ಚಿತ್ರಮಂದಿರಗಳಿಗೆ ವರವಾಯಿತೇ ‘ಆದಿಪುರುಷ’ನ ಆಗಮನ?

 ತೆಲುಗು ಚಿತ್ರ ‘ಬಾಹುಬಲಿ’ ಭಾರತೀಯ ಚಿತ್ರರಂಗದಲ್ಲಿ ಹೊಸ ದಾಖಲೆ ಬರೆಯಿತು. ದಕ್ಷಿಣ ಭಾರತೀಯ ಭಾಷೆಗಳ ಚಿತ್ರಗಳ ಬಗ್ಗೆ ಅಸಡ್ಡೆ ತೋರುತ್ತಿದ್ದವರ ಕಣ್ಣು ತೆರೆಸಿದ ಚಿತ್ರವೂ ಆಯಿತು. ಭಾರತೀಯ ಚಿತ್ರರಂಗ ಎಂದರೆ, ಬಾಲಿವುಡ್ ಯಾ ಹಿಂದಿ ಚಿತ್ರರಂಗ ಎಂದೇ ಬಿಂಬಿಸುತ್ತಿದ್ದ ಮಂದಿಗೆ ಹಾಗಲ್ಲ’ ಎಂದು ಹೇಳುವುದೂ ಆಯಿತು. ಅದರ ಬೆನ್ನಲ್ಲೇ ಬಂದ ಕನ್ನಡದ ‘ಕೆಜಿಎಫ್’ಗಳು, ‘ಕಾಂತಾರ’ ಭಾರತೀಯ ಮುಖ್ಯವಾಹಿನಿ ಚಿತ್ರ ಕ್ಷೇತ್ರದಲ್ಲಿ ಹೊಸ ಭಾಷ್ಯ ಬರೆದವು. ಇದೀಗ ‘ಆದಿಪುರುಷ್’.

ತೆಲುಗು ನಟ ಪ್ರಭಾಸ್ ಮುಖ್ಯಭೂಮಿಕೆಯ ಈ ಚಿತ್ರ ಗಲ್ಲಾಪೆಟ್ಟಿಗೆಯಲ್ಲಿ ಹೊಸ ದಾಖಲೆ ಬರೆಯುವ ನಿರೀಕ್ಷೆ ಇದೆ. ಕರ್ನಾಟಕದಲ್ಲಿ ಇಲ್ಲಿಯವರೆಗೆ ಆಗದಷ್ಟು ಚಿತ್ರಮಂದಿರಗಳಲ್ಲಿ ಇದರ ಬಿಡುಗಡೆ ಆಗುತ್ತಿದೆ. ಕನ್ನಡ ಚಿತ್ರಗಳಿಗೆ ಚಿತ್ರಮಂದಿರಗಳಿಲ್ಲದ ಆತಂಕಕ್ಕಿಂತ ಹೆಚ್ಚಾಗಿ ಚಿತ್ರೋದ್ಯಮದ ಇನ್ನೊಂದು ಮುಖದ ಪರಿಚಯ ಇದರ ಜೊತೆಗೆ ಆಗುತ್ತಿದೆ.

ಸುಮಾರು ನೂರರಿಂದ ನೂರೈವತ್ತು ಏಕಪರದೆಯ ಚಿತ್ರಮಂದಿರಗಳು, ಚಿತ್ರಗಳಿಲ್ಲದೆ ಮುಚ್ಚಿರುವ ವಿಷಯ ಬಹಳಷ್ಟು ಮಂದಿಗೆ ತಿಳಿದಿಲ್ಲ. ಈ ಚಿತ್ರಮಂದಿರಗಳು ಜನಪ್ರಿಯ ನಟರ ಚಿತ್ರಗಳ ಬಿಡುಗಡೆಗೆ ಕಾದಿರುತ್ತವೆ. ಇದು ಏಕಪರದೆಯ ಚಿತ್ರಮಂದಿರಗಳಿಗೆ ಮಾತ್ರವಲ್ಲ, ಮಲ್ಟಿಪ್ಲೆಕ್ಸ್‌ಗಳಿಗೂ ಅನ್ವಯವಾಗುತ್ತದೆ ಎನ್ನುತ್ತಾರೆ ಕಳೆದ ಮೂರು ದಶಕಗಳಿಂದ ಕನ್ನಡ ಚಿತ್ರಗಳ ವಿತರಕರಾಗಿರುವ ಮಾರ್ಸ್ ಹಂಚಿಕಾ ಸಂಸ್ಥೆಯ ಸುರೇಶ್ ಅವರು. ಕನ್ನಡದ ಸದಭಿರುಚಿಯ ಚಿತ್ರಗಳು, ಕಡಿಮೆ ನಿರ್ಮಾಣ ವೆಚ್ಚದ ಚಿತ್ರಗಳ ನಿರ್ಮಾಪಕರ ಪಾಲಿಗೆ ಆಪ್ತ ವಿತರಕರು. ಸಾಕಷ್ಟು ಚಿತ್ರಗಳನ್ನು ಅವರು ಹಂಚಿಕೆ ಮಾಡಿದ್ದಾರೆ. ಚಿತ್ರಮಂದಿರಗಳನ್ನು ನಡೆಸಿದ ಅನುಭವವೂ ಅವರಿಗಿದೆ.

‘ಆದಿಪುರುಷ್’ ಚಿತ್ರ ಬಿಡುಗಡೆ ಆಗುತ್ತಿರುವುದರಿಂದ ಸಾಕಷ್ಟು ಮುಚ್ಚಿರುವ ಚಿತ್ರಮಂದಿರಗಳು ತೆರೆದಿವೆ. ಬಹುಪರದೆಯ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಈ ಹಿಂದೆ ಎಲ್ಲ ಪರದೆಗಳಲ್ಲೂ ಪ್ರದರ್ಶನ ಇರುತ್ತಿರಲಿಲ್ಲ. ಎಂಟು ಹತ್ತು ಪರದೆಗಳಿದ್ದರೆ, ಅವುಗಳಲ್ಲಿ ಬೇಡಿಕೆಗೆ ಅನುಗುಣವಾಗಿ ಪ್ರದರ್ಶನ ಇರುತ್ತಿತ್ತು. ಇಂತಹ ಚಿತ್ರಗಳು ಬಂದಾಗ ಸಾಕಷ್ಟು ಪ್ರದರ್ಶಕರು ಅತ್ತ ಹೋಗುತ್ತಾರೆ ಎನ್ನುವುದು ಅವರ ಮಾತು.

ತಾಂತ್ರಿಕವಾಗಿ ಬಹಳ ಉನ್ನತ ಮಟ್ಟದ ಕೋಟಿಗಟ್ಟಲೆ ವ್ಯಯಿಸಿದ ಇಂತಹ ಚಿತ್ರಗಳನ್ನು ನೋಡಲು ಪ್ರೇಕ್ಷಕರು ಚಿತ್ರಮಂದಿರಕ್ಕೆ ಬರುತ್ತಾರೆಯೇ ಹೊರತು ಒಟಿಟಿಗಳಲ್ಲಿ ಬರುವವರೆಗೆ ಕಾಯುವುದಿಲ್ಲ. ಅದರಲ್ಲಿ ನೋಡುವ ಅನುಭವವೇ ಬೇರೆ, ಚಿತ್ರಮಂದಿರಗಳಲ್ಲಿನ ಅನುಭವವೇ ಬೇರೆ.

ಚಿತ್ರಮಂದಿರಗಳತ್ತ ಜನರನ್ನು ಸೆಳೆಯಲು, ಉತ್ಕ ಷ್ಟ ತಾಂತ್ರಿಕತೆಯ, ಉತ್ತಮ ಗುಣಮಟ್ಟದ ಇಂತಹ ಅದ್ಧೂರಿ ಚಿತ್ರಗಳು ಬೇಕು.

ಮಲ್ಟಿಪ್ಲೆಕ್ಸ್‌ಗಳಲ್ಲಿ ಬಹುಪರದೆಗಳಿರುವ ಕಾರಣ, ಅಲ್ಲಿ ಪ್ರದರ್ಶನವಾಗುವ ಚಿತ್ರಗಳಲ್ಲಿ ಯಾವುದಕ್ಕಾದರೂ ಜನ ಬರಲಿಲ್ಲ, ಬೇಡಿಕೆ ಇಲ್ಲ ಎಂದಾದರೆ ಅಲ್ಲಿ ಬೇರೆ ಚಿತ್ರಗಳನ್ನು ಪ್ರದರ್ಶಿಸಲು ಅವಕಾಶ ಇರುತ್ತದೆ. ಆದರೆ ಒಂಟಿ ಪರದೆಯ ಚಿತ್ರಮಂದಿರಗಳು ಅಷ್ಟು ಸುಲಭದಲ್ಲಿ ಚಿತ್ರಗಳನ್ನು ವಾರದ ಮಧ್ಯದಲ್ಲಿ ಪಡೆಯುವುದು ಕಷ್ಟ ಸಾಧ್ಯ. ಹಾಗಾಗಿಯೇ ಈ ಪ್ರದರ್ಶಕರದು ತ್ರಿಶಂಕು ಸ್ಥಿತಿ.

ಅದಕ್ಕಾಗಿ ಪ್ರದರ್ಶಕರು ಜನಪ್ರಿಯ, ವರ್ಚಸ್ವೀ ನಟರ ಚಿತ್ರಗಳಿಗಾಗಿ ಬೇಡಿಕೆ ಇಡುತ್ತಿದ್ದಾರೆ. ಈ ನಟರು ವರ್ಷದಲ್ಲಿ ಕನಿಷ್ಠ ಮೂರು ಚಿತ್ರಗಳನ್ನಾದರೂ ನೀಡಬೇಕು ಎನ್ನುವುದು ಅವರ ಕೋರಿಕೆ. ಹಾಗಾದರೆ ಹೊಸಬರ ಚಿತ್ರಗಳಿಗೆ ಬೇಡಿಕೆ ಇಲ್ಲವೇ? ಇದೆ, ಅವು ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಸಫಲವಾಗಬೇಕು. ‘ಕಿರಿಕ್ ಪಾರ್ಟಿ’ ಚಿತ್ರ ತೆರೆಕಂಡಾಗ ಅದರ ಮುಖ್ಯ ಪಾತ್ರಧಾರಿ ರಕ್ಷಿತ್ ಶೆಟ್ಟಿ ತಾರಾ ವರ್ಚಸ್ಸಿನ ನಟ ಆಗಿರಲಿಲ್ಲ. ಇದೇ ಮಾತು ‘ಕಾಂತಾರ’ ಚಿತ್ರಕ್ಕೂ ಅನ್ವಯಿಸುತ್ತದೆ. ಇವಲ್ಲದೆ ಇನ್ನೂ ಕೆಲವು ಹೊಸಬರ ಚಿತ್ರಗಳು ಗಲ್ಲಾಪೆಟ್ಟಿಗೆಯಲ್ಲಿ ಗೆದ್ದ ಉದಾಹರಣೆಗಳಿವೆ.

ಅಲ್ಲೊಂದು, ಇಲ್ಲೊಂದು ಚಿತ್ರ ಗೆಲ್ಲುತ್ತದೆ. ಆದರೆ ಚಿತ್ರಮಂದಿರಗಳಿಗೆ ನಿರಂತರ ಪ್ರೇಕ್ಷಕರನ್ನು ಸೆಳೆಯುವ ಚಿತ್ರಗಳ ಬೇಡಿಕೆ ಇರುತ್ತದೆ. ಅಂತಹ ಚಿತ್ರಗಳೆಂದರೆ, ಸಾಂಪ್ರದಾಯಕವಾಗಿ, ತಾರಾ ವರ್ಚಸ್ಸಿನ ನಟರ ಚಿತ್ರಗಳು.

ಕನ್ನಡದಲ್ಲಿ ತಾರಾ ವರ್ಚಸ್ಸಿನ, ಜನಪ್ರಿಯ ನಟರ ಸಂಖ್ಯೆ ಬಹಳ ಕಡಿಮೆ. ಅವರಲ್ಲಿ ವರ್ಷಕ್ಕೆ ಎರಡೋ ಮೂರೋ ಚಿತ್ರಗಳನ್ನು ನೀಡುವವರ ಸಂಖ್ಯೆ ಇನ್ನೂ ಕಡಿಮೆ. ಯಶ್ ಅಭಿನಯದ ಮುಂದಿನ ಚಿತ್ರ ಯಾವಾಗ ಬರಬಹುದು? ದರ್ಶನ್ ಅಭಿನಯದ ‘ಕ್ರಾಂತಿ’ ಚಿತ್ರ ನಿರ್ಮಾಪಕರಿಗೆ ಲಾಭ ತಂದುಕೊಟ್ಟಿದೆ.ಆದರೆ ಕೊಂಡುಕೊಂಡವರಿಗಲ್ಲ ಎನ್ನಲಾಗುತ್ತಿದೆ.

ಅವರ ಮುಖ್ಯಭೂಮಿಕೆಯ ಚಿತ್ರ ರಾಕ್‌ಲೈನ್ ವೆಂಕಟೇಶ್ ನಿರ್ಮಾಣದ ‘ಕಾಟೇರ’ ಈ ವರ್ಷದಲ್ಲಿ ತೆರೆ ಕಂಡರೂ ಕಾಣಬಹುದು. ಬಿ.ಸಿ.ಪಾಟೀಲರ ‘ಗರಡಿ’ಯಲ್ಲಿ ಅವರದು ಪುಟ್ಟ ಪಾತ್ರ ಎನ್ನಲಾಗಿದೆ. ಇನ್ನು ಈಗಾಗಲೇ ಚಿತ್ರೀಕರಣ ಆರಂಭವಾಗಿರುವ ‘ರಾಜ ವೀರ ಮದಕರಿ ನಾಯಕ’ ಚಿತ್ರದ ಚಿತ್ರೀಕರಣ ಸ್ಥಗಿತಗೊಂಡಿದ್ದು, ಅದರ ಮುಂದಿನ ಬೆಳವಣಿಗೆ ಏನು ಎಂದು ಈಗಲೇ ಹೇಳುವಂತಿಲ್ಲ.

ಉಪೇಂದ್ರ ಮತ್ತು ಸುದೀಪ್ ಅಭಿನಯಿಸಿ, ಶಿವರಾಜಕುಮಾರ್ ಅವರು ಕೂಡ ಕಾಣಿಸಿಕೊಂಡ ಬಹುತಾರಾ ಚಿತ್ರ, ಪ್ಯಾನ್ ಇಂಡಿಯಾ ಚಿತ್ರ ಎಂದು ನಿರ್ದೇಶಕ, ನಿರ್ಮಾಪಕ ಆರ್.ಚಂದ್ರು ಹೇಳಿದ್ದ ಅವರ ‘ಕಬ್ಜ’ ಚಿತ್ರವೂ ನಿರ್ಮಾಪಕರ ಪಾಲಿಕೆ ವರವಾದರೂ, ಅದನ್ನು ಕೊಂಡವರ ಪಾಲಿಗಲ್ಲ ಎನ್ನಲಾಗುತ್ತಿದೆ.

ಶಿವರಾಜಕುಮಾರ್ ಅಭಿನಯದ ‘ಘೋಸ್ಟ್’, ‘ನೀ ಸಿಗೋವರೆಗೂ’, ‘ಕರಟಕ ಧಮನಕ’, ‘45’, ‘ಭೈರತಿ ರಣಗಲ್’, ಜೊತೆಗೆ ತಮಿಳಿನ ‘ಜೈಲರ್’, ‘ಕ್ಯಾಪ್ಟನ್ ಮಿಲ್ಲರ್’ ಮತ್ತು ಈಗಾಗಲೇ ಪ್ರಕಟವಾಗಿರುವ ‘ಅಶ್ವತ್ಥಾಮ’, ‘ಸತ್ಯಮಂಗಲ’, ‘ಕಬ್ಜ 2’ ಚಿತ್ರಗಳಿವೆ. ಬಿಡುವಿಲ್ಲದೆ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ ಶಿವಣ್ಣ. ಗಣೇಶ್ ಅಭಿನಯದ ‘ಬಾನದಾರಿಯಲ್ಲಿ’ ತೆರೆಗೆ ಸಿದ್ಧವಾಗಿದೆ. ಪರಂವಃ ಸ್ಟುಡಿಯೋಸ್ ನಿರ್ಮಾಣದ ಚಿತ್ರಗಳು ತೆರೆಗೆ ಸಿದ್ಧವಾಗುತ್ತಿವೆ. ಇವುಗಳಲ್ಲಿ ಹೊಸಬರ ಚಿತ್ರಗಳಿವೆ.

1200ಕ್ಕೂ ಹೆಚ್ಚು ಚಿತ್ರಮಂದಿರಗಳಿದ್ದ ದಿನಗಳಲ್ಲಿ ತಯಾರಾಗುತ್ತಿದ್ದ ಚಿತ್ರಗಳ ಸಂಖ್ಯೆ ಕಡಿಮೆ ಇದ್ದರೂ, ಚಿತ್ರಮಂದಿರಗಳಿಗೆ ಕೊರತೆ ಎನಿಸಲಿಲ್ಲ. ಕೆಲವು ಸಂದರ್ಭಗಳಲ್ಲಿ ಪರಭಾಷಾ ಚಿತ್ರಗಳ ವಿರುದ್ಧ ಹೋರಾಡಬೇಕಾದ ದಿನಗಳೂ ಇದ್ದವೆನ್ನಿ. ರಾಜಕುಮಾರ್ ಅಭಿನಯದ ‘ಹಾಲುಜೇನು’ ಚಿತ್ರದ ಬಿಡುಗಡೆ ಆಗಲು ನಿರ್ಧರಿಸಿದ್ದ ಸಂತೋಷ್ ಚಿತ್ರಮಂದಿರದಲ್ಲಿ ಹಿಂದಿಯ ‘ನಮಕ್ ಹಲಾಲ್’ ಚಿತ್ರ ಬಿಡುಗಡೆ ಮಾಡಬೇಕು ಎಂದು ಹಟ ಮಾಡಿದ ಅದರ ಮಾಲೀಕ ಬಿ.ಸಿ.ಎಸ್.ನಾರಾಯಣ್ ನಂತರ ಸೋಲೊಪ್ಪಿಕೊಳ್ಳಬೇಕಾಯಿತೆನ್ನಿ.

ಆ ದಿನಗಳಲ್ಲಿ, ಕನ್ನಡ ಚಿತ್ರದ ಬಿಡುಗಡೆಗೆ ಬೆಂಗಳೂರಿನ ಹೃದಯ ಭಾಗವಾದ ಮೆಜೆಸ್ಟಿಕ್ ಪ್ರದೇಶದ ಕೆಂಪೇಗೌಡ ರಸ್ತೆಯ ಯಾವುದಾದರೂ ಒಂದು ಚಿತ್ರಮಂದಿರ ಬೇಕೇ ಬೇಕಾಗಿತ್ತು. ಸುಮಾರು ಇಪ್ಪತ್ತಕ್ಕೂ ಹೆಚ್ಚು ಚಿತ್ರಮಂದಿರಗಳು ಆ ರಸ್ತೆಯ ಇಕ್ಕೆಲಗಳಲ್ಲಿದ್ದವು. ಈಗ ಕೆಲವೇ ಉಳಿದಿವೆ. ಭೂಮಿಕಾ, ಸಂತೋಷ್, ನರ್ತಕಿ, ಸಪ್ನಾ, ತ್ರಿವೇಣಿ, ಅನುಪಮ, ಅಭಿನಯ, ಶಾರದಾ ಮಾತ್ರ. ಉಳಿದವೆಲ್ಲ ನೆಲಸಮವಾಗಿ ಅಲ್ಲಿ ಬೇರೆ ಕಟ್ಟಡಗಳು ತಲೆ ಎತ್ತಿವೆ, ಎತ್ತುತ್ತಿವೆ.

ಕನ್ನಡ ಚಿತ್ರಗಳ ಬಿಡುಗಡೆಗೂ ಕೆಂಪೇಗೌಡ ರಸ್ತೆಯಲ್ಲೇ ಚಿತ್ರಮಂದಿರಗಳನ್ನು ಎಲ್ಲರೂ ಬಯಸುತ್ತಿಲ್ಲ. ಈ ತನಕ ತೆರೆಕಂಡ 107 ಚಿತ್ರಗಳಲ್ಲಿ ಕೆಂಪೇಗೌಡ ರಸ್ತೆಯ ಸಂತೋಷ್ (16), ತ್ರಿವೇಣಿ (11), ಅನುಪಮ(10), ಅಭಿನಯ(08), ಸಪ್ನಾ(03), ಭೂಮಿಕಾ (3), ಶಾರದಾ(01) ಚಿತ್ರ ಮಂದಿರಗಳಲ್ಲದೆ ಪಿವಿಆರ್(12), ಐನಾಕ್ಸ್ (02), ಗೋಪಾಲನ್ ಮಾಲ್(05) ಮುಂತಾಗಿ ಮಲ್ಟಿಪ್ಲೆಕ್ಸ್ ಗಳು, ಹೊರವಲಯದಲ್ಲಿರುವ ವೀರೇಶ(10), ಪ್ರಸನ್ನ(04), ಸಿದ್ದೇಶ್ವರ(02), ಬಾಲಾಜಿ(01), ಗೋವರ್ಧನ(01), ನವರಂಗ್(01), ಬಾಲಾಜಿ(01), ಅಮೃತ(01), ವಿಕ್ಟರಿ ಸಿನಿಮಾ(01), ಈಶ್ವರಿ(01) ಚಿತ್ರಮಂದಿರಗಳು ಬಿಡುಗಡೆಯ ಮುಖ್ಯ ಚಿತ್ರಮಂದಿರಗಳಾದವು. ಬೆಂಗಳೂರಲ್ಲಿ ಬಿಡುಗಡೆ ಮಾಡದೆ ಬೇರೆಡೆ ತೆರೆಕಂಡ ಚಿತ್ರಗಳೂ ಇದ್ದವು.

ವಿಶೇಷ ತಾಂತ್ರಿಕತೆ, ಅದ್ಧೂರಿತನ ಇಲ್ಲದ ಕಡಿಮೆ ವೆಚ್ಚದ ಚಿತ್ರಗಳು, ಮೂರು ವಾರ ಕಳೆಯುತ್ತಲೇ ಒಟಿಟಿ ತಾಣಕ್ಕೆ ಬರುತ್ತವೆ, ಆಗ ನೋಡಿದರಾಯಿತು ಎಂದುಕೊಳ್ಳುವ ಬಹುದೊಡ್ಡ ಪ್ರೇಕ್ಷಕ ವರ್ಗ ಇದೆ.

ಕನ್ನಡದ ಬಹುತೇಕ ಚಿತ್ರಗಳನ್ನು, ಅವು ತೆರೆಕಂಡು ಯಶಸ್ವಿ ಆಗದೆ ಇದ್ದರೆ, ಒಟಿಟಿ ತಾಣಗಳಲ್ಲಿ ಪ್ರಸಾರಕ್ಕೆ ಕೊಂಡುಕೊಳ್ಳುವುದಿಲ್ಲ ಎನ್ನುವುದು ಬಹಳ ಮಂದಿಗೆ ಗೊತ್ತಿಲ್ಲ. ಕನ್ನಡ ಚಿತ್ರೋದ್ಯಮ ಕವಲು ದಾರಿಯಲ್ಲಿದೆ. ಒಟಿಟಿ ತಾಣಗಳು ಚಿತ್ರಮಂದಿರಗಳ ಅಸ್ತಿತ್ವಕ್ಕೆ ನಿಧಾನವಾಗಿ ಕೊಡಲಿಯೇಟು ಹಾಕುತ್ತಿವೆ. ಇದಕ್ಕೇನು ಮಾಡಬೇಕು ಎನ್ನುವುದನ್ನು ಸರ್ಕಾರವೂ ಸೇರಿದಂತೆ ಸಂಬಂಧಪಟ್ಟ ಎಲ್ಲರೂ ಒಟ್ಟಿಗೆ ಕುಳಿತು ಚರ್ಚಿಸಬೇಕಾದ ಸಮಯ ಇದು.