ಯಾರು ಹಿತವರು ನಿಮಗೆ ಈ ನಾಲ್ವರೊಳಗೆ?

ನಾಳೆ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ವಾರ್ಷಿಕ ಸರ್ವಸದಸ್ಯರ ಸಭೆ ಮತ್ತು ಚುನಾವಣೆ ನಡೆಯಲಿದೆ. ಈ ಬಾರಿಯ ಚುನಾವಣೆ ಹಿಂದೆಂದಿಗಿಂತಲೂ ಭಿನ್ನವಾಗಿದೆ. ರಾಜಕೀಯ ಪಕ್ಷಗಳ ಮಂದಿ ತಮ್ಮ ಕ್ಷೇತ್ರಗಳ ಮತದಾರರನ್ನು ಓಲೈಸುವ ಪರಿಯಲ್ಲೇ ಇಲ್ಲೂ ಚುನಾವಣಾ ಪ್ರಚಾರದ ಸಂದರ್ಭದಲ್ಲಿ ಆಗುತ್ತಿದೆ ಎನ್ನುವುದೀಗ ಬಹಿರಂಗ ಗುಟ್ಟು.

ಈ ಚುನಾವಣೆ, ಅದರಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿರುವ ಹುರಿಯಾಳುಗಳು, ಅವರ ಯೋಚನೆ, ಯೋಜನೆಗಳು ಇವುಗಳ ಕುರಿತ ಪ್ರಸ್ತಾಪಕ್ಕೆ ಮೊದಲು ಹಿಂದಿನ ಒಂದೆರಡು ಸಾಲಿನ ಚುನಾವಣೆ, ಆಯ್ಕೆ, ಅವರು ಮಾಡಿದ ಕೆಲಸಗಳತ್ತ ಒಮ್ಮೆ ತಿರುಗಿ ನೋಡುವುದು ಅಗತ್ಯ. ಕಳೆದ ಸಾಲಿನಲ್ಲಿ ಅಧ್ಯಕ್ಷರಾಗಿ ಆಯ್ಕೆಯಾದವರು ಭಾ.ಮ.ಹರೀಶ್. ಅವರು ನಿರ್ಮಾಪಕರ ವಲಯದಿಂದ ಆರಿಸಿ ಬಂದಿದ್ದರು. ಚುನಾವಣೆಯಲ್ಲಿ ತಮ್ಮ ವಿರುದ್ಧ ಸ್ಪರ್ಧಿಸಿದ್ದ ಸಾ.ರಾ.ಗೋವಿಂದು ಅವರನ್ನು ಪರಾಭವಗೊಳಿಸಿ ಗೆದ್ದು ಬಂದಿದ್ದರು. ಚುನಾವಣೆ ಸರಿಯಾಗಿ ನಡೆದಿಲ್ಲ ಎಂದು ಸಾ.ರಾ.ಗೋವಿಂದು ಮತ್ತವರ ಬಳಗದ ಗೆಳೆಯರು ತಕರಾರು ಮಾಡಿ ಕಾನೂನು ಮೊರೆ ಹೋಗಿದ್ದರು. ಅದರ ಪರಿಣಾಮವಾಗಿ, ಯಾವುದೇ ಕಾರ್ಯಕ್ರಮಗಳನ್ನು ವಿಶೇಷವಾಗಿ, ಹೆಚ್ಚು ಆರ್ಥಿಕ ವೆಚ್ಚವಾಗುವ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳದಂತೆ ವಾಣಿಜ್ಯ ಮಂಡಳಿಗೆ ಆಯ್ಕೆಯಾದ ಭಾ.ಮ.ಹರೀಶ್ ಮತ್ತು ತಂಡಕ್ಕೆ ಆದೇಶವಿತ್ತು.

ಇದಕ್ಕೂ ಮೊದಲು ಪ್ರದರ್ಶಕ ವಲಯದಿಂದ ಜೈರಾಜ್, ವಿತರಕರ ವಲಯದಿಂದ ಎಸ್.ಎ.ಚಿನ್ನೇಗೌಡ ಮತ್ತು ನಿರ್ಮಾಪಕರ ವಲಯದಿಂದ ಸಾ.ರಾ.ಗೋವಿಂದು ಅವರು ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. ಯಾರದೇ ಅವಽಯಲ್ಲಿ ವಾರ್ಷಿಕ ಚುನಾವಣೆಯಲ್ಲಿ ತಡವಾದರೂ, ಭಾ.ಮ.ಹರೀಶ್ ಸಹಕಾರ ಸಂಘಗಳ ಪ್ರಬಂಧಕರ ಕಚೇರಿಗೆ ದೂರು ನೀಡಿ ನೋಟಿಸ್ ಕೊಡಿಸಿ ಕೂಡಲೇ ಆಗುವಂತೆ ಮಾಡುತ್ತಿದ್ದರು ಎನ್ನುವುದನ್ನು ವಾಣಿಜ್ಯ ಮಂಡಳಿಯ ಸದಸ್ಯರು ಹೇಳುತ್ತಾರೆ. ಈ ಬಾರಿ ಅಧ್ಯಕ್ಷ ಸ್ಥಾನಕ್ಕೆ ವಿತರಕರ ಸರದಿ. ಇದೇ ಮೊದಲ ಬಾರಿಗೆ ನಾಲ್ವರು ಅಧ್ಯಕ್ಷ ಸ್ಥಾನಕ್ಕೆ ಅಭ್ಯರ್ಥಿಗಳಾಗಿ ನಾಮಪತ್ರ ಸಲ್ಲಿಸಿದ್ದಾರೆ.

ಕಳೆದ ನಾಲ್ಕು ದಶಕಗಳಿಂದಲೂ ವಿತರಕರಾಗಿರುವ ವಿ.ಎಚ್.ಸುರೇಶ್ (ಮಾರ್ಸ್ ಸುರೇಶ್), ಶಿಲ್ಪಾ ಶ್ರೀನಿವಾಸ್ (ಇವರು ನಿರ್ಮಾಪಕರು ಕೂಡ), ನಿರ್ಮಾಪಕರಾಗಿಯೇ ಹೆಸರಾಗಿರುವ ಎನ್.ಎಂ.ಸುರೇಶ್ (ಎಕ್ಸ್‌ಕ್ಯೂಸ್ ಮಿ ಖ್ಯಾತಿ) ಹಾಗೂ ನಿರ್ಮಾಪಕ ಎ.ಗಣೇಶ್ ಸ್ಪರ್ಧಾ ಕಣದಲ್ಲಿದ್ದಾರೆ. ಈ ನಾಲ್ವರಲ್ಲಿ ಎ.ಗಣೇಶ್, ತಮಗೆ ರಾಘವೇಂದ್ರ ರಾಜಕುಮಾರ್ ಸೇರಿದಂತೆ ಸಾಕಷ್ಟು ಮಂದಿ ನಿರ್ಮಾಪಕರು, ಉದ್ಯಮಿಗಳು ಬೆಂಬಲವಾಗಿ ಇದ್ದಾರೆ ಎಂದು ಸಾಮಾಜಿಕ ತಾಣಗಳ ಮೂಲಕ ಹೇಳಿಕೊಂಡಿದ್ದಾರೆ. ಎನ್.ಎಂ.ಸುರೇಶ್ ಅವರಿಗೆ ಸಾ.ರಾ.ಗೋವಿಂದು ಅವರ ಸಕಾರಣ ಬೆಂಬಲ ಇದೆಯಂತೆ. ತಾವು ಮತ್ತು ಎಸ್.ಎ.ಚಿನ್ನೇಗೌಡ ಅವರು ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಸಂದರ್ಭದಲ್ಲಿ ಸುರೇಶ್ ತಮ್ಮ ನಾಮಪತ್ರವನ್ನು ಹಿಂತೆಗೆದು ಕೊಂಡದ್ದು ಇದಕ್ಕೆ ಕಾರಣ ಎಂದು ಅವರೇ ಹೇಳಿಕೊಂಡಿದ್ದಾರೆ.

ನಾಲ್ವರು ಸ್ಪರ್ಧಿ ಗಳಲ್ಲಿ ವಿತರಕ ಮಾರ್ಸ್ ಸುರೇಶ್ ಅವರನ್ನು ಹೊರತುಪಡಿಸಿ, ಉಳಿದ ಮೂವರು ಸಾರ್ವಜನಿಕ ಚುನಾವಣೆಯ ರೀತಿಯಲ್ಲಿಯೇ ಪ್ರಚಾರ ನಡೆಸುತ್ತಿದ್ದಾರೆ. ಎನ್.ಎಂ.ಸುರೇಶ್ ಅವರು ಮೊನ್ನೆ ಮೈಸೂರಿನಲ್ಲೂ ವಾಣಿಜ್ಯ ಮಂಡಳಿಯ ಸದಸ್ಯರ ಸಭೆ ಕರೆದು ಸಂತೋಷ ಕೂಟ ಏರ್ಪಡಿಸಿದ್ದರು. ಅಲ್ಲಿ ಸುಮಾರು ಪ್ರದರ್ಶಕರು, ವಿತರಕರು ಮತ್ತು ನಿರ್ಮಾಪಕರು ಸೇರಿದಂತೆ ಎಪ್ಪತ್ತು ಮಂದಿ ಮತದಾರರು ಇದ್ದಾರೆ. ಈ ಸಂತೋಷ ಕೂಟ ಬೆಂಗಳೂರಿನಲ್ಲಿ ನಿತ್ಯ ನಡೆಯುತ್ತಿರುತ್ತದೆ.

ಮೈಸೂರು ಮೂಲದ, ಎ.ಗಣೇಶ್ ಅವರ ಸಂತೋಷ ಕೂಟ, ಸಕಲೇಶಪುರ ದಲ್ಲಿನ ರೆಸಾರ್ಟ್ ಸೇರಿದಂತೆ ಬೆಂಗಳೂರಿನಿಂದ ಆಚೆಗೂ ವಿಸ್ತರಿಸಿಕೊಂಡಿರುವುದು ಅವರ ಜೊತೆಗಾರ ಮತದಾರರಿಗೆ ಖುಷಿ ತಂದ ವಿಷಯ. ಇನ್ನು ವಿತರಕರಾಗಿ, ನಿರ್ಮಾಪಕರಾಗಿ ಸಾಕಷ್ಟು ಏರಿಳಿತಗಳನ್ನು ಕಂಡು, ಕಳೆದ ಬಾರಿ ವಾಣಿಜ್ಯ ಮಂಡಳಿಯಲ್ಲಿ ಉಪಾಧ್ಯಕ್ಷರಾಗಿದ್ದ ಶಿಲ್ಪಾ ಶ್ರೀನಿವಾಸ್ ಅವರು ಮತಯಾಚನೆಗೆ ಮತದಾರರ ಮನೆಗೇ ತೆರಳುತ್ತಿದ್ದಾರೆ ಮಾತ್ರವಲ್ಲ, ಪುಟ್ಟದೊಂದು ಉಡುಗೊರೆಯೊಂದಿಗೆ ತಮಗೆ ಮತ ನೀಡಬೇಕು ಎಂದು ಕೋರುತ್ತಿದ್ದಾರೆ. ಉಡುಗೊರೆಯಲ್ಲಿ ಬೆಳ್ಳಿತಟ್ಟೆ, ದೀಪಗಳು, ಸಿಹಿ ತಿನಿಸು, ಶಾಲು ಇತ್ಯಾದಿ ಇವೆ ಎನ್ನಲಾಗಿದೆ.

ಎರಡು ಬಾರಿ ಗೌರವ ಕಾರ್ಯದರ್ಶಿಯಾಗಿ, ಎರಡು ಬಾರಿ ಉಪಾಧ್ಯಕ್ಷರಾಗಿ ವಾಣಿಜ್ಯ ಮಂಡಳಿಯಲ್ಲಿ ಸೇವೆ ಸಲ್ಲಿಸಿರುವ ಮಾರ್ಸ್ ಸುರೇಶ್ ಚುನಾವಣಾ ರಾಜಕೀಯದಿಂದ ದೂರವಿದ್ದವರು. ವಿತರಕ ವಲಯದ ಹಿರಿಯರ ಒತ್ತಾಯದ ಮೇರೆಗೆ ಚುನಾವಣೆಯಲ್ಲಿ ಸ್ಪರ್ಧಿಸುತ್ತಿದ್ದು, ಸಂತೋಷಕೂಟ, ಉಡುಗೊರೆಗಳಿಂದ ಅವರು ದೂರ. ಅವರ ತಂಡದಲ್ಲಿ ಹಂಚಿಕಾ ವಲಯದ ಹಿರಿಯರಾದ ನಾರಾಯಣ ರೆಡ್ಡಿ, ಕರಿಸುಬ್ಬು ಮತ್ತು ನಿರ್ಮಾಪಕರ ವಲಯದ ರೂಪಾ ಅಯ್ಯರ್ ಇದ್ದಾರೆ.

ಮೊನ್ನೆ ಈ ತಂಡದ ಪತ್ರಿಕಾಗೋಷ್ಠಿಯ ನಂತರ ರೂಪಾ ಅಯ್ಯರ್ ಅವರು, ‘ಸಂತೋಷ ಕೂಟ ಹಮ್ಮಿಕೊಳ್ಳುವುದು ನಮಗೆ ಸಾಧ್ಯವಿಲ್ಲದೆ ಏನಲ್ಲ. ಸಂತೋಷ ಕೂಟ ಮಾಡಿ ಗೆಲ್ಲುವುದು ಬೇಕಾಗಿಲ್ಲ. ಗೆದ್ದ ಮೇಲೆ ಬೇಕಾದರೆ ಸಂತೋಷ ಕೂಟ ಮಾಡೋಣ’ ಎಂದ ಮಾತು ಉಳಿದ ಸ್ಪಽಗಳಿಗೆ ಅಷ್ಟೇನೂ ಪಥ್ಯವಾಗುವಂತಹದಲ್ಲ. ರೂಪಾ ಅಯ್ಯರ್ ಕೊರೊನಾ ದಿನಗಳಲ್ಲಿ ಚಿತ್ರೋ ದ್ಯಮಿಗಳಿಗೆ ಮಾಡಿದ ನೆರವನ್ನು ಚುನಾವಣೆಯ ವೇಳೆ ಉದ್ಯಮದ ಮಂದಿ ನೆನಪಿಸಿಕೊಳ್ಳುತ್ತಿದ್ದಾರೆ.

ಹ್ಞಾಂ. ಅಧ್ಯಕ್ಷರಾಗಿ ಆಯ್ಕೆಯಾಗಿ ಬಂದರೆ ತಾವೇನು ಮಾಡುತ್ತೇವೆ ಎನ್ನುವುದನ್ನು ಹೇಳಿದ್ದಾರೆ ಸ್ಪರ್ಧಿ ಗಳು. ಎ.ಗಣೇಶ್ ಅವರು ನಿರ್ಮಾಪಕ,  ಹಂಚಿಕೆದಾರ ಮತ್ತು ಪ್ರದರ್ಶಕ ವಲಯಗಳಿಗೆ ಕಲ್ಯಾಣ ನಿಧಿಯೊಂದನ್ನು ಸ್ಥಾಪಿಸಿ, ಆ ಮೂಲಕ ಅರವತ್ತು ವರ್ಷ ದಾಟಿದ ಸದಸ್ಯರಿಗೆ ನೆರವಾಗುವ ಕೆಲಸ ಮಾಡುವುದರ ಜೊತೆಗೆ, ಸರ್ಕಾರದ ಮಟ್ಟದಲ್ಲಿ ಸಾಕಷ್ಟು ಸಂಪರ್ಕ ತಮಗೆ ಇರುವುದರಿಂದ ಅಲ್ಲಿ ಆಗಬೇಕಾದ ಕೆಲಸಗಳನ್ನು ಸುಲಭವಾಗಿ ಮಾಡಿಸುತ್ತೇನೆ. ಅಲ್ಲದೇ ವಾಣಿಜ್ಯ ಮಂಡಳಿಯ ಕಾನೂನಿನಲ್ಲಿ ಇಲ್ಲದೆ ಇದ್ದರೂ, ಹೊರಗಡೆಯಿಂದ ಆರ್ಥಿಕ ನೆರವನ್ನು ಪಡೆದು ತಮ್ಮ ಯೋಜನೆಗಳನ್ನು ಜಾರಿಗೆ ತರುವುದಾಗಿಯೂ ಹೇಳುತ್ತಾರೆ.

ವಿತರಕರಾಗಿ ಸಾಕಷ್ಟು ಚಿತ್ರಗಳನ್ನು ಹಂಚಿಕೆ ಮಾಡಿರುವ, ನಿರ್ಮಾಪಕರೂ ಆಗಿರುವ ಶಿಲ್ಪಾ ಶ್ರೀನಿವಾಸ್ ಹೇಳುತ್ತಾರೆ: ನಾವು ಚಿತ್ರ ನಿರ್ಮಾಣ ಮಾಡುವಾಗ ಬಂಡವಾಳ ಹಾಕಿರುತ್ತೇವೆ. ನಿರ್ಮಾಣ ನಿರ್ವಾಹಕರು ಮತ್ತು ನಿರ್ದೇಶಕರು ಹೇಳಿದ ಹಾಗೆ ಖರ್ಚು ಮಾಡುತ್ತೇವೆ. ನಮಗೆ ಅದರ ಸರಿಯಾದ ರೀತಿ ಗೊತ್ತಿರುವುದಿಲ್ಲ. ಹಾಗಾಗಿ ಚುನಾವಣೆಗೆ ಅಂತಲೇ ಒಂದು ಸಲಹೆಗಾರರ ತಂಡ ಇದೆ. ಅವರು ಹೇಳಿದಂತೆ ಪ್ರಚಾರ ಮಾಡುತ್ತಿದ್ದೇನೆ. ಗೆದ್ದರೆ, ಚಿತ್ರೋದ್ಯಮಕ್ಕೆ ಸಹಕಾರಿಯಾಗುವ ಒಂದಷ್ಟು ಕೆಲಸಗಳನ್ನು ಮಾಡಬೇಕು ಎಂದುಕೊಂಡಿದ್ದೇನೆ. ವಿಶೇಷವಾಗಿ ವಾಣಿಜ್ಯ ಮಂಡಳಿಯ ಸದಸ್ಯರ ಕುಟುಂಬದ ಕ್ಷೇಮಾಭಿವೃದ್ಧಿ ಟ್ರಸ್ಟ್ ಸ್ಥಾಪಿಸಿ ಆ ಮೂಲಕ ನೆರವಾಗಬೇಕು.

ಗಣೇಶ್ ಅವರಿಗೆ ನಿರ್ಮಾಪಕರಿಗೆ ಆಗುವ ಸಮಸ್ಯೆಗಳನ್ನು ಪರಿಹರಿಸುವ ನಿಟ್ಟಿನಲ್ಲಿ ಯೋಚನೆ ಇದೆ. ಚಿತ್ರ ಬಿಡುಗಡೆಗೆ ಪ್ರತಿವಾರ ಯುಎಫ್‌ಒಗೆ ಹನ್ನೊಂದು ಸಾವಿರ ರೂ. ಶುಲ್ಕ ನೀಡಬೇಕಾಗುತ್ತದೆ. ಕೇರಳದಲ್ಲಿ ಈಗಾಗಲೇ ಅಲ್ಲಿನದೇ ಆದ ಒಂದು ವ್ಯವಸ್ಥೆ ಇದೆ. ಇಲ್ಲೂ ಹಾಗೆ ಮಾಡುವುದರ ಜೊತೆಗೆ ಚಿತ್ರಮಂದಿರಗಳಲ್ಲಿ ಶೇಕಡಾವಾರು ಬಾಡಿಗೆ ವ್ಯವಸ್ಥೆ, ವಾಣಿಜ್ಯ ಮಂಡಳಿಯ ಸದಸ್ಯರಲ್ಲಿ ಪ್ರತಿಶತ 35ರಷ್ಟು ಮಂದಿಗೆ ಅರವತ್ತು ವರ್ಷ ವಯಸ್ಸು ದಾಟಿದ್ದು ಅವರಿಗೆ ವಿಶ್ರಾಂತಿ ವೇತನ ನೀಡುವ ಯೋಜನೆ ಕೂಡ ಇವರ ಕಾರ್ಯಕ್ರಮದಲ್ಲಿದೆ.

ಸಿನಿಮಾ ವಿತರಣೆ, ಪ್ರದರ್ಶನಗಳ ವೇಳೆ ಎದುರಾಗುವ ಸಮಸ್ಯೆಗಳನ್ನು ಪರಿಹರಿಸುವ ನಿಟ್ಟಿನಲ್ಲಿ ಪ್ರಯತ್ನ, ವಾಣಿಜ್ಯ ಮಂಡಳಿಯಿಂದ ದೂರ ಉಳಿ ದಿರುವ ಪ್ರದರ್ಶಕರನ್ನು ಮರಳಿಸುವ ಯೋಜನೆ, ಹಿಂದೆ ಡಾ.ಜಯಮಾಲ ಅವರ ಅವಽಯಲ್ಲಿ ಆರಂಭಿಸಿ ನಂತರದ ದಿನಗಳಲ್ಲಿ ಸ್ಥಗಿತವಾದ ಗೃಹನಿರ್ಮಾಣ ಸಹಕಾರ ಸಂಘಕ್ಕೆ ಚಾಲನೆ, ಪ್ರವೇಶ ಶುಲ್ಕ ನಿಯಂತ್ರಣ, ಕಾರ್ಮಿಕರೂ ಸೇರಿದಂತೆ ಚಿತ್ರೋದ್ಯಮದ ಎಲ್ಲ ವಲಯಗಳ ಮಂದಿಗೆ ಸರ್ಕಾರಗಳಿಂದ ಸಿಗುವ ಸೌಲಭ್ಯಗಳನ್ನು ಒದಗಿಸುವ ನಿಟ್ಟಿನಲ್ಲಿ ಪ್ರಯತ್ನ ಹೀಗೆ ಮೂಲಭೂತ ಯೋಜನೆ ಮಾರ್ಸ್ ಸುರೇಶ್ ಮತ್ತವರ ತಂಡದ್ದು.

ಚುನಾವಣೆಯಲ್ಲಿ ಮತದಾರರು ಯಾರನ್ನು ಅಧ್ಯಕ್ಷ ಸ್ಥಾನಕ್ಕೆ ತರುತ್ತಾರೆ ಎನ್ನುವುದು ನಾಳೆ ಸಂಜೆಯ ವೇಳೆಗೆ ತಿಳಿಯಲಿದೆ. ಸಂತೋಷ ಕೂಟ ಮೇಜವಾನಿ, ಉಡುಗೊರೆಗಳು ಮತಗಳಾಗಿ ಪರಿವರ್ತನೆ ಆಗುವುದೇ ನೋಡಬೇಕು. ಈ ಬಾರಿ ಒಂದು ಸಾವಿರಕ್ಕೂ ಹೆಚ್ಚು ನಿರ್ಮಾಪಕರು, ೩೫೦ಕ್ಕೂ ಹೆಚ್ಚು ವಿತರಕರು, ಒಂದು ನೂರಕ್ಕೂ ಹೆಚ್ಚು ಪ್ರದರ್ಶಕರು ಮತದಾರರ ಪಟ್ಟಿಯಲ್ಲಿದ್ದಾರೆ.

‘ನಾನೇ ಗೆಲ್ಲುತ್ತೇನೆ’ ಎನ್ನುವ ಗಣೇಶ್, ಗೆದ್ದರೆ ಕೆಲಸ ಮಾಡುತ್ತೇನೆ’ ಎನ್ನುವ ಶಿಲ್ಪಾ ಶ್ರೀನಿವಾಸ್, ಹಿಂದೆ ಎರಡು ಬಾರಿ ನಾಮಪತ್ರ ಹಿಂತೆಗೆದುಕೊಂಡಿದ್ದೇನೆ. ಈ ಬಾರಿ ಸ್ಪ ರ್ಧಿ  ಸಿದ್ದೇನೆ. ಮಾರ್ಸ್ ಸುರೇಶ್ ಕೂಡ ಒಳ್ಳೆಯ ಅಭ್ಯರ್ಥಿ, ಸಮರ್ಥರು’ ಎನ್ನುವ ಎನ್.ಎಂ.ಸುರೇಶ್, ಈ ಬಾರಿ ಸುರೇಶ್ ವರ್ಸಸ್ ಸುರೇಶ್ ಎನ್ನುತ್ತಿರುವ ಗಾಂಧಿನಗರ… ಗೆಲುವಿನ ನಗೆ ಬೀರುವುದು ಯಾರು ಎಂಬುದನ್ನು ಕಾದು ನೋಡೋಣ.