ಫಾಫ್‌ ಡುಪ್ಲೆಸಿಸ್‌ಗೆ ಆರ್‌ಸಿಬಿ ನಾಯಕತ್ವ ನೀಡಿದ್ದು ಯಾಕೆ ಗೊತ್ತಾ ? : ಕಾರಣ ತಿಳಿಸಿದ ಮೈಕ್ ಹೇಸನ್‌

ಹೊಸದಿಲ್ಲಿ : ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ (ಐಪಿಎಲ್‌) ಟೂರ್ನಿಯಲ್ಲಿಯೇ ಅತ್ಯಂತ ಪ್ರಮುಖ ತಂಡವೆನಿಸಿರುವ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರಿನ ನಾಯಕತ್ವವನ್ನು ದಕ್ಷಿಣ ಆಫ್ರಿಕಾ ಆಟಗಾರ ಫಾಫ್‌ ಡು ಪ್ಲೆಸಿಸ್‌ಗೆ ನೀಡಲು ಕಾರಣವೇನೆಂದು ಬೆಂಗಳೂರು ಫ್ರಾಂಚೈಸಿ ಕ್ರಿಕೆಟ್‌ ನಿರ್ದೇಶಕ ಮೈಕ್‌ ಹೇಸನ್‌ ಬಹಿರಂಗಪಡಿಸಿದ್ದಾರೆ.
2021ರ ಐಪಿಎಲ್‌ ಟೂರ್ನಿಯ ಬಳಿಕ ವಿರಾಟ್‌ ಕೊಹ್ಲಿ ಆರ್‌ಸಿಬಿ ನಾಯಕತ್ವವನ್ನು ತ್ಯಜಿಸಿದ್ದರು. ಈ ಹಿನ್ನೆಲೆಯಲ್ಲಿ 2022ರ ಐಪಿಎಲ್‌ ಟೂರ್ನಿಯ ಆಟಗಾರರ ಮಿನಿ ಹರಾಜಿನಲ್ಲಿ ಫಾಫ್ ಡು ಪ್ಲೆಸಿಸ್‌ ಅವರನ್ನು ದುಬಾರಿ ಮೊತ್ತಕ್ಕೆ ಖರೀದಿಸಿದ್ದ ಆರ್‌ಸಿಬಿ, ನಾಯಕತ್ವವನ್ನು ನೀಡಿತ್ತು. ಅದರಂತೆ ಕಳೆದ ಆವೃತ್ತಿಯಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದ್ದ ಆರ್‌ಸಿಬಿ ಪ್ಲೇಆಫ್ಸ್‌ಗೆ ಅರ್ಹತೆ ಪಡೆದಿತ್ತು.
ಪ್ರಸ್ತುತ ನಡೆಯುತ್ತಿರುವ 2023ರ ಐಪಿಎಲ್‌ ಟೂರ್ನಿಯಲ್ಲಿಯೂ ಆರ್‌ಸಿಬಿ ತಂಡವನ್ನು ಫಾಫ್‌ ಡು ಪ್ಲೆಸಿಸ್‌ ಮುನ್ನಡಸುತ್ತಿದ್ದಾರೆ. ಆಡಿರುವ 5 ಪಂದ್ಯಗಳಲ್ಲಿ 3 ರಲ್ಲಿ ಸೋತಿರುವ ಆರ್‌ಸಿಬಿ, ಇನ್ನುಳಿದ ಎರಡು ಪಂದ್ಯಗಳಲ್ಲಿ ಗೆಲುವು ಕಂಡಿದೆ. ಅತ್ಯುತ್ತಮ ಫಾರ್ಮ್‌ನಲ್ಲಿರುವ ಫಾಫ್ ಡು ಪ್ಲೆಸಿಸ್ ಅವರು ಸದ್ಯ ಆರೆಂಜ್ ಕ್ಯಾಪ್‌ ತನ್ನಲ್ಲಿಯೇ ಉಳಿಸಿಕೊಂಡಿದ್ದಾರೆ.
“ಹಿಂದಿನ ನಾಯಕ ತಂಡದಲ್ಲಿದ್ದಾಗ, ನೂತನ ನಾಯಕನನ್ನು ಆರಿಸುವುದು ತುಂಬಾ ಕಠಿಣ ಕೆಲಸ. ಹಾಗಾಗಿ ತಂಡದಲ್ಲಿ ಎಲ್ಲರನ್ನೂ ಗೌರವಿಸುವ ಒಬ್ಬ ಆಟಗಾರನಿಗೆ ನಾಯಕತ್ವ ನೀಡುವುದು ಇಲ್ಲಿ ತುಂಬಾ ಮುಖ್ಯವಾಗಿತ್ತು. ಏಕೆಂದರೆ ಸಾಕಷ್ಟು ಆಟಗಾರರು ನಾಯಕರಾದ ಬಳಿಕ ಮಾಜಿ ನಾಯಕರನ್ನು ಕಡೆಗಣಿಸುವ ಉದಾಹರಣೆಗಳನ್ನು ನಾವು ನೋಡಿದ್ದೇವೆ,” ಎಂದು ಮೈಕ್‌ ಹೇಸನ್‌ ತಿಳಿಸಿದ್ದಾರೆ.
“ಇದಕ್ಕೂ ಮುನ್ನ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ತಂಡವನ್ನು ಮುನ್ನಡೆಸಿರುವ ಅನುಭವವುಳ್ಳ, ದೇಶಿ ಹಾಗೂ ಅಂತಾರಾಷ್ಟ್ರೀಯ ಭಾರತೀಯ ಆಟಗಾರರನ್ನು ಗೌರವಿಸುವ ಒಬ್ಬ ಅಭ್ಯರ್ಥಿ ನಮಗೆ ಅಗತ್ಯವಿತ್ತು. ಒಂದು ವರ್ಷ ತಂಡದ ನಾಯಕತ್ವದ ಜವಾಬ್ದಾರಿ ವಹಿಸಿಕೊಳ್ಳುವುದು ತಮಾಷೆಯ ವಿಷಯವಲ್ಲ. ಇದರ ಜೊತೆಗೆ ಅತ್ಯುತ್ತಮ ಪ್ರತಿಭಾನ್ವಿತ ಆಟಗಾರ ನಮಗೆ ಅಗತ್ಯವಿತ್ತು,” ಎಂದರು.
ಐಪಿಎಲ್‌ ಟೂರ್ನಿಯಲ್ಲಿ ಉತ್ತಮ ದಾಖಲೆಗಳನ್ನು ಹೊಂದಿರುವ ಫಾಫ್‌ ಡು ಪ್ಲೆಸಿಸ್‌ ಅವರಂತಹ ಆಟಗಾರ ಆರ್‌ಸಿಬಿ ನಾಯಕತ್ವಕ್ಕೆ ಅಗತ್ಯವಿತ್ತು. ನಾವು ನಿರೀಕ್ಷೆ ಮಾಡಿದ್ದ ಎಲ್ಲಾ ಅಂಶಗಳು ದಕ್ಷಿಣ ಆಫ್ರಿಕಾ ಆಟಗಾರನಲ್ಲಿತ್ತು ಎಂದು ಆರ್‌ಸಿಬಿ ಡೈರೆಕ್ಟರ್‌ ತಿಳಿಸಿದ್ದಾರೆ.
“ಅತ್ಯುತ್ತಮ ಪ್ರದರ್ಶನ ತೋರುವ ಹಾಗೂ ಐಪಿಎಲ್‌ ಟೂರ್ನಿಯಲ್ಲಿ ಅತ್ಯುತ್ತಮ ದಾಖಲೆ ಹೊಂದಿರುವ ಯಾರಾದರೂ ಒಬ್ಬ ಆಟಗಾರ ನಮಗೆ ಅಗತ್ಯವಿತ್ತು. ಈ ಅಂಶಗಳು ಫಾಫ್‌ ಡು ಪ್ಲೆಸಿಸ್‌ ಅವರಲ್ಲಿ ಕಂಡಿದ್ದವು. ಕೋಚ್‌ಗಳು ಹಾಗೂ ಗುಂಪಿನ ಜೊತೆ ಅತ್ಯುತ್ತಮ ಬಾಂಧವ್ಯದೊಂದಿಗೆ ಕೆಲಸ ಮಾಡುವ ಅಭ್ಯರ್ಥಿ ನಮಗೆ ಅಗತ್ಯವಿತ್ತು. ಇದರ ಜೊತೆಗೆ ವಿರಾಟ್‌ ಕೊಹ್ಲಿ, ಗ್ಲೆನ್‌ ಮ್ಯಾಕ್ಸ್‌ವೆಲ್‌, ದಿನೇಶ್‌ ಕಾರ್ತಿಕ್‌ ಅವರಂಥ ಹಿರಿಯ ಆಟಗಾರರನ್ನು ಸರಿಯಾದ ಹಾದಿಯಲ್ಲಿ ನಿರ್ವಹಿಸುವ ಸಾಮರ್ಥ್ಯ ಎಲ್ಲವೂ ಫಾಫ್‌ ಅವರಲ್ಲಿ ಕಂಡಿತ್ತು. ಈ ಎಲ್ಲಾ ಅಂಶಗಳನ್ನು ಫಾಫ್‌ ಡು ಪ್ಲೆಸಿಸ್‌ ಹೊಂದಿದ್ದ ಕಾರಣ ಅವರಿಗೆ ನಾಯಕತ್ವ ನೀಡಲಾಗಿತ್ತು,” ಎಂದು ಮೈಕ್‌ ಹೇಸನ್ ವಿವರಿಸಿದ್ದಾರೆ.