ಹೊಸ ವರ್ಷ ಸಂಭ್ರಮಾಚರಣೆಗೆ ಮೈಸೂರಿನತ್ತ ಪ್ರವಾಸಿಗರ ಆಗಮನ

ಮೈಸೂರು: ಹೊಸ ವರ್ಷ 2025ನ್ನು ಸಂಭ್ರಮಿಸಲು ಪ್ರವಾಸಿಗರು ಸಾಂಸ್ಕೃತಿಕ ನಗರಿ ಮೈಸೂರಿಗೆ ಸಾಗರೋಪಾದಿಯಲ್ಲಿ ಲಗ್ಗೆ ಇಡುತ್ತಿದ್ದಾರೆ.

ಈಗಾಗಲೇ ಹೊಸ ವರ್ಷಾಚರಣೆಗೆ ಮೈಸೂರಿಗೆ ಟ್ರಿಪ್‌ ಬರಲು ಅನೇಕರು ಸಿದ್ಧತೆ ಮಾಡಿಕೊಂಡಿದ್ದು, ಹೋಟೆಲ್‌, ಲಾಡ್ಜ್‌ಗಳಲ್ಲಿ ಕೊಠಡಿಗಳು ಮುಂಗಡವಾಗಿ ಬುಕ್ಕಿಂಗ್‌ ಆಗಿವೆ.

ಈಗಾಗಲೇ ಮೈಸೂರಿಗೆ ಪ್ರವಾಸಿಗರ ದಂಡೇ ಹರಿದು ಬರುತ್ತಿದ್ದು, ಬಹುತೇಕರು ವಾಸ್ತವ್ಯ ಹೂಡಿದ್ದಾರೆ.

ಇನ್ನು ಮೈಸೂರಿನಲ್ಲಿ 425 ಹೋಟೆಲ್‌ಗಳ 10500 ಕೊಠಡಿಗಳು ಶೇಕಡಾ 100ರಷ್ಟು ಭರ್ತಿಯಾಗಿವೆ. ಜನವರಿ 1ರ ತನಕವೂ ಭರ್ತಿಯಾಗಿರಲಿವೆ ಎಂಬ ಮಾಹಿತಿ ಲಭ್ಯವಾಗಿದೆ.

ಈಗಾಗಲೇ ವಾರಾಂತ್ಯ ರಜೆ ಸೇರಿದಂತೆ ಕ್ರಿಸ್‌ಮಸ್‌ ಹಬ್ಬದ ಕಾರಣದಿಂದಾಗಿ ಪ್ರವಾಸಿಗರು ಮೈಸೂರು ಕಡೆಗೆ ಮುಖ ಮಾಡಿದ್ದಾರೆ.

ಸದ್ಯ ಪ್ರವಾಸಿಗರನ್ನು ಸೆಳೆಯುವ ಸಲುವಾಗಿ ಅರಮನೆ ಆವರಣದಲ್ಲಿ ಫಲಪುಷ್ಪ ಪ್ರದರ್ಶನ ಏರ್ಪಡಿಸಲಾಗಿದ್ದು, ಸಂಜೆ ವಿವಿಧ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದೆ.

ಇನ್ನು ಮೈಸೂರು ನಗರ ಮಾತ್ರವಲ್ಲದೇ ಹೊರ ವಲಯದಲ್ಲಿರುವ ಸೋಮನಾಥ ದೇವಾಲಯ, ತಲಕಾಡು, ನಂಜನಗೂಡು, ನಾಗರಹೊಳೆ, ಕೆಆರ್‌ಎಸ್‌ ಸೇರಿದಂತೆ ಹಲವು ಪ್ರವಾಸಿ ತಾಣಗಳಲ್ಲಿ ಜನಜಂಗುಳಿ ಕಂಡು ಬರುತ್ತಿದ್ದು, ವ್ಯಾಪಾರ-ವಹಿವಾಟು ಕೂಡ ಜೋರಾಗಿ ನಡೆಯುತ್ತಿದೆ.