಯಾಲಿಸ್ಟಿಕ್ ಕ್ಷಿಪಣಿ ಮತ್ತು ಕಾಮಿಕೇಜಿ ಡ್ರೋನ್‌ಗಳ ಮೂಲಕ ದಾಳಿ ಮುಂದುವರಿಸಿವೆ. ಹಾರ್ಮುಜ್ ಜಲಸಂಧಿಯನ್ನು ಪರಿಣಾಮಕಾರಿಯಾಗಿ ಮುಚ್ಚಿರುವುದರಿಂದ ಜಾಗತಿಕ ತೈಲ ಪೂರೈಕೆಯ 20% ಸ್ಥಗಿತಗೊಂಡಿದ್ದು, ಇಂಧನ ಬಿಕ್ಕಟ್ಟು ತೀವ್ರವಾಗುತ್ತಿದೆ.

ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ವ್ಯಾಪಕ ದಾಳಿ ಆರಂಭಿಸಿದ್ದರಿಂದ ಯುದ್ಧ ಪ್ರಾರಂಭವಾಗಿದೆ. ಇರಾನ್ ಸುಪ್ರೀಂ ಲೀಡರ್ ಅಲಿ ಖಾಮೆನಿ ಸೇರಿದಂತೆ ಹಲವು ಹಿರಿಯ ನಾಯಕರನ್ನು ಕಳೆದುಕೊಂಡಿದ್ದರೂ, ಟೆಹ್ರಾನ್ ಸರ್ಕಾರ ‘ಎಷ್ಟು ದಿನ ಬೇಕಾದರೂ ಯುದ್ಧ ಮುಂದುವರೆಸುತ್ತೇವೆ’ ಎಂದು ಘೋಷಿಸಿದೆ. IRGC ಮುಖ್ಯಸ್ಥರು “ಜಾಗತಿಕ ಆರ್ಥಿಕ ಸಂಕಷ್ಟವೇ ಈ ಯುದ್ಧವನ್ನು ಅಂತ್ಯಗೊಳಿಸುತ್ತದೆ” ಎಂದು ಹೇಳಿದ್ದಾರೆ.

ಇರಾನ್‌ನ ಡ್ರೋನ್ ಯುದ್ಧತಂತ್ರ
ಇರಾನ್ ಪ್ರತಿ ದಾಳಿಗೆ ಕೇವಲ 35,000 ಡಾಲರ್‌ಗಳಷ್ಟು ವೆಚ್ಚದ ಶಾಹೆದ್-136 ಕಾಮಿಕೇಜಿ ಡ್ರೋನ್‌ಗಳನ್ನು ಬಳಸುತ್ತಿದೆ. ಇದಕ್ಕೆ ತುತ್ತುರಿಸುವ ಅಮೆರಿಕ ಮತ್ತು ಇಸ್ರೇಲ್ ಲಕ್ಷಾಂತರ ಡಾಲರ್‌ಗಳ ಮೌಲ್ಯದ ಕ್ಷಿಪಣಿಗಳನ್ನು ಹಾರಿಸುತ್ತಿವೆ. ಇರಾನ್ ಡ್ರೋನ್ ದಾಳಿಗಳನ್ನು ತಡೆಯಲು ಅಸಮರ್ಥವಾದ ಅಮೆರಿಕವು ಉಕ್ರೇನ್‌ನಿಂದ ವಿಶೇಷ ನೆರವು ಕೋರಿದೆ ಎಂದು ವರದಿಗಳು ಹೇಳಿವೆ.. IRGC ಪಡೆಗಳು ಇರಾಕ್, ಕುವೈತ್, ಬಹ್ರೇನ್, ಯುಎಇ ಸೇರಿದಂತೆ ಗಲ್ಫ್ ರಾಷ್ಟ್ರಗಳಲ್ಲಿನ ಅಮೆರಿಕದ ನೆಲೆಗಳ ಮೇಲೆ ನೂರಾರು ಡ್ರೋನ್ ಮತ್ತು ಕ್ಷಿಪಣಿ ದಾಳಿ ನಡೆಸಿವೆ.

ಹಾರ್ಮುಜ್ ಜಲಸಂಧಿ ಸಂಕಷ್ಟ
ವಿಶ್ವದ ಒಟ್ಟು ತೈಲ ಪೂರೈಕೆಯ ಸುಮಾರು 20% ಹಾರ್ಮುಜ್ ಜಲಸಂಧಿ ಮೂಲಕ ಸಾಗುತ್ತದೆ. ಇರಾನ್ ಈ ಮಾರ್ಗವನ್ನು ಪರಿಣಾಮಕಾರಿಯಾಗಿ ಮುಚ್ಚಿರುವುದರಿಂದ ಸೌದಿ ಅರೇಬಿಯಾ, ಯುಎಇ, ಇರಾಕ್, ಕುವೈತ್ ಸೇರಿದಂತೆ ಗಲ್ಫ್ ದೇಶಗಳ ತೈಲ ರಫ್ತು ಸ್ಥಗಿತಗೊಂಡಿದೆ. ಮರೈನ್ ಟ್ರಾಫಿಕ್ ಡೇಟಾ ಪ್ರಕಾರ 700ಕ್ಕೂ ಹೆಚ್ಚು ತೈಲ ಹಡಗುಗಳು ಜಲಸಂಧಿಯ ಎರಡೂ ಬದಿಗಳಲ್ಲಿ ಸಾಲುಗಟ್ಟಿ ನಿಂತಿವೆ. ವಿಮೆ ಕಂಪನಿಗಳು ಯುದ್ಧ ರಿಸ್ಕ್ ಕವರ್ ರದ್ದುಗೊಳಿಸಿರುವುದರಿಂದ ಹಡಗುಗಳ ಸಂಚಾರ ಶೂನ್ಯಕ್ಕಿಳಿದಿದೆ.

ಇರಾನ್ ಸರ್ಕಾರ “ಜಲಸಂಧಿ ಪೂರ್ಣವಾಗಿ ಮುಚ್ಚಿಲ್ಲ, ಆದರೆ ಅಮೆರಿಕ ಮತ್ತು ಇಸ್ರೇಲ್‌ಗೆ ಸಂಬಂಧಿಸಿದ ಹಡಗುಗಳಿಗೆ ಅನುಮತಿ ಇಲ್ಲ” ಎಂದು ಸ್ಪಷ್ಟಪಡಿಸಿದೆ. ಆದರೆ ಪರಿಣಾಮವಾಗಿ ಜಾಗತಿಕ ತೈಲ ಬೆಲೆಗಳು ಶೇ.10ಕ್ಕೂ ಹೆಚ್ಚು ಏರಿವೆ. ಯುರೋಪ್ ಮತ್ತು ಏಷ್ಯಾದ ಎಲ್‌ಎನ್‌ಜಿ ಬೆಲೆಗಳು ಇನ್ನಷ್ಟು ಏರಿಕೆಯಾಗಿವೆ.

ಹೆಚ್ಚಿದ ಜಾಗತಿಕ ಒತ್ತಡ
ಹಾರ್ಮುಜ್ ಸಂಕಷ್ಟದಿಂದಾಗಿ ಅಮೆರಿಕ ಮೇಲೆ ಅಂತರಾಷ್ಟ್ರೀಯ ಒತ್ತಡ ತೀವ್ರವಾಗಿದೆ. ಹಲವು ದೇಶಗಳು ತಮ್ಮ ಇಂಧನ ಬೇಡಿಕೆ ಪೂರೈಕೆಗೆ ತೊಂದರೆಯಾಗುತ್ತಿರುವುದರಿಂದ ಯುದ್ಧ ನಿಲ್ಲಿಸುವಂತೆ ಅಮೆರಿಕಕ್ಕೆ ಮನವಿ ಮಾಡುತ್ತಿವೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ “ಹಾರ್ಮುಜ್‌ನಲ್ಲಿ ತೈಲ ಸಂಚಾರ ನಿಲ್ಲಿಸಿದರೆ ಇರಾನ್‌ಗೆ 20 ಪಟ್ಟು ದೊಡ್ಡ ದಾಳಿ ನಡೆಸುತ್ತೇವೆ” ಎಂದು ಎಚ್ಚರಿಸಿದ್ದಾರೆ.

ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ತೀವ್ರ ಅಸ್ಥಿರತೆ ಉಂಟಾಗಿದ್ದು, ಏಷ್ಯಾ ದೇಶಗಳಿಗೆ ಇದು ದೊಡ್ಡ ಆಘಾತವಾಗಿದೆ. ಸೌದಿ ಅರಾಮ್ಕೊ ಸೇರಿದಂತೆ ಕಂಪನಿಗಳು ಕೆಂಪು ಸಮುದ್ರ ಮಾರ್ಗವನ್ನು ಬಳಸುವ ಪ್ರಯತ್ನ ನಡೆಸುತ್ತಿವೆ. ಆದರೆ ಹಾರ್ಮುಜ್ ಸಂಕಷ್ಟ ಮುಂದುವರಿದರೆ ತೈಲ ಬೆಲೆಗಳು 150 ಡಾಲರ್ ಪ್ರತಿ ಬ್ಯಾರೆಲ್ ತಲುಪುವ ಸಾಧ್ಯತೆ ಇದೆ ಎಂದು ವಿಶ್ಲೇಷಕರು ಎಚ್ಚರಿಸಿದ್ದಾರೆ.

ಭಾರತ ಸೇರಿದಂತೆ ಇಂಧನ ಆಮದಿಗೆ ಅವಲಂಬಿತ ದೇಶಗಳು ಈ ಬಿಕ್ಕಟ್ಟನ್ನು ನಿಕಟವಾಗಿ ಗಮನಿಸುತ್ತಿವೆ. ಪರಿಸ್ಥಿತಿ ಮತ್ತಷ್ಟು ಉಲ್ಬಣಗೊಳ್ಳದಂತೆ ಮಾತುಕತೆ ಪ್ರಯತ್ನಗಳು ತೀವ್ರಗೊಳ್ಳುತ್ತಿವೆ ಎಂದು ರಾಜಕೀಯ ವಿಶ್ಲೇಷಕರು ಹೇಳುತ್ತಿದ್ದಾರೆ.