ಬ್ರಿಕ್ಸ್ ಶೃಂಗಸಭೆ: ಡಾಲರ್‌ಗೆ ಪರ್ಯಾಯ ಇನ್ನೂ ದೂರ

 ಡಾಲರ್‌ಗೆ ಪರ್ಯಾಯ ಕರೆನ್ಸಿಯನ್ನು (ಚಲಾವಣಾ ಹಣ) ರೂಪಿಸುವ ಬ್ರಿಕ್ಸ್ ಸಂಘಟನೆಯ (ಬ್ರೆಜಿಲ್, ರಷ್ಯಾ, ಇಂಡಿಯಾ, ಚೀನಾ, ದಕ್ಷಿಣ ಆಫ್ರಿಕಾ) ಪ್ರಯತ್ನಗಳು ಸದ್ಯಕ್ಕೆ ಯಶಸ್ಸು ಪಡೆದಿಲ್ಲ. ದಕ್ಷಿಣ ಆಫ್ರಿಕಾದ ಜೋಹಾನ್ಸ್‌ಬರ್ಗ್‌ನಲ್ಲಿ ಇದೀಗ ತಾನೆ ಅಂತ್ಯವಾಗಿರುವ ಈ ದೇಶಗಳ ಶೃಂಗಸಭೆಯ ನಿರ್ಣಯಗಳನ್ನು ನೋಡಿದರೆ ಪ್ರತ್ಯೇಕ ಬ್ರಿಕ್ಸ್ ಕರೆನ್ಸಿ ಜಾರಿಗೆ ತರುವ ವಿಚಾರ ಇನ್ನೂ ದೂರ ಇದ್ದಂತೆ ಕಾಣುತ್ತಿದೆ. ಇಂಥ ಉದ್ದೇಶ ಈ ಶೃಂಗಸಭೆಗೆ ಇರಲೇ ಇಲ್ಲ ಎಂದು ದಕ್ಷಿಣ ಆಫ್ರಿಕಾ ಹೇಳಿರುವುದು ಪರಿಸ್ಥಿತಿಗೆ ಕನ್ನಡಿ ಹಿಡಿದಂತಾಗಿದೆ. ಮೂಲಭೂತವಾಗಿ ಆ ಕುರಿತಂತೆ ವಿವಿಧ ಬ್ರಿಕ್ಸ್ ದೇಶಗಳ ನಡುವೆ ಇರುವ ಭಿನ್ನಾಭಿಪ್ರಾಯಗಳೇ ಪ್ರತ್ಯೇಕ ಕರೆನ್ಸಿ ವಿಚಾರ ತೀರ್ಮಾನವಾಗದಿರಲು ಕಾರಣ.

ಹಾಗೆ ನೋಡಿದರೆ ಡಾಲರ್ ಕೈಬಿಟ್ಟು ತನ್ನದೇ ಸ್ವತಂತ್ರ ಕರೆನ್ಸಿ ಚಲಾವಣೆಗೆ ತರುವ ಯೋಚನೆ ಬ್ರಿಕ್ಸ್ ನಾಯಕರಿಗೆ ಮೊದಲಿನಿಂದಲೂ ಇದೆ. ಆದರೆ ಈ ವಿಚಾರದಲ್ಲಿ ಒಮ್ಮತ ಮೂಡುತ್ತಿಲ್ಲ ಅಷ್ಟೆ. ಡಾಲರ್‌ಗೆ ಪರ್ಯಾಯ ಹಣ ರೂಪಿಸುವ ದಿನ ದೂರವಿಲ್ಲ ಎಂದು ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೇ ಹೇಳುತ್ತಿದ್ದಾರೆಂದರೆ ಅದು ಇಂದಲ್ಲ ನಾಳೆ ರೂಪಿತವಾಗುವುದು ಖಚಿತ. ಆದರೆ ಈ ಪ್ರಯತ್ನದ ಹಿಂದೆ ರಷ್ಯಾ ಇರುವುದು ಅಂತಾರಾಷ್ಟ್ರೀಯ ವಾಗಿ ಮುಸುಕಿನ ಯುದ್ಧದ ನೆರಳು ಕಾಣುವಂತಾಗಿದೆ. ಇದೊಂದು ರೀತಿಯಲ್ಲಿ ಅಮೆರಿಕ ಮತ್ತು ಯೂರೋಪಿನ ಶಕ್ತಿ ರಾಜಕಾರಣಕ್ಕೆ ಸವಾಲೆಸೆಯುವ ಪ್ರಯತ್ನ ಎಂದು ಅರ್ಥೈಸಲಾಗುತ್ತಿದೆ. ಬ್ರಿಕ್ಸ್ ಸಂಘಟನೆಯನ್ನು ಬಲಗೊಳಿಸುವ ಪ್ರಯತ್ನಗಳ ಹಿಂದೆ ಇಂಥದೊಂದು ಅಂಶ ಇರಬಹುದು. ಆದರೆ ವಿವಿಧ ವಸಾಹತುಗಳ ಭಾಗಗಳಾಗಿದ್ದ ದೇಶಗಳು ಎದುರಿಸುತ್ತಿರುವ ಅಭಿವೃದ್ಧಿ ಸಮಸ್ಯೆಗಳ ಹಿನ್ನೆಲೆಯಲ್ಲಿ ಬ್ರಿಕ್ಸ್ ಬಲಪಡಿಸುವ ಅಗತ್ಯ ಇದೆ ಎನ್ನುವುದನ್ನು ಯಾರೂ ಅಲ್ಲಗಳೆಯಲು ಸಾಧ್ಯವಿಲ್ಲ.

ಜೋಹಾನ್ಸ್‌ಬರ್ಗ್ ಶೃಂಗಸಭೆಯಲ್ಲಿ ಬ್ರೆಜಿಲ್‌ನ ಅಧ್ಯಕ್ಷ ಲೂಲಾ ಡ ಸಿಲ್ವಾ ಈ ಪ್ರಶ್ನೆಯನ್ನು ಎತ್ತಿ ಡಾಲರ್‌ಗೆ ಪರ್ಯಾಯ ಕರೆನ್ಸಿ ಘೋಷಿಸದೆ ಹೋದರೆ ವಾಣಿಜ್ಯ ವಹಿವಾಟು ಮತ್ತು ಆರ್ಥಿಕ ವಲಯದಲ್ಲಿ ಗೊಂದಲಗಳು ಏಳುತ್ತವೆ ಎಂದು ಎಚ್ಚರಿಕೆ ನೀಡಿದರು. ಎರಡು ದೇಶಗಳ ವಾಣಿಜ್ಯ ವಹಿವಾಟನ್ನು ಮೂರನೆಯ ದೇಶದ ಕರೆನ್ಸಿ ಡಾಲರ್‌ನಲ್ಲಿ ಏಕೆ ನಡೆಸಬೇಕು? ಎಂದು ಅವರು ಪ್ರಶ್ನಿಸಿದರು. ಬಹಳ ದೇಶಗಳ ಅಭಿಪ್ರಾಯವೂ ಇದೇ ಆಗಿದ್ದರೂ ಕೆಲವು ಸಮಸ್ಯೆಗಳಿಂದ ಅದು ಸಾಧ್ಯವಾಗುತ್ತಿಲ್ಲದಿರುವುದು ವಾಸ್ತವ ಸಂಗತಿ. ಚೀನಾ ಅಧ್ಯಕ್ಷ ಕ್ಸಿಜಿನ್‌ಪಿಂಗ್ ಅವರ ಮನಸ್ಸಿನಲ್ಲಿ ತಮ್ಮ ದೇಶದ ಕರೆನ್ಸಿ ಹುವಾನ್ ಹಣವೇ ಪರ್ಯಾಯವಾಗಲಿ ಎಂಬ ಆಸೆ ಇದೆ. ಇದರಿಂದಾಗಿಯೇ ಅವರು ಬ್ರಿಕ್ಸ್ ಸಂಘಟನೆಗೆ ಮತ್ತಷ್ಟು ದೇಶಗಳನ್ನು ಬೇಗ ಸದಸ್ಯರನ್ನಾಗಿ ಮಾಡ ಬೇಕೆಂದು ಒತ್ತಾಯಿಸುತ್ತಾ ಬಂದಿದ್ದಾರೆ.

ಈಗಾಗಲೇ ನೂರಾರು ದೇಶಗಳು ಚೀನಾದ ಜೊತೆ ವಹಿವಾಟಿಗೆ ಹುವಾನ್ ಕರೆನ್ಸಿಯನ್ನೇ ಬಳಸುತ್ತಿವೆ. ಆ ದೇಶಗಳಿಗೆ ಸದಸ್ಯತ್ವ ಕೊಡಿಸಿದರೆ ಸಹಜವಾ ಗಿಯೇ ಹುವಾನ್ ಬ್ರಿಕ್ಸ್ ದೇಶಗಳ ಕರೆನ್ಸಿ ಆಗುತ್ತದೆ ಎನ್ನುವುದು ಕ್ಸಿಜಿನ್‌ಪಿಂಗ್ ಅವರ ಲೆಕ್ಕಾಚಾರ. ಆದರೆ ಕರೆನ್ಸಿ ವಿಚಾರದಲ್ಲಿ ಚೀನಾದ ಪ್ರಾಬಲ್ಯವನ್ನು ಒಪ್ಪಲು ಭಾರತ ಸಿದ್ಧವಿಲ್ಲ. ಭಾರತ ಮತ್ತು ಚೀನಾ ಸಾಂಪ್ರದಾಯಿಕವಾಗಿ ಪರಸ್ಪರ ದ್ವೇಷಿಸುವ ದೇಶಗಳು. ಚೀನಾ ಜೊತೆ ಭಾರತ ಉತ್ತಮ ವಾಣಿಜ್ಯ ಬಾಂಧವ್ಯ ಹೊಂದಿರುವುದು ನಿಜವಾದರೂ ಅಮೆರಿಕದ ಪ್ರಾಬಲ್ಯ ಹೋಗಿ ಚೀನಾ ಪ್ರಾಬಲ್ಯದ ಕೆಳಗೆ ಸಿಕ್ಕಿಕೊಳ್ಳುವುದು ಭಾರತಕ್ಕೆ ಇಷ್ಟವಿಲ್ಲ.

ಪ್ರತ್ಯೇಕ ಬ್ರಿಕ್ಸ್ ಕರೆನ್ಸಿ ಚಲಾವಣೆಗೆ ತರುವುದಕ್ಕೆ ಭಾರತಕ್ಕೆ ವಿರೋಧ ಇಲ್ಲ. ಆದರೆ ಚೀನಾ ಕರೆನ್ಸಿ ಹುವಾನ್ ಅನ್ನು ಬ್ರಿಕ್ಸ್ ಕರೆನ್ಸಿ ಮಾಡುವುದಕ್ಕೆ ಮಾತ್ರ ವಿರೋಧ. ಹೀಗಾಗಿಯೇ ಹಿಂದೆ–ಮುಂದೆ ನೋಡದೆ ಎಲ್ಲ ದೇಶಗಳನ್ನೂ ಬ್ರಿಕ್ಸ್ ಸದಸ್ಯರನ್ನಾಗಿ ಮಾಡಿಕೊಳ್ಳುವುದು ಅಪಾಯಕಾರಿ ಎಂದು ಭಾರತ ಹೇಳುತ್ತಾ ಬಂದಿದೆ.

ಕೆಲವು ನಿರ್ದಿಷ್ಟ ಮಾನದಂಡಗಳನ್ನು ಆಧರಿಸಿ ಸದಸ್ಯತ್ವ ನೀಡಬೇಕೆಂಬ ಭಾರತದ ವಾದಕ್ಕೆ ಹೆಚ್ಚು ಒಲವು ಸಿಕ್ಕಿದ್ದರಿಂದ ಚೀನಾದ ಅಧ್ಯಕ್ಷ ಕ್ಷಿ ಅವರು ನಿರಾಶೆಗೊಂಡು ಸುಮ್ಮನಾದರು ಎಂದು ಹೇಳಲಾಗಿದೆ. ಬಹುಶಃ ಇದೇ ಕಾರಣಕ್ಕೆ ಕ್ಷಿ ಅವರು ಶೃಂಗಸಭೆಯ ಭಾಗವಾಗಿ ನಡೆದ ವಾಣಿಜ್ಯ ವಹಿವಾಟು ಸಭೆಗೆ ಗೈರುಹಾಜರಾದರು ಎನ್ನುವ ವದಂತಿ ಇದೆ. ಹಾಗೆ ನೋಡಿದರೆ ಬ್ರಿಕ್ಸ್ ವಹಿವಾಟು ತನ್ನ ಕರೆನ್ಸಿ ರೂಬೆಲ್‌ನಲ್ಲಿ ನಡೆಯಬೇಕೆಂಬುದು ರಷ್ಯಾದ ಆಸೆಯಾಗಿತ್ತು. ಡಾಲರ್‌ಗೆ ರೂಬೆಲ್ ಪರ್ಯಾಯ ಮಾಡಿದರೆ ಅಮೆರಿಕ್ಕೆ ಪಾಠ ಕಲಿಸಿದಂತಾಗುತ್ತದೆ ಎಂದು ರಷ್ಯಾ ಭಾವಿಸಿತ್ತು. ಆದರೆ ಅಂತಾರಾಷ್ಟ್ರೀಯವಾಗಿ ರೂಬೆಲ್ ಅಷ್ಟು ಚಲಾವಣೆಯಲ್ಲಿ ಇಲ್ಲ. ಉಕ್ರೇನ್ ಮೇಲೆ ರಷ್ಯಾ ದಾಳಿ ಹಿನ್ನೆಲೆಯಲ್ಲಿ ರಷ್ಯಾದ ಮೇಲೆ ಕಠಿಣ ಆರ್ಥಿಕ ವಾಣಿಜ್ಯ ನಿರ್ಬಂಧಗಳು ಜಾರಿಯಲ್ಲಿವೆ. ಹೀಗಾಗಿ ಮಾರುಕಟ್ಟೆಯಲ್ಲಿ ರೂಬೆಲ್ ಪ್ರಾಬಲ್ಯ ಮತ್ತು ಬೆಲೆ ಕಡಿಮೆ. ಈ ಹಿನ್ನೆಲೆಯಲ್ಲಿ ಚೀನಾದ ಕರೆನ್ಸಿ ಹುವಾನ್ ಬ್ರಿಕ್ಸ್‌ನ ಕರೆನ್ಸಿಯಾದರೆ ತನ್ನ ಅಭ್ಯಂತರವೇನೂ ಇಲ್ಲ ಎಂದು ರಷ್ಯಾ ಅಧ್ಯಕ್ಷ ಪುಟಿನ್ ಹಿಂದೆಯೇ ಹೇಳಿದ್ದರು.

ವಿಶ್ವದಲ್ಲಿ ಚೀನಾ ಈಗ ಪ್ರಮುಖ ವಾಣಿಜ್ಯ ವಹಿವಾಟು ದೇಶವಾಗಿರುವುದರಿಂದ ಡಾಲರ್‌ಗೆ ಸವಾಲೆಸೆಯುವುದು ಸುಲಭ ಎಂದು ಕೂಡ ಹಲವು ಬ್ರಿಕ್ಸ್ ದೇಶಗಳು ಅಭಿಪ್ರಾಯಪಟ್ಟಿದ್ದವು. ಆದರೆ ಚೀನಾದ ಕರೆನ್ಸಿಯನ್ನು ಬ್ರಿಕ್ಸ್ ಕರೆನ್ಸಿಯಾಗಿ ಚಲಾವಣೆಗೆ ತರುವುದಕ್ಕೆ ಭಾರತದ ವಿರೋಧವಿತ್ತು. ಬಹಿರಂಗವಾಗಿ ವಿರೋಧ ವ್ಯಕ್ತಮಾಡದಿದ್ದರೂ ಹುವಾನ್ ಕರೆನ್ಸಿ ಮಾಡುವ ವಿಚಾರ ಬ್ರಿಕ್ಸ್ ಸಭೆಗಳಲ್ಲಿ ಚರ್ಚೆಗೆ ಬರದಂತೆ ನೋಡಿಕೊಂಡಿತು. ಕರೆನ್ಸಿಯಾಗಿ ಹುವಾನ್ ಬಳಸಲಾರಂಭಿಸಿದರೆ ಚೀನಾದ ಪ್ರಾಬಲ್ಯ ಹೆಚ್ಚಿ ತನ್ನನ್ನು ಆರ್ಥಿಕವಾಗಿ ತುಳಿಯಲು ಚೀನಾ ಪ್ರಯತ್ನಿಸಬಹುದು ಎನ್ನುವುದು ಭಾರತದ ಆತಂಕ. ಹೀಗಾಗಿಯೇ ಕರೆನ್ಸಿ ವಿಚಾರ ಅಂತಿಮ ಹಂತಕ್ಕೆ ಬರದಂತೆ ಭಾರತ ನೋಡಿಕೊಂಡಂತೆ ಕಾಣುತ್ತಿದೆ. ಇದೇನೇ ಇದ್ದರೂ ಬ್ರಿಕ್ಸ್ ಮುಂಬರುವ ದಿನಗಳಲ್ಲಿ ಪ್ರಬಲ ಗುಂಪಾಗಿ ಪ್ರವರ್ಧಮಾನಕ್ಕೆ ಬರುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಒಂದಲ್ಲ ಒಂದು ದಿನ ಬ್ರಿಕ್ಸ್ ತನ್ನದೇ ಆದ ಕರೆನ್ಸಿಯನ್ನು ಜಾರಿಗೆ ತರಬೇಕಾಗುತ್ತದೆ. ಸದ್ಯಕ್ಕೆ ಆಯಾ ದೇಶಗಳ ಕರೆನ್ಸಿಯಲ್ಲಿಯೇ ವಾಣಿಜ್ಯ ವಹಿವಾಟು ಮತ್ತು ಹಣದ ಚಲಾವಣೆ ಮಾಡಲು ನಿರ್ಧರಿಸಲಾಗಿದೆ.

ಇದರಲ್ಲಿಯೂ ಸಮಸ್ಯೆಗಳಿವೆ. ಈ ಒಂದು ವಿಚಾರದಲ್ಲಿ ಮಾತ್ರ ಜೋಹಾನ್ಸ್ ಬರ್ಗ್ ಶೃಂಗಸಭೆ ಹಿನ್ನಡೆ ಅನುಭವಿಸಿದೆ. ಆದರೆ ಬ್ರಿಕ್ಸ್ ಸಂಘಟನೆಯ ವಿಸ್ತರಣೆ ವಿಚಾರದಲ್ಲಿ ಮಹತ್ವದ ಹೆಜ್ಜೆ ಇರಿಸಿದೆ. ಬ್ರಿಕ್ಸ್ ಸೇರಲು 40 ದೇಶಗಳು ಮುಂದೆ ಬಂದಿವೆ ಎಂದು ಹೇಳಲಾಗಿದ್ದರೂ ಅಽಕೃತವಾಗಿ ಅರ್ಜಿ ಸಲ್ಲಿಸಿದ ದೇಶಗಳು 19 ಅಥವಾ 20. ಫ್ರಾನ್ಸ್ ಅರ್ಜಿಯನ್ನು ತಿರಸ್ಕರಿಸ ಲಾಗಿದೆ. ಅರ್ಜಿ ಹಾಕಿಕೊಂಡ 19 ದೇಶಗಳ ಪೈಕಿ ಬಹುಪಾಲು ದೇಶಗಳನ್ನು ಸಂಘಟನೆಗೆ ಸೇರಿಸಿಕೊಳ್ಳಬಹುದೆಂದು ಚೀನಾ ವಾದಿಸಿತು. ಬ್ರಿಕ್ಸ್ ವಿಸ್ತರಣೆಗೆ ತನ್ನ ವಿರೋಧ ಇಲ್ಲ, ಆದರೆ ಅಳೆದು ತೂಗಿ ಕೆಲವು ಮಾನದಂಡಗಳನ್ನು ಅನುಸರಿಸಿ ಸದಸ್ಯತ್ವ ನೀಡಬೇಕೆಂಬ ಭಾರತದ ನಿಲುವಿಗೆ ಹೆಚ್ಚು ಬೆಂಬಲ ಸಿಕ್ಕಿದ್ದರಿಂದ ಮೊದಲ ಹಂತದಲ್ಲಿ ಇಥಿಯೋಪಿಯಾ, ಸೌದಿ ಅರೇಬಿಯಾ, ಯುಎಇ, ಈಜಿಪ್ಟ್, ಅರ್ಜೆಂಟೀನಾ ಮತ್ತು ಇರಾನ್ ಈ ಆರು ದೇಶಗಳಿಗೆ ಸದಸ್ಯತ್ವ ನೀಡಲು ನಿರ್ಧರಿಸಲಾಗಿದೆ. ಈ ದೇಶಗಳು ಮುಂದಿನ ವರ್ಷದ ಜನವರಿ ಒಂದರಿಂದ ಅಽಕೃತವಾಗಿ ಸದಸ್ಯ ರಾಷ್ಟ್ರ್ರಗಳಾಗಲಿವೆ.

ಈ ೬ ದೇಶಗಳಿಗೆ ಸದಸ್ಯತ್ವ ಸಿಕ್ಕಿದ್ದರಿಂದ ಬ್ರಿಕ್ಸ್ ಎಷ್ಟು ಬಲಿಷ್ಠವಾಯಿತೆಂದರೆ ಅಮೆರಿಕ ನೇತೃತ್ವದ ದೇಶಗಳ ಕೂಟಗಳಿಗೆ ನಡುಕ ಹುಟ್ಟಿದೆ ಎನ್ನುವ ಮಾತಿನಲ್ಲಿ ಉತ್ಪ್ರೇಕ್ಷೆಯಿಲ್ಲ. ಜಗತ್ತಿನ ಒಟ್ಟು ಆಂತರಿಕ ಉತ್ಪಾದನೆ (ಜಿಡಿಪಿ)ಯಲ್ಲಿ ಶೇ.36 ಭಾಗ ಈಗ ಬ್ರಿಕ್ಸ್ ದೇಶಗಳದ್ದಾಗುತ್ತದೆ. ವಿಶ್ವದ ಒಟ್ಟು ತೈಲ ಉತ್ಪಾದನೆಯಲ್ಲಿ ಶೇ.80 ಭಾಗ ಬ್ರಿಕ್ಸ್ ದೇಶಗಳದ್ದೇ ಆಗುತ್ತದೆ. ವಿಶ್ವದ ಜನಸಂಖ್ಯೆಯಲ್ಲಿ ಶೇ.೪೬ ಭಾಗ ಈ ಬ್ರಿಕ್ಸ್ ವ್ಯಾಪ್ತಿಗೆ ಬರುತ್ತದೆ. ಬಹುಶಃ ಶ್ರೀಮಂತ ದೇಶಗಳ ಸಂಘಟನೆ ಗಳಾದ ಜಿ-7 ಮತ್ತು ಜಿ-20ಗೆ ಸವಾಲೆಸೆಯುವ ಸ್ಥಾನದಲ್ಲಿ ಈಗ ಬ್ರಿಕ್ಸ್ ಇದ್ದಂತಾಗಿದೆ. ಆದರೆ ಈ ಅಂಕಿ ಅಂಶಗಳಿಂದಷ್ಟೇ ಬ್ರಿಕ್ಸ್ ಬಲಿಷ್ಠವಾಗದು. ಬ್ರಿಕ್ಸ್ ಬ್ಯಾಂಕ್ ಮತ್ತಷ್ಟು ಬಲಿಷ್ಠವಾಗಬೇಕು. ಈವರೆಗೆ ಬ್ರಿಕ್ಸ್ ಬ್ಯಾಂಕ್ ತನ್ನ ಸದಸ್ಯ ದೇಶಗಳಿಗೆ ಕೊಟ್ಟಿರುವ ಸಾಲದ ನೆರವು ಸುಮಾರು ೩೫ ಬಿಲಿಯನ್ ಡಾಲರ್‌ಗಳಷ್ಟೆ. ವಿಶ್ವಬ್ಯಾಂಕ್ ಒಂದೇ ವರ್ಷದಲ್ಲಿ 95 ಬಿಲಿಯನ್ ಡಾಲರ್ ಸಾಲದ ನೆರವು ನೀಡುತ್ತಿದೆ. ಈ ಪ್ರಮಾಣವನ್ನು ಮೀರಿ ಬ್ರಿಕ್ಸ್ ಬ್ಯಾಂಕ್ ತನ್ನ ಸದಸ್ಯ ದೇಶಗಳಿಗೆ ನೆರವಾಗುವಂತಾಗಬೇಕು. ಇದುವರೆಗೆ ಈ ಬ್ಯಾಂಕ್‌ಗೆ ಹಣಕಾಸು ಮುಗ್ಗಟ್ಟು ಇತ್ತು. ಆದರೆ ಬಹುಶಃ ಮುಂದೆ ಹೀಗಾಗಲಾರದು. ಏಕೆಂದರೆ ಶ್ರೀಮಂತ ದೇಶಗಳಾದ ಸೌದಿ ಅರೇಬಿಯಾ, ಯುಎಇ ಈಗ ಬ್ರಿಕ್ಸ್ ಬ್ಯಾಂಕ್‌ನಲ್ಲಿ ಹಣ ಹೂಡಲಿವೆ. ವಿವಿಧ ದೇಶಗಳ ಅಭಿವೃದ್ಧಿ ಯೋಜನೆಗಳಲ್ಲಿ ಹಣ ಹೂಡಲಿವೆ. ಸಂಘಟನೆ ಎಷ್ಟು ಬಲಿಷ್ಠವಾಗಿ ಬೆಳೆಯುತ್ತದೆ, ಭಿನ್ನಾಭಿಪ್ರಾಯಗಳನ್ನು ಬಗೆಹರಿಸಿಕೊಂಡು ಹೇಗೆ ಅಭಿವೃದ್ಧಿಗೆ ಗಮನ ನೀಡುತ್ತದೆ ಎನ್ನುವುದರ ಮೇಲೆ ಅದರ ಯಶಸ್ಸು ಅಡಗಿದೆ.

ಶ್ರೀಮಂತ ದೇಶಗಳ ಸಂಘಟನೆಗಳಾದ ಜಿ–7, ಜಿ-20 ಮತ್ತು ಅವುಗಳ ಆರ್ಥಿಕ ಸಂಸ್ಥೆಗಳಾದ ಐಎಂಎಫ್ ಮತ್ತು ವಿಶ್ವಬ್ಯಾಂಕ್, ಬಡದೇಶಗಳು ಮತ್ತು ಅಭಿವೃದ್ಧಿಶೀಲ ದೇಶಗಳ ಪ್ರಗತಿಗೆ ಅಗತ್ಯವಾದಷ್ಟು ನೆರವಾಗುತ್ತಿಲ್ಲ ಎನ್ನುವ ಆರೋಪಗಳಿವೆ. ಬ್ರಿಕ್ಸ್ ಸಂಘಟನೆ ಆರಂಭವಾಗಲು ಇದೂ ಒಂದು ಮುಖ್ಯ ಕಾರಣ. ಈಗ ಬ್ರಿಕ್ಸ್ ಬಲವಾಗಿದ್ದು ಶ್ರೀಮಂತ ದೇಶಗಳ ಸಂಸ್ಥೆಗಳು ಮಾಡಿದ ತಪ್ಪನ್ನೇ ಮಾಡಬಾರದು. ಯಾವುದೇ ಒಂದು ದೇಶದ ಪ್ರಾಬಲ್ಯಕ್ಕೆ ಇಂಥ ಸಂಸ್ಥೆಗಳು ಒಳಗಾಗದಂತೆ ನೋಡಿಕೊಳ್ಳುವುದು ಬ್ರಿಕ್ಸ್ ನಾಯಕರ ಗುರಿಯಾಗಬೇಕು.