ಹವಾಮಾನ ವೈಪರೀತ್ಯಕ್ಕೆ ದಸರಾ ಏರ್ ಶೋ ಮೊಟಕು: ಪ್ರೇಕ್ಷಕರಿಗೆ ನಿರಾಸೆ

ಮೈಸೂರು: ದಸರಾದ ಏರ್ ಶೋ ವೀಕ್ಷಿಸಲು ಕಾತುರದಿಂದ ಕಾಯುತ್ತಿದ್ದ ಸಾವಿರಾರು ಪ್ರೇಕ್ಷಕರಿಗೆ ಹವಾಮಾನ ವೈಪರೀತ್ಯ ನಿರಾಸೆ ಉಂಟುಮಾಡಿದೆ. ಭಾರತೀಯ ವಾಯುಪಡೆಯ ಸೂರ್ಯಕಿರಣ್ ಏರೋಬ್ಯಾಟಿಕ್ಸ್ ತಂಡದ ವಿಮಾನಗಳು ಮೂರು ಸುತ್ತಿನ ಹಾರಾಟ ನಡೆಸಿದ ಬಳಿಕ ಪ್ರದರ್ಶನವನ್ನು ಸ್ಥಗಿತಗೊಳಿಸಲಾಯಿತು.

ಆಕಾಶದಲ್ಲಿ ವಿಮಾನಗಳ ರೋಚಕ ಕಸರತ್ತುಗಳನ್ನು ಕಣ್ತುಂಬಿಕೊಳ್ಳಲು ಪ್ರೇಕ್ಷಕರು ಬೆಳಗ್ಗಿನಿಂದಲೇ ಆಗಮಿಸಿದ್ದರು. ಆದರೆ, ಪ್ರತಿಕೂಲ ಹವಾಮಾನದಿಂದಾಗಿ ಪೂರ್ಣ ಪ್ರಮಾಣದ ಪ್ರದರ್ಶನ ನಡೆಸಲು ಸಾಧ್ಯವಾಗಲಿಲ್ಲ. ಮೂರು ಸುತ್ತು ಹಾರಾಟ ನಡೆಸಿದ ವಿಮಾನಗಳು ಬಳಿಕ ಬೆಂಗಳೂರಿನ ಯಲಹಂಕ ವಾಯುನೆಲೆಗೆ ಹಿಂದಿರುಗಿದವು.

“ಬೆಳಗ್ಗೆ ಒಂಬತ್ತು ಗಂಟೆಗೇ ಟಿಕೆಟ್ ಪಡೆದು ಬಂದಿದ್ದೆವು. ಗಂಟೆಗಟ್ಟಲೇ ಕಾದರೂ ಸಂಪೂರ್ಣ ಏರ್ ಶೋ ನೋಡಲು ಆಗಲಿಲ್ಲ. ನಾಳೆ ಮತ್ತೆ ಬರೋಣ ಎಂದರೆ ನಮ್ಮ ಬಳಿ ಟಿಕೆಟ್ ಇಲ್ಲ. ಈ ದಸರಾದಲ್ಲಿ ವಿಮಾನಗಳ ಕಸರತ್ತು ನೋಡಬೇಕೆಂದು ಬಹಳ ಆಸೆಯಿಂದ ಬಂದಿದ್ದೆವು. ಆದರೆ ನಿರಾಸೆಯಾಯಿತು,” ಎಂದು ಪ್ರೇಕ್ಷಕರು ಬೇಸರ ವ್ಯಕ್ತಪಡಿಸಿದರು.

ಇದೇ ವೇಳೆ, “ನಾಳೆ ಹವಾಮಾನ ಅನುಕೂಲಕರವಾಗಿದ್ದರೆ ಪೂರ್ಣ ಪ್ರಮಾಣದ ಏರ್ ಶೋ ನಡೆಸುತ್ತೇವೆ,” ಎಂದು ಸಿಬ್ಬಂದಿ ತಿಳಿಸಿದ್ದಾರೆ. ಇದೀಗ ನಾಳೆಯ ಹವಾಮಾನ ಹಾಗೂ ಸಂಪೂರ್ಣ ಪ್ರದರ್ಶನದತ್ತ ಪ್ರೇಕ್ಷಕರ ನಿರೀಕ್ಷೆ ನೆಟ್ಟಿದೆ.