ಓದುಗರ ಪತ್ರ: ಹಗಲು ದರೋಡೆ ನಿಲ್ಲಿಸಿ

ಇತ್ತೀಚಿನ ದಿನಗಳಲ್ಲಿ ಬೆಂಗಳೂರು, ಮೈಸೂರು, ಹೈದರಾಬಾದ್, ಮುಂಬೈನಂತಹ ನಗರ ಪ್ರದೇಶಗಳಲ್ಲಿ ಓಲಾ, ಊಬರ್, ರ‍್ಯಾಪಿಡೋ, ನಮ್ಮ ಯಾತ್ರೆ ಎಂಬ ಆಪ್ ಗಳ ಮೂಲಕ ಸಾರ್ವಜನಿಕರು ಪ್ರಮುಖವಾಗಿ ರೈಲು, ಬಸ್ ನಿಲ್ದಾಣಗಳು ಸೇರಿದಂತೆ ಇನ್ನಿತರ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ತಲುಪುವುದಕ್ಕಾಗಿ ಆಪ್‌ಗಳ ಮೂಲಕವೇ ಆಟೋರಿಕ್ಷಾ, ಸ್ಕೂಟರ್, ಕಾರ್‌ಗಳನ್ನು ಬುಕ್ ಮಾಡುವ ಸಂದರ್ಭದಲ್ಲಿ ಆಪ್‌ಗಳು ತೋರಿಸುವ ನಿಗದಿತ ದರಕ್ಕೆ ಆಧರಿಸಿ ಬುಕ್ ಮಾಡುವಾಗ ೫-೧೦ ನಿಮಿಷಗಳವರೆಗೂ ಬುಕಿಂಗ್ ಪಡೆಯದೆ ಸಮಯ ವ್ಯರ್ಥ ಮಾಡಿಸುವುದರ ಜೊತೆಗೆ ಅದಕ್ಕನುಣವಾಗಿ ೧೦ರೂ., ೨೦ರೂ., ೩೦ರೂ., ೪೦ರೂ., ೫೦.ರೂಗಳಿಗೂ ಅಧಿಕ ಮೊತ್ತವನ್ನು ಸೇರಿಸಿ ಬುಕ್ ಮಾಡಿದರೆ ತಕ್ಷಣವೇ ಬುಕಿಂಗ್ ಪಡೆಯುವುದಾಗಿ ಸೂಚನೆಗಳನ್ನು ತೋರಿಸುತ್ತಾರೆ.

ದಿನ-ದಿನಕ್ಕೆ ಇದು ಒಂದು ರೀತಿಯಲ್ಲಿ ಹಗಲು ದರೋಡೆಯಂತಾಗುತ್ತಿದೆ. ಆಮೂಲಕ ಸಾರ್ವಜನಿಕರಿಂದ ಹೆಚ್ಚಿನ ಹಣವನ್ನು ಪಡೆಯುತ್ತಿದ್ದಾರೆ. ಆದ್ದರಿಂದ ಜಿಲ್ಲಾಧಿಕಾರಿಗಳು ಮತ್ತು ಸಾರಿಗೆ ಇಲಾಖೆ ಅಧಿಕಾರಿಗಳು ಕೂಡಲೇ ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿ ಸಾರ್ವಜನಿಕರಿಗೆ ಆಗುತ್ತಿರುವ ಅನ್ಯಾಯವನ್ನು ಸರ್ಕಾರದ ಗಮನಕ್ಕೆ ತಂದು ಹಿಂದೆ ಇದ್ದಂತಹ ಮೀಟರ್‌ಗಳ ದರದ ಮೂಲಕವೇ ಆಟೋರಿಕ್ಷಾದಿಂದ ಅನುಕೂಲ ಪಡೆಯಲು ಸೂಚನೆ ನೀಡುವುದರೊಂದಿಗೆ, ಕಾರು ಮತ್ತು ಸ್ಕೂಟರ್‌ಗಳಿಗೆ ಪ್ರತಿ ಕಿಲೋ ಮೀಟರ್‌ಗೆ ನಿಗದಿತ ದರ ನಿಗದಿಪಡಿಸಿ ಸಾರ್ವಜನಿಕರಿಗೆ ಅನುಕೂಲವಾಗುವಂತೆ ಗಮನ ಹರಿಸಬೇಕಾಗಿದೆ.

-ನಾಗೇಶ್ , ಮಾನಸಗಂಗೋತ್ರಿ, ಮೈಸೂರು