ಪೌರಕಾರ್ಮಿಕರಿಗೆ ಉಚಿತ ಸಾಬೂನು ಗ್ಯಾರಂಟಿ ಕೊಡಿ

ವಸಂತಕುಮಾರ್ ಮೈಸೂರು ಮಠ

ಮೈಸೂರಿನ ಸ್ವಚ್ಛತೆ ಜವಾಬ್ದಾರಿ ಪೌರಕಾರ್ಮಿಕರ ಹೆಗಲ ಮೇಲಿದೆ

ಇದು ನಮ್ಮ ಕಸ, ಇದರ ನಿರ್ವಹಣೆ ನಮ್ಮ ಹೊಣೆ. ಆದರೆ ಬೆಳಗಾದರೆ ಪೌರಕಾರ್ಮಿಕರು ಬೀದಿಗೆ ಇಳಿದು, ಮನೆ ಮನೆಗಳಿಂದ ಕಸವನ್ನು ಶೇಖರಿಸಿ, ತಮ್ಮ ಕೈಯಾರ ಹಸಿ ಕಸ, ಒಣ ಕಸದ ವಿಭಜನೆ ಮಾಡಿ, ತ್ಯಾಜ್ಯ ನಿರ್ವಹಣಾ ಘಟಕಕ್ಕೆ ಸಾಗಿಸಿ, ಅದರ ಮುಂದಿನ ಸಂಸ್ಕರಣೆಗೆ ಸಹಾಯ ಮಾಡುತ್ತಿದ್ದಾರೆ. ದಿನ ನಿತ್ಯ ಈ ನಿಸ್ವಾರ್ಥಿ ಕಾರ್ಮಿಕರು ತಮ್ಮ ಕೆಲಸ ಕಾರ್ಯಗಳು ಎಷ್ಟೇ ಇದ್ದರೂ ನಿರಂತರವಾಗಿ ಜನರ ಮತ್ತು ನಗರದ ಸೌಂದರ್ಯ ಮತ್ತು ಪರಿಸರದ ಸ್ವಚ್ಛತೆಗಾಗಿ ಶ್ರಮಿಸುತ್ತಿದ್ದಾರೆ. ಇವರನ್ನು ಗೌರವಿಸುವುದು ನಮ್ಮ ಕರ್ತವ್ಯ ಅನಿಸುತ್ತಿದೆ.

ಪಾಲಿಕೆಯು ಪಾದರಕ್ಷೆ, ಕೈಚೀಲ, ಮಾಸ್ಕ್, ಸಮವಸ ಮುಂತಾದ ಮುಂಜಾಗ್ರತಾ ಪರಿಕರಗಳನ್ನು ಕೊಟ್ಟಿರುವುದು ಸರಿಯಷ್ಟೆ, ಆದರೆ ಪೌರ ಕಾರ್ಮಿಕರು ಹಲವಾರು ಕಾರಣಗಳಿಂದ ತಮ್ಮ ಕೈಯಾರೆ ಕಸವನ್ನು ವಿಂಗಡಿಸುವ ಪ್ರಮೇಯವನ್ನು ಎದುರಿಸುತ್ತಿದ್ದಾರೆ. ಈ ಅಭ್ಯಾಸ ಪೌರ ಕಾರ್ಮಿಕರನ್ನು ಸಾಂಕ್ರಾಮಿಕ ರೋಗ ರುಜಿನಗಳಿಗೆ ತುತ್ತಾಗುವ ಆತಂಕವನ್ನು ತರುತ್ತದೆ.

ಅವರು ಅಸಹ್ಯಪಡದೆ ಕಸದಲ್ಲಿ ಕೈ ಹಾಕಿ ಕ್ರಿಮಿಕೀಟಗಳ ಇರುವಿಕೆ ಮತ್ತು ಆ ಕಸದಲ್ಲಿರುವ ದುರ್ವಾಸನೆಯನ್ನೂ ಪರಿಗಣಿಸದೆ ತಮ್ಮ ಜವಾಬ್ದಾರಿಯುತ ಕೆಲಸವನ್ನು ನಿರ್ವಹಿಸುವ ಸಮಯದಲ್ಲಿ ಅವರಿಗೆ ಯಾವ ತರಹದ ಅನಾರೋಗ್ಯಗಳಾದರೂ ಬರಬಹುದು. ಈ ನಿಸ್ವಾರ್ಥತಾ ಸೇವೆ ಮಾಡುವವರಿಗೆ ನಾವು ಚಿರ ಋಣಿಗಳಾಗಿರಬೇಕು. ಪೌರಕಾರ್ಮಿಕರ ಆರೋಗ್ಯವನ್ನು ಕಾಪಾಡುವ ನಿಟ್ಟಿನಲ್ಲಿ ಇದೊಂದು ಗ್ಯಾರಂಟಿ ಸಲಹೆ – ಅವರುಗಳಿಗೆ ಉಚಿತವಾಗಿ ಸೋಪುಗಳನ್ನು ಒದಗಿಸಿ. ಸರ್ಕಾರಿ ಸ್ವಾಮ್ಯದ ಕರ್ನಾಟಕ ಸೋಪ್ಸ ಮತ್ತು ಡೆಟರ್ಜೆಂಟ್ಸ ಲಿಮಿಟೆಡ್ ಕುಂಪೆನಿಯು ಲಾಭದಾಯಕವಾಗಿ ನಡೆಯುತ್ತಿದೆ, ಇದರ ಮೈಸೂರು ಸ್ಯಾಂಡಲ್ ಸೋಪ್ ಜಗಜಹೀರವಾಗಿದೆ ಮತ್ತು ತನ್ನ ಗಳಿಕೆಯಿಂದ ಸರ್ಕಾರದ ಬೊಕ್ಕಸಕ್ಕೆ ಪ್ರತಿ ವರ್ಷ ಲಾಭದ ಪಾಲನ್ನು ನೀಡುತ್ತಿದೆ.

ಅಲ್ಲದೆ, ಈ ಸರ್ಕಾರಿ ಕುಂಪೆನಿಯು ಹಲವಾರು ಇತರೆ ಉತ್ಪನ್ನಗಳನ್ನೂ ಹೊಂದಿವೆ. ಇವುಗಳಲ್ಲಿ ಒಂದಾದ ಮೈಸೂರು ಕಾರ್ಬೋಲಿಕ್ ಹೈಜಿನಿಕ್ ಬಾತ್ ಸೋಪ್ ಹೆಚ್ಚಿನ ಸೂಕ್ಷ್ಮಜೀವಿಗಳ ರಕ್ಷಣೆಗಾಗಿ ವಿನ್ಯಾಸಗೊಳಿಸಲಾಗಿದೆ. ಹೆಚ್ಚಿನ ಕೊಬ್ಬಿನಾಮ್ಲ ಅಂಶ ಮತ್ತು ಶಕ್ತಿಯುತವಾದ ಬ್ಯಾಕ್ಟೀರಿಯಾ ವಿರೋಧಿ ಗುಣಗಳನ್ನು ಹೊಂದಿದೆ. ಇಂತಹ ಉತ್ಪನ್ನಗಳು ನಮ್ಮ ಬಳಿಯೇ ಇರುವುದನ್ನು ಸದುಪಯೋಗ ಗಳಿಸುವುದು ಒಳಿತು. ಆದುದರಿಂದ ತಿಂಗಳಿಗೊಮ್ಮೆ ಪ್ರತಿ ಪೌರಕಾರ್ಮಿಕರಿಗೂ ಎರಡು ಸ್ಯಾಂಡಲ್ ಸೋಪ್ ಮತ್ತು ಎರಡು ಕಾರ್ಬಾಲಿಕ್ ಸೋಪುಗಳನ್ನು ಉಚಿತವಾಗಿ ನೀಡಿದರೆ ಅನುಕೂಲವಾಗುತ್ತದೆ. ಇದಕ್ಕೆ ತಗಲುವ ಖರ್ಚು ವೆಚ್ಚವನ್ನು, ಕುಂಪೆನಿಯು ತನ್ನದೇ ಆದ ಕಾರ್ಪೊರೇಟ್ ಸೋಶಿಯಲ್ ರೆಸ್ಪಾನ್ಸಿಬಿಲಿಟಿ ಹಣದಲ್ಲಿ ನೀಡಬಹುದು. ಪೌರಕಾರ್ಮಿಕರರಿಗಾಗಿ ಈ ಸಾಮಾಜಿಕ ಕಳಕಳಿ ಕಾರ್ಯಕ್ರಮವನ್ನು ಗ್ಯಾರಂಟಿಯಾಗಿ ರಾಜ್ಯಾದ್ಯಂತ ಪಾರದರ್ಶಿತವಾಗಿ ಹಮ್ಮಿಕೊಂಡರೆ ಒಳಿತು ಅನಿಸುತ್ತದೆ.

ಲೇಖಕರು ಪರಿಸರವಾದಿ ಮತ್ತು ಹೋರಾಟಗಾರರು, ಮೈಸೂರು

” ತಿಂಗಳಿಗೊಮ್ಮೆ ಪ್ರತಿ ಪೌರಕಾರ್ಮಿಕರಿಗೂ ಎರಡು ಸ್ಯಾಂಡಲ್ ಸೋಪ್ ಮತ್ತು ಎರಡು ಕಾರ್ಬಾಲಿಕ್ ಸೋಪುಗಳನ್ನು ಉಚಿತವಾಗಿ ನೀಡಿದರೆ ಅನುಕೂಲವಾಗುತ್ತದೆ. ಇದಕ್ಕೆ ತಗಲುವ ಖರ್ಚು ವೆಚ್ಚವನ್ನು, ಕುಂಪೆನಿಯು ತನ್ನದೇ ಆದ ಕಾರ್ಪೊರೇಟ್ ಸೋಶಿಯಲ್ ರೆಸ್ಪಾನ್ಸಿಬಿಲಿಟಿ ಹಣದಲ್ಲಿ ನೀಡಬಹುದು”