‘ಪ್ರಭುತ್ವ’ಕ್ಕೆ ಸವಾಲು, ನಾಮದ ಬಲವೊಂದಿದ್ದರೆ ಸಾಕೊ…

 

   ಅನ್ಯಥಾ ಭಾವಿಸಬಾರದಾಗಿ ವಿನಂತಿ. ಶೀರ್ಷಿಕೆ ನೋಡಿದ ಕೂಡಲೇ ಅಂಕಣ ಚುನಾವಣೆಯತ್ತ ಹೊರಳಿತು ಎಂದು ಖಂಡಿತ ತಿಳಿದುಕೊಳ್ಳಬಾರದು. ‘ಪ್ರಭುತ್ವ’ಕ್ಕೆ ಸವಾಲು ಎಂದು ಹೇಳಿರುವುದು ಸೀಮಿತವಾಗಿ ಈ ಹೆಸರಿನ ಚಿತ್ರವೊಂದಕ್ಕೆ ಸಂಬಂಧಪಟ್ಟಂತೆ ಮಾತ್ರ. ‘ಪ್ರಜಾಪ್ರಭುತ್ವ’ದ ಸವಾಲಿನ ಕುರಿತು ಇಲ್ಲಿ ಯಾವುದೇ ಮಾತಿಲ್ಲ. ಅದನ್ನು ಓದುಗ/ಮತದಾರ ಮಹಾಪ್ರಭು ಅವರವರ ಭಾವ, ಅವರವರ ಭಕುತಿಗೆ ಅನುಗುಣವಾಗಿ ತಿಳಿದುಕೊಳ್ಳುತ್ತಾರೆ.

‘ನಾಮದ ಬಲ’ ಕೂಡ. ಚುನಾವಣೆಯಾಗಲಿ, ಅದಕ್ಕೆ ಯಾರದೋ ಹೆಸರಿನ ಪ್ರಸ್ತಾಪವಾಗಲಿ ಇಲ್ಲಿ ಮಾಡುವುದಿಲ್ಲ. ಇದು ತಮ್ಮ ಚಿತ್ರದ ಶೀರ್ಷಿಕೆಯ ಕುರಿತಂತೆ ಎದ್ದ ವಿವಾದ, ಅದರ ಬೆಳವಣಿಗೆ, ವಸ್ತುಸ್ಥಿತಿ ಇತ್ಯಾದಿ ಪ್ರಸಂಗಗಳ ಮಾತು.

ಮೊದಲು ಈ ‘ನಾಮ’ದತ್ತಲೇ ಬರೋಣ. ಇತ್ತೀಚೆಗೆ ಶೀರ್ಷಿಕೆಯೊಂದು ತಮಗೆ ಸಲ್ಲಬೇಕು ಎಂದು ಸುದ್ದಿಯಾದದ್ದು ‘ರೋಸಿ’ ಹೆಸರಿಗೆ. ಒಂದು ‘ರೋಸಿ’, ಇನ್ನೊಂದು ‘ರೋಸಿ 45’. ‘ರೋಸಿ’ ಹೆಸರಿನ ಚಿತ್ರ ಇತ್ತೀಚೆಗೆ ಸೆಟ್ಟೇರಿತು. ಇದು ಲೂಸ್ ಮಾದ ಖ್ಯಾತಿಯ ಯೋಗಿ ಅಭಿನಯದ ೫೦ನೇ ಚಿತ್ರ. ಯೋಗೀಶ್ ತೆರೆಯ ಮೇಲೆ ಲೂಸ್ ಮಾದ ಆಗಿ ಕಾಣಿಸಿಕೊಂಡದ್ದು, ಮಾವ ವಿಜಯ್ ಮುಖ್ಯಭೂಮಿಕೆಯ ‘ದುನಿಯಾ’ ಮೂಲಕ. ಆ ಪಾತ್ರದ ಹೆಸರು ಅವರ ಹೆಸರಿಗೆ ಅಂಟಿಕೊಂಡಿತು. ಸಣ್ಣಪುಟ್ಟ ಪಾತ್ರಗಳಿಂದ ಮುಖ್ಯ ಭೂಮಿಕೆಗೆ ಜಿಗಿದ ಯೋಗೀಶ್ ಆಗಲೇ ಐವತ್ತರ ಹೊಸ್ತಿಲಲ್ಲಿದ್ದಾರೆ. ಮೊನ್ನೆ ಅವರ ಐವತ್ತನೇ ಚಿತ್ರದ ಹೆಸರಿನ ಅನಾವರಣ ಮತ್ತು ಮುಹೂರ್ತ ಆಯಿತು. ವೈ.ರಾಜೇಶ್, ಡಿ.ವೈ.ವಿನೋದ್ ಅವರಿಗಾಗಿ ‘ಹೆಡ್‌ಬುಷ್’ ಖ್ಯಾತಿಯ ಶೂನ್ಯ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಯೋಗೀಶ್ ಪ್ರಕಾರ ಅವರು ಗ್ಯಾಂಗ್‌ಸ್ಟರ್ ಆಗಿ ಕಾಣಿಸಿಕೊಳ್ಳುತ್ತಿರುವ ಚಿತ್ರವಿದು.

ಶಿವರಾಜ್‌ಕುಮಾರ್ 60ನೇ ಜನ್ಮದಿನದ ಸಂದರ್ಭದಲ್ಲಿ ಅವರ ಹೊಸ ಚಿತ್ರದ ಪ್ರಕಟಣೆ ಆಗಿತ್ತು. ಸಂಗೀತ ಸಂಯೋಜಕ ಅರ್ಜುನ್ ಜನ್ಯ ಹೇಳಿದ ಕಥೆಯನ್ನು ಇಷ್ಟಪಟ್ಟ ಶಿವಣ್ಣ, ಅವರಿಂದಲೇ ಆ ಚಿತ್ರವನ್ನು ನಿರ್ದೇಶಿಸಲು ಹೇಳಿದರು, ಹೆಸರಾಂತ ನಿರ್ಮಾಪಕರಾದ ‘ನಾತಿಚರಾಮಿ’, ‘ಗಾಳಿಪಟ 2’ ಚಿತ್ರಗಳ ಖ್ಯಾತಿಯ ರಮೇಶ್ ರೆಡ್ಡಿ ಇದನ್ನು ನಿರ್ಮಿಸುವುದಾಗಿಯೂ ಪ್ರಕಟವಾಯಿತು. ಆಗ ಮೊದಲ ನೋಟದಲ್ಲಿದ್ದ ಹೆಸರು ‘45’. ಅಖಿಲ ಭಾರತ ಮಟ್ಟದಲ್ಲಿ, ತೆರೆಗೆ ಬರಲಿರುವ ಈ ಚಿತ್ರದಲ್ಲಿ ಶಿವಣ್ಣ ಅವರೊಂದಿಗೆ ಉಪೇಂದ್ರ, ರಾಜ್ ಬಿ.ಶೆಟ್ಟಿ ಅವರೂ ಪ್ರಮುಖ ಪಾತ್ರಧಾರಿಗಳು ಎಂದೂ ಹೇಳಲಾಯಿತು.

ಈ ನಡುವೆ ನಿರ್ಮಾಣ ಸಂಸ್ಥೆ ‘45’ರ ಬದಲು ‘ರೋಸಿ 45’ ಶೀರ್ಷಿಕೆಯನ್ನು ವಾಣಿಜ್ಯ ಮಂಡಳಿಯಿಂದ ಕೇಳಿರಬೇಕು. ವಾಣಿಜ್ಯ ಮಂಡಳಿ ಅದಕ್ಕೆ ಅನುಮತಿ ನೀಡಿದೆ. ಈ ಹೆಸರನ್ನು ಶಿವರಾಜ್‌ಕುಮಾರ್ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ಸೂರಜ್ ಪ್ರೊಡಕ್ಷನ್ಸ್‌ಗೆ ನೋಂದಾಯಿಸಲಾಗಿದೆ, ಈಗ ಡಿ.ವೈ.ಪ್ರೊಡಕ್ಷನ್ಸ್ ಲಾಂಛನದಲ್ಲಿ ನಿರ್ಮಾಣವಾಗುತ್ತಿರುವ ಚಿತ್ರಕ್ಕೂ ಅದೇ ಹೆಸರನ್ನು ಇಟ್ಟಿದೆ. ಕರ್ನಾಟಕ ವಾಣಿಜ್ಯ ಮಂಡಳಿ ಗಮನಕ್ಕೆ ಇದು ಬಂದಿದ್ದು, ಮೊದಲು ಶೀರ್ಷಿಕೆ ನೋಂದಾಯಿಸಿದವರು ಮಾತ್ರ ಶೀರ್ಷಿಕೆ ಬಳಸಿಕೊಳ್ಳಬಹುದು ಎಂದು ಪತ್ರ ನೀಡಿತ್ತು. ಹಾಗಾಗಿ ಈ ಶೀರ್ಷಿಕೆ ತನ್ನದು ಎಂದು ಸೂರಜ್ ಸಂಸ್ಥೆ ಹೇಳಿಕೊಂಡಿತ್ತು.

ತಮ್ಮ ಅಭಿನಯದ ಐವತ್ತನೇ ಚಿತ್ರಕ್ಕೆ ‘ರೋಸಿ’ ಹೆಸರೇ ಸೂಕ್ತ ಎಂದುಕೊಂಡ ಯೋಗೀಶ್ ಶಿವಣ್ಣ ಅವರನ್ನೇ ನೇರವಾಗಿ ಕಂಡು ವಿಷಯ ತಿಳಿಸಿದರಂತೆ. ತಮ್ಮ ಮುಂದಿನ ಚಿತ್ರ ‘45’, ಅರ್ಜುನ್ ಜನ್ಯ ನಿರ್ದೇಶಿಸುತ್ತಾರೆ ಎಂದು ಜನ್ಮದಿನದಂದು ಸಾಮಾಜಿಕ ತಾಣದಲ್ಲಿ ಹೇಳಿದ್ದ ಶಿವಣ್ಣ ಅವರಿಗೆ ಈ ಹೆಸರು ಬದಲಾದ ವಿಷಯವೇ ಗೊತ್ತಿರಲಿಲ್ಲ ಎನ್ನುವುದು ನಂತರ ತಿಳಿದು ಬಂದ ವಿಷಯ. ಹಾಗಂತ ಅವರೇ ಹೇಳಿದರು ಎಂದು ಯೋಗೀಶ್ ಹೇಳಿದ್ದಾಗಿ ವರದಿಯಾಯಿತು. ಹಾಗಾಗಿ ಯೋಗೀಶ್ ಅಭಿನಯದ 50ನೇ ಚಿತ್ರ ‘ರೋಸಿ’ ಆಗಲಿದೆ. ಹಾಗಾದರೆ, ವಾಣಿಜ್ಯ ಮಂಡಳಿ ಅವಸರದಲ್ಲಿ ಈ ಶೀರ್ಷಿಕೆಯ ಅಧಿಕೃತತೆಯನ್ನು ಹೇಳಿದ್ದಾದರೂ ಯಾಕೆ ಎಂದು ಕೇಳುವವರೂ ಇದ್ದಾರೆನ್ನಿ. ಮಂಡಳಿಯಲ್ಲಿ ಹೆಸರು, ಪತ್ರ ವ್ಯವಹಾರಗಳು ತಡವಾದರೆ, ಬೇರೆಡೆ ಅದನ್ನು ಮಾಡಿಕೊಳ್ಳುವ ವ್ಯವಸ್ಥೆಯೂ ಇರುವುದರಿಂದ ಇಂತಹ ಅಬದ್ಧಗಳಿಗೆ ದಾರಿಯಾಗಿದೆ.

ಇನ್ನು ‘ಪ್ರಭುತ್ವ’ದ ಸವಾಲಿನ ವಿಷಯ. ಈ ವಾರ ತೆರೆಗೆ ಬರಬೇಕಾಗಿದ್ದ ಚಿತ್ರವಿದು. ಮೇಘರಾಜ್ ಮೂವೀಸ್ ಲಾಂಛನದಲ್ಲಿ ಶಿವಕುಮಾರ್ ಎನ್ನುವವರು ನಿರ್ಮಿಸಿರುವ ಚಿತ್ರ. ಚಿತ್ರದ ಹೆಸರೇ ಸೂಚಿಸುವಂತೆ, ಇದು ಪ್ರಭುತ್ವಕ್ಕೆ ಸಂಬಂಧಿಸಿದಂತೆ ಇರುವ ಕಥಾನಕ ಎನ್ನುತಾರೆ, ಕಥೆಗಾರರೂ ಆಗಿರುವ ನಿರ್ಮಾಪಕ, ನಿವೇಶನೋದ್ಯಮಿ ಶಿವಕುಮಾರ್.

2018ರಲ್ಲಿ ನಡೆದ ವಿಧಾನಸಭಾ ಚುನಾವಣೆಗೆ ಮೊದಲು ತೆರೆಗೆ ಬರಬೇಕಾಗಿದ್ದ ಚಿತ್ರವದು. 2017ರಲ್ಲೇ ಈ ನಿರ್ಮಾಪಕರು ಕಥೆಯನ್ನು ಸಿದ್ಧಪಡಿಸಿ, ಚುನಾವಣೆ, ಮತದಾನದ ವೇಳೆ ಪ್ರಜೆಯ ಕರ್ತವ್ಯವೇ ಮೊದಲಾದವನ್ನು ಸೇರಿಸಿ ಈ ಕಥೆ ಸಿದ್ಧಪಡಿಸಿದ್ದರಂತೆ. ಇದೀಗ ಮತ್ತೆ ಚುನಾವಣೆ ಬಂದರೂ ಚಿತ್ರ ಸಿದ್ಧವಾಗಿರಲಿಲ್ಲ. ಮೊನ್ನೆ ನಿರ್ಮಾಪಕರು ಪತ್ರಿಕಾಗೋಷ್ಠಿ ಕರೆದಿದ್ದರು. ವಾಣಿಜ್ಯ ಮಂಡಳಿಯಲ್ಲಿ ಈ ಗೋಷ್ಠಿ ಕರೆದದ್ದರ ಉದ್ದೇಶ, ತಮ್ಮ ಚಿತ್ರದ ನಿರ್ದೇಶಕರು, ಚಿತ್ರ ಬಿಡುಗಡೆ ಮಾಡದಂತೆ ನ್ಯಾಯಾಲಯದಿಂದ ತಡೆಯಾಜ್ಞೆ ತಂದಿರುವುದಾಗಿ ಅವರ ವಕೀಲರು ಕಳುಹಿಸಿರುವ ಪತ್ರದ ಕುರಿತಂತೆ ಹೇಳುವುದು ಹಾಗೂ ಮಂಡಳಿಗೆ ಈ ಕುರಿತು ದೂರು ನೀಡುವುದು. ವಾಣಿಜ್ಯ ಮಂಡಳಿಯ ಅಧ್ಯಕ್ಷರ ಕಾರ್ಯ ಬಾಹುಳ್ಯವೋ ಏನೋ, ಅವರ ಗೈರು ಹಾಜರಿಯಲ್ಲಿ ನಿರ್ಮಾಪಕ ಶಿವಕುಮಾರ್ ಪತ್ರಿಕಾ ಗೋಷ್ಠಿ ಆರಂಭಿಸಿದರು. ನಿರ್ಮಾಪಕರ ಮಗ ರವಿರಾಜ್, ಚಿತ್ರದ ಜಂಟಿ ನಿರ್ದೇಶಕ ವಿನಯ ಮೂರ್ತಿ, ಮುಖ್ಯ ಪಾತ್ರಧಾರಿಗಳಾದ ಚೇತನ್ ಚಂದ್ರ ಮತ್ತು ಪಾವನಾ ಪತ್ರಿಕಾಗೋಷ್ಠಿಯಲ್ಲಿದ್ದರು. ಚೋದ್ಯವೆಂದರೆ, ತಡೆಯಾಜ್ಞೆಯಲ್ಲಿ ಇಷ್ಟೂ ಜನರ ಹೆಸರಿತ್ತು ಎನ್ನುವುದು.

ನಿರ್ಮಾಪಕರ ಪ್ರಕಾರ, 2017ರಲ್ಲಿ ಸದ್ರಿ ನಿರ್ದೇಶಕರು, ಈ ಚಿತ್ರವನ್ನು ನಿರ್ದೇಶಿಸಿ, ಮೊದಲ ಪ್ರತಿ ನೀಡಲು 2.5 ಕೋಟಿ ರೂ. ನಿರ್ಮಾಣ ವೆಚ್ಚಕ್ಕೆ ಒಪ್ಪಿದವರು, 2022ರಲ್ಲಿ ಚಿತ್ರೀಕರಣ ಮುಗಿಸುವ ವೇಳೆಗೆ ಎಂಟು ಕೋಟಿ ರೂ. ವೆಚ್ಚ ಮಾಡಿದ್ದಾರೆ. ಚಿತ್ರೀಕರಣೋತ್ತರ ಕೆಲಸಗಳು ಇನ್ನೂ ಆಗಿರಲಿಲ್ಲ. ತಾವೇ ಮಾಡಿಕೊಡುವುದಾಗಿ ಹೇಳಿ ಮತ್ತೆಮತ್ತೆ ಹಣ ಪಡೆದು ಕೆಲಸ ಮಾಡಲಿಲ್ಲ. ನಂತರ ಸಿನಿಮಾದ ಸಂಕಲನಕಾರರು, ಜಂಟಿ ನಿರ್ದೇಶಕರು ಸೇರಿ ಆ ಕೆಲಸ ಮುಗಿಸಲಾಗಿದೆ. ಮಾತ್ರವಲ್ಲ, ಚಿತ್ರಕ್ಕೂ ತಮಗೂ ಯಾವುದೇ ರೀತಿಯ ಸಂಬಂಧ ಇಲ್ಲ ಎಂಬುದಾಗಿ ಕೊನೆಯಲ್ಲಿ ಬರೆದುಕೊಟ್ಟಿದ್ದಾರೆ.

ಇದನ್ನು ಹೇಳಿದ್ದು ಮಾತ್ರವಲ್ಲದೆ, ನಿರ್ದೇಶಕರು ಬರೆದು ಕೊಟ್ಟ ಪತ್ರದ ಪ್ರತಿ, ವಾಣಿಜ್ಯ ಮಂಡಳಿಗೆ ನೀಡಿದ ದೂರಿನ ಪ್ರತಿ ಹಾಗೂ ವಕೀಲರಿಂದ ಬಂದ ಪತ್ರದ ಪ್ರತಿಗಳನ್ನು ನೀಡಿದರು.

ತಮಗೂ ಚಿತ್ರಕ್ಕೂ ಸಂಬಂಧವಿಲ್ಲ ಎಂದು ಲಿಖಿತವಾಗಿ ಹೇಳಿದ ನಿರ್ದೇಶಕರು ನ್ಯಾಯಾಲಯದ ಮೂಲಕ ತಡೆಯಾಜ್ಞೆ ತಂದಿದ್ದಾರೆ! ಚುನಾವಣೆಗೆ ಮೊದಲೇ ಈ ಚಿತ್ರವನ್ನು ತೆರೆಗೆ ತರುವ ನಿರ್ಮಾಪಕರ ಧಾವಂತಕ್ಕೆ ಕೊಂಚ ತಡೆಯಾದರೂ, ತಡೆಯಾಜ್ಞೆ ತೆರವುಗೊಳಿಸಿ ಬಿಡುಗಡೆ ಮಾಡುವುದು ಅಸಾಧ್ಯದ ಮಾತೇನಲ್ಲ. ನಿರ್ಮಾಪಕರು ಹೇಳಿದ ವಿವರಗಳನ್ನು ಕೇಳಿದರೆ, ಅವರ ಔದಾರ್ಯವನ್ನು ನಿರ್ದೇಶಕರು ಬಳಸಿಕೊಂಡಿದ್ದು ಸ್ಪಷ್ಟ. ಕಳೆದ ಐದು ವರ್ಷಗಳಲ್ಲಿ ಚುನಾವಣೆಯಲ್ಲಿ ಗೆದ್ದು ಬಂದ ಶಾಸಕ ತಮ್ಮ ಕ್ಷೇತ್ರಕ್ಕೆ ಎಷ್ಟು ಸಹಾಯ ಮಾಡಿದರೋ ಏನೋ, ಆದರೆ ಈ ನಿರ್ಮಾಪಕರು, ತಮ್ಮ ನಿರ್ದೇಶಕರನ್ನು ಅಷ್ಟೊಂದು ಚೆನ್ನಾಗಿ ನೋಡಿಕೊಂಡಿದ್ದಾರೆ. ಅವರಿಗೆ ಇರಲು ಬಾಡಿಗೆ ಮನೆ ಕೊಡಿಸಿ, ಅವರ ಮದುವೆ ವೆಚ್ಚ ನೋಡಿಕೊಂಡು, ದೈನಂದಿನ ದಿನಸಿ ಮತ್ತಿತರ ವೆಚ್ಚಗಳಿಗಾಗಿ 1200 ರಿಂದ 1800 ರೂ. ವರೆಗೆ ಪ್ರತಿದಿನ ನೀಡಿ, ಅವರ ಮಡದಿ, ಮಗು ಚಿಕಿತ್ಸೆಯೇ ಮೊದಲಾದ ವೆಚ್ಚಗಳನ್ನೂ ಭರಿಸಿದ್ದರಿಂದ ನಿರ್ದೇಶಕರು ತಮ್ಮ ಕೆಲಸವನ್ನು ಮರೆತರೇನೋ. ನಿರ್ದೇಶಕರ ವಿರುದ್ಧ ಕ್ರಮಕೈಗೊಳ್ಳಲು ವಾಣಿಜ್ಯ ಮಂಡಳಿಗೆ ದೂರು ನೀಡಿದ್ದಾರೆ ನಿರ್ಮಾಪಕರು. ನಿರ್ದೇಶಕರ ಸಂಘದ ಗಮನಕ್ಕೆ ಇದನ್ನು ತರಬೇಕು. ಅಲ್ಲಿನ ವಿಷಯ ಮತ್ತೊಮ್ಮೆ ಹೇಳೋಣ.

ನಿರ್ಮಾಪಕರಿಗೆ ತಾವು ಬರೆದು ಕೊಟ್ಟ ಪತ್ರದ ಸುಳಿವು ನೀಡದೆ, ಚಿತ್ರದ ಬಿಡುಗಡೆಗೆ ತಡೆನೀಡಲು ನಿರ್ದೇಶಕರು ನ್ಯಾಯಾಲಯದ ಮೊರೆ ಹೋಗಿ ಯಶಸ್ವಿಯೇನೋ ಆದರು. ಆದರೆ ನಿರ್ಮಾಪಕರು ಆ ಪತ್ರವನ್ನು ನ್ಯಾಯಾಲಯದ ಮುಂದೆ ಇಟ್ಟಾಗ, ಅದೇನು ಮಾಡುತ್ತದೋ ಕಾದು ನೋಡೋಣ. ಹೊಸದಾಗಿ ಚಿತ್ರ ನಿರ್ಮಾಣಕ್ಕೆ ಬರುವವರಲ್ಲಿ ಇಂತಹ ಅನುಭವ ಆಗುವ ನಿರ್ಮಾಪಕರ ಸಂಖ್ಯೆ ಕಡಿಮೆ ಏನೂ ಅಲ್ಲ.